Read turkana 1 Ngakiro a Ngirwa 19 Bible Online

1 Ngakiro a Ngirwa 19 - turkana bible

1 Ngakiro a Ngirwa 19

¹Ani ekisidi, totoan Naach lo arai ekapolon a Ngiamon. Sodi toliwor lokookeng Anun ekapolon.

²Tolim ekapolon Daudi tama, “Asaki ayong atosubea Anun naajokak loger lokolong kasubea apakeng Naach ayong naajokak.” Abu Daudi tomea ngitunga akisililing Anun. Ani enangete kesi nakwap nabe Amon, toloto aanyun ekapolon Anun,

³apot ngikarikok a Ngiamon tolimokis ekapolon kech tamasi, “Esibit iyong emeunit Daudi ngitunga lugu akisililing iyong ani erimar apakon a? Meere kongina! Emeunit ngesi kesi nege akireb akwap sodi kidwanga ngoni!”

⁴Torwakin Anun ngitunga lu ameunit Daudi sodi tabany ngajul a ngabokonya kech. Totub ngesi ngiwaitin a ngiworui kech lu erapito ngikalokoi, sodi kimiek kesi toloto.

⁵Kiruma ngitunga ngulu ngileech noi tokuruwo kona ebongorete nawi. Ani iirari Daudi ngakiro na asubakinosi, abu tomea itwaan alimokin kesi ebala, “Tasala mono alo Yeriko tanang erupunete ngajul a ngabokonya kech, ani erumor tobongut nawi.”

⁶Ani eyenunete Ngiamon atamar akadakis Daudi ngakiro kech, apot tolemut akwangat ngakiloi ngabunge ngatomwon-uni ka ngoomwon togieleta ngaurukukui na iritae ka ngikameak ngaurukukui nguna, lu apote alokuju Mesopotamia ka ngakwapea a Siria na enyaritae Maaka ka Soba.

⁷Togiela kesi ngaurukukui na iritae ngabunge ngatomwon-uni ka ngaarei. Kirukut ekapolon a Maaka ka ajore keng toloma diyete Medeba. Pot Ngiamon dang alorerea kech sodi tasada ejie.

⁸Ani iirari Daudi ngakiro kech, abu tomea Yoab aapei ka ngajorei keng daang nakajwok.

⁹Toropuut Ngiamon kibaka alokidor a Raba, alo arai ere loapolon a akwap kech. Ani ngikapolok lu apote akingarakin kesi, apot kibaka alowae alo alomoding.

¹⁰Kingolik Yoab atamar ketijikinete ngesi ngimoe keng alowae alo alongaren ka ewae lo alokaku, toseu ngesi ngasigerea nakajwok noi kisibak alowae a ngitunga a akwap a Siria.

¹¹Kitiliwo ngesi lokaatokeng Abichai ekarikon a ngasigerea anache. Kisibak kesi tokienyikinos ka Ngiamon.

¹²Tolimok Yoab ngesi tama, “Ani kingolik iyong atamar kedwang ayong ngitunga a akwap a Siria, bu kingarak ayong. Ani kidwang iyong Ngiamon, abuni ayong kengarak iyong.

¹³Toliwor lo igogong nabo ititiny! Atojwoto lokiliok kotere ngitunga yok ka ngirerea a Akuj yok. Kimiekisi nguna esaki Ekapolon Akuj tosubakin.”

¹⁴Pot Yoab ka ngitunga keng akitijikin ngimoe kech, nakaneni tamataros ngitunga a akwap a Siria.

¹⁵Ani ingolikinete Ngiamon ngitunga a akwap a Siria ematarosi, tamataros kesi ani eyei Abichai tolomasi lore. Abu Yoab tobongo Yerusalem.

¹⁶Ani eyenete ngitunga a akwap a Siria atamar edwang Ngisirael kesi, apot tanyaraut ngasigerea kech daang tochunakis wapei. Apote ngasigerea nguna alowaitin a Siria alu eyakasi kide angolol a Eupurate. Abu Chobak lo arai ekarikon a ngasigerea a Adadeser alo arai ekapolon a Soba, toliwor ekarikon kech.

¹⁷Ani iirari Daudi ngakiro nguna, tochunak ngasigerea a Isirael, todoka angolol a Yorudan, kisibak kesi ekienyikinito ngitunga a Siria. Kisiak ejie,

¹⁸tamatar ajore a Siria ani ayakasi Ngisirael. Taara Daudi ka ngitunga keng ngasigerea a Siria ngabunge ngakan-kaarei na adokito ngaurukukui ta ngasigerea ngabunge ngatomwon-omwon na aloose a ngakejen. Apot kesi tani taara ekarikon a ngasigerea a akwap a Siria lo anyaritae Chobak.

¹⁹Ani eyenete ngikapolok lu apolokinit Adadeser atamar edwang Ngisirael kesi, apot kisila ka Daudi, topolok Daudi kesi. Apot ngitunga a Siria toema, tapalikis akingaranakin Ngiamon.