Read turkana 1 Ngakiro a Ngirwa 18 Bible Online

1 Ngakiro a Ngirwa 18 - turkana bible

1 Ngakiro a Ngirwa 18

¹Ani ekisidi, tolot ekapolon Daudi nabo akitijwore Ngipilisti sodi kidwang. Todema kesi ere a Gas ka ngadakarin na edunyatar.

²Kidwang ngesi tani Ngimoab, toliworos ngitunga lu epolokinit ngesi, sodi tobukonokis ngesi echur.

³Ani erumor kitijik Daudi ekapolon anyaritae Adadeser lo apolokinit ni anyaritae Soba, ni ayei nakwap a Siria. Ayei ni anyaritae Soba neni diyete akwap a Amas. Etijikini Daudi Adadeser kaneni esaa lo asakea Adadeser akidodiun atamar arai ekapolon a ewae alo alokuju angolol Eupurate.

⁴Torem Daudi ngaurukukui keng na irito ngangolei abunget apei ani a Adadeser, ka ngikameak ngangolei ngabunge ngakan-kaarei, ta ngasigerea na eloose a ngakejen ngabunge ngatomwon-arei. Kimiek ngesi ngangolei na iriyete ngaurukukui amiat apei, sodi tonged ngesi ngangolei nache daang ngamori na a ngakejen tongwala.

⁵Ani emeunete ngitunga a Siria lu ayakasi Damasko ajore na ingarakini ekapolon Adadeser alojie, abu Daudi kitijik ajore ngina taar ngitunga ngabunge ngatomwon-arei ka ngaarei.

⁶Ani erumor kiwaak ngesi ngadakarin na ejie nakwap kech. Apot kesi toliworos ngitunga lu epolokinit Daudi, tobukonokis ngesi echur. Abu Ekapolon Akuj kisidwang Daudi ngimoe keng awadaang.

⁷Tolema Daudi ngaupwala a egolit na atingito ngikapolok a arieng a Adadeser, sodi yaa Yerusalem.

⁸ Tolema ngesi tani asuat nanyang nakaalan alo Tibas ka Kun, alu araakasi ngirerea lu apolokinit Adadeser. (Ekisidi, tolem Daudi asuat nanyang ngina tosubakinea atanki, ka ngapirio ta ngiboro lu akai a Akuj lu asubunitae anasua ananyangayek.)

⁹Kiira Toi lo arai ekapolon a Amas atamar edwang Daudi ngasigerea daang a Adadeser.

¹⁰Sodi tomea ngesi lokookeng lo anyaritae Yoram akimalare ekapolon Daudi ka abuakin ngesi alakara ani edwangea Adadeser. Ajito sek Toi ka Adadeser ngajiet nakaalak. Naa Yoram Daudi ngiboro lu asubunitae a egolit ka akwangat ta asuat nanyang.

¹¹ Kitaleu Ekapolon Daudi kesi toliworos ilipeenere. Kimorik aapei ka akwangat ta egolit lo alemuni ngesi alobukui alu edwangi. Ngibukui ngulu kesi Ngiedomae, ka Ngimoab, ka Ngiamon, ka Ngipilisti ta Ngiamalek.

¹²Abichai lo anyaritae itiokeng Seruya, abu kidwang Ngiedomae ani enyaritae adipo a Amakat. Taar ngesi Ngiedomae ngabunge ngatomon ka ngakan-kauni.

¹³Kiwaak ngesi ngadakarin a ejie lowaitin daang a Edom. Toliwor ngesi epolokinit ngitunga a Edom. Kidwang Daudi ngimoe keng awadaang kotere Ekapolon Akuj.

¹⁴Topolok Daudi akwap a Isirael daang, sodi tosubea ngitunga keng daang ngakiro na itemokino toriyan.

¹⁵Yoab lo arai lokaatokeng a Abichai ngesi arai ekarikon a ngasigerea. Yeochapat lokookeng a Ailud ngesi aweikinit ekimar.

¹⁶Sadok lokookeng a Aitud ka Aimelek lokookeng a Abiasar kesi araakasi ngimurok a Akuj. Seraya[29] ngesi arai ekegiran ngikesio.

¹⁷Benaya lokookeng a Yeoyada ngesi arai ekarikon a ngasigerea ana eteete Daudi. Araakasi talokookeng a Daudi ngikapolok a arieng.