Read turkana 1 Ngakiro a Ngirwa 17 Bible Online

1 Ngakiro a Ngirwa 17 - turkana bible

1 Ngakiro a Ngirwa 17

¹Alomit tokona Daudi kai keng. Akolongit apei, tanyarau ngesi ekadwaran Nasan tolimok tama, “Kingolik mono tokona iyong a, abe alomit ayong kai na adukio a ngakito a echekereng, tarai iwaakinitae asaduku a Achamunet na erai aka Akuj loeam!”

²Tatachak Nasan tama, “Tosub ibore nicha isaki iyong akisub daang kainyo irukito iyong ka Ekapolon Akuj.”

³Nakaneni tolimok Ekapolon Akuj nia Nasan nakwaare a akolongit kangina tama,

⁴“Kape tolimok ekasuban etich kang Daudi atamar ebala Ekapolon Akuj kona, ‘Meere iyong kidukokini ayong akai na eboikin.

⁵Napei kolong ayuunea ayong Ngisirael alo Misiri tani tokona, nyiboikino ayong kai. Eboyeene ayong jiik aloeaman, erimit akwap.

⁶Ngirwa daang lu kirimitor ayong ka Ngisirael akwap, emam tani epei a ngikarikok alu aseuni ayong lo engit ayong atamar nyo pekadukokinea akai na ngakito a echekereng.’

⁷“Kotere ngakiro nguna, tolimok ekasuban etich kang Daudi atamar ayong Akuj Namerikanyer alimokinit ngesi kona, ‘Kaseuni kolong ayong iyong anachokor ana iyokiyo ngamesekin, sodi ketiliwo ekapolon a ngitunga kang alu eraakasi Ngisirael.

⁸Kiruk ayong ka iyong ani ilosi kadaang, sodi edwang ngimoe kon daang esaa lo ilosio iyong ngaren. Ketiliwori ayong iyong lo kiyenikinitae loger a ngikarikok alu eyenikinitae noi anakwapea.

⁹Aseuni ayong akwap na eliwor aka Ngisirael alu eraakasi ngitunga kang, sodi etak kesi, tolometa nakwap na erai akech a ngikulepek, nyiichanere nabo. Nyewanete kesi ngitunga luaronok loger lokolong sek a ekingaren,

¹⁰na etijioto kesi ngitunga lukadedengak napei kolong alomuneta nakwap naga. Kechikakinit esi atamar edwangi ayong ngimoe kus daang, sodi kainak esi ngalesea.

¹¹Ani itoani iyong kitonukakin ni enukakinitae taapaakon, etiliwori ayong epei kata lokookon ekapolon, sodi etogogong apolou keng.

¹²Lokookon ngolo ngesi kadukokini ayong akai, nabo eturubi ayong apolou keng toliwor akajik.

¹³Aliwor ayong apakeng, toliwor ngesi lokookang. Nyawouni ayong akingarakin ngesi loger lokolong awounea akingarakin Saul, lokolong alemari ayong toliworor iyong ekapolon.

¹⁴ Etiliwori ayong ngesi ekapolon a ngitunga kang, toweik ka apolou kang jik. Nyedaun apolou keng jik.’ ”

¹⁵Tolimok Nasan Daudi ngakiro daang na edodikinit ngesi Akuj.

¹⁶Sodi toloma Daudi loeam a Akuj, kiboikin kilip tama, “Nyo tokona lo arai ayong dang, kisubakinea iyong ngakiro nugu, Ekapolon Akuj na irai Akuj. Nyo tani ngitunga a awi kang?

¹⁷Ani ikoni neni dang, Ekapolon Akuj na irai Akuj, kichikak iyong ayong ngakiro a ngalesea kang kotere ngikaru lu monan isidiunosi. Nakaneni Ekapolon Akuj, kisikok iyong ayong itwaan ni eyenikinitae.

¹⁸Anukiro nabo ngache kalimokini ayong iyong? Kiyeni iyong ayong lokojokon. Ani ikoni neni dang, kirima iyong ayong ekasuban etich kon.

¹⁹Araakasi ngakiro nguna na ichamit iyong akisub kotere ayong. Isaki nabo iyong akidodikin ayong apolou kang na isidiuno.

²⁰Ekapolon Akuj, emam tani ipei ni ikwaan ka iyong. Kiyen sua ngirwa daang atamar iyong bon irai Akuj.

²¹Emam nabo ebukut eche anakwapea lo ikwaan ka Isirael, lokolong iyuuni ani araakar ekedalan, kitiliwo ngitunga kon a alope. Ngakiro nakatalarak ka naketubulok isubi iyong anikech, apetakis ekipur kon wadaang a ngakwapea. Iyuuni iyong ngitunga kon alo Misiri, sodi kitwarak ngibukui luche na alooso ngitunga kon ngaren.

²²Itiliwo iyong Ngisirael ngitunga kon nakajik. Ani iyong Ekapolon Akuj, iliwor Akuj kech.

²³“Tokona bocha Ekapolon Akuj, kitemok jik akichikakinet nakolong kichikakini iyong ayong ka ngalesea kang, sodi tosub ngakiro nakolong ilimuni iyong atamar isubi.

²⁴Eyenikinio ekipur a ekiro kon nakajik, sodi tolimuunut ngitunga jiik ebalasi, ‘Akuj Namerikanyer, ngesi erai Akuj a Isirael!’ Nakaneni itiliwori iyong apolou kang akajik.

²⁵Akuj kang, apedori ayong akilip iyong loger logo, kainyo kidodik iyong ayong ekasuban etich kon ngakiro nugu daang, ilimu tani atamar itiliwori iyong ngalesea kang ngikapolok.

²⁶Ee Ekapolon Akuj, irai iyong Akuj, kichikak iyong ayong ekasuban etich kon akichikakinet naajokon noi naga.

²⁷Kelipit iyong atamar topia ngalesea kang sodi torubakis eanyunito ngakiro naajokak anikon. Iyong Ekapolon Akuj ipia kesi, nakaneni eliwor apiaro kon aka ngalesea kang.”