Read turkana 1 Ngakiro a Ngirwa 23 Bible Online

1 Ngakiro a Ngirwa 23 - turkana bible

1 Ngakiro a Ngirwa 23

¹ Ani ngirwa lu amojongea Daudi noi, kitiliwo ngesi lokookeng Solomon ekapolon a Isirael.

²Abu ekapolon Daudi tochunak wapei ngikapolok a Ngisirael daang, ka ngimurok a Akuj ta Ngilawi.

³Kimaru ngesi Ngilawi lukiliok daang lu araakasi ngikaru kech ngitomwon-uni kori lu eporito ngikaru ngulu. Araakasi daang 38,000.

⁴Totiaku ekapolon 24,000 toliworos esubete etich alokai a Akuj, toliworos 6,000 eweikinito ekimar ka akitub ngikesio,

⁵toliworos 4,000 ngikeyokok a etich, toliworos 4,000 ngikekutak Ekapolon Akuj eeotor ngiboro lu alemuni ekapolon toeore.

⁶Totiak Daudi Ngilawi ngatiaket ngauni, itemem ka ngimacharin lu araakasi Gerichon, ka Koas ta Merari.

⁷Ayakasi Gerichon ngide lusapa ngiarei lu anyaritae Ladan ka Chimei.

⁸Ayakasi Ladan ngide lusapa nguuni lu anyaritae Yeyel, ka Sesam ta Yoel.

⁹Kesi araakasi ngikapolok a ngimacharin alu etorunete nia Ladan. (Ayakasi Chimei ngide lusapa nguuni lu anyaritae Chelomos, ka Asiel ta Aran.)[32]

¹⁰Ayakasi Chimei ngide lusapa nguomwon lu anyaritae Yaas, ka Sina, ka Yeuch ta Beria. Anyaritae loapolon Yaas,

¹¹ totupak Sina, totupak Yeuch, totupak Beria. Amam Yeuch ka Beria ngalesea nakaalak. Kotere ngakiro nguna, apon kimarunae kesi atamar eraakasi emachar epei.

¹²Ayakasi Koas ngide lusapa nguomwon lu anyaritae Amuram, ka Ichar, ka Eburon ta Usiel.

¹³Lokookeng loapolon lo anyaritae Amuram, ngesi arai apakeng a Aron ka Musa. (Etegeliaritae Aron ka ngalesea keng toliworos kesi eweikinito ngiboro lu italeunitoe jik, ka akinom emitina ilipitere Ekapolon Akuj, ka akisub etich keng ta apianar ngitunga a ekiro a Ekapolon Akuj.

¹⁴Ani ngide lusapa a Musa alo arai itwaan a Akuj, emarunitae aapei ka Ngilawi.)

¹⁵Ayakasi Musa ngide lusapa ngiarei lu anyaritae Gerichom ka Elieser.

¹⁶Alode a Gerichom alusapa, anyaritae loapolon Chebuel.

¹⁷Ayei Elieser lokookeng epei bon lo anyaritae Reabia, nakaneni ayakasi Reabia ngalesea nakaalak.

¹⁸Lokookeng a Koas lo a ngiarei lo anyaritae Ichar, ayei lokookeng lo anyaritae Chelomis lo arai ekapolon a emachar kech.

¹⁹Lokookeng a Koas lo a nguuni lo anyaritae Eburon, ayakasi talokookeng nguomwon lu anyaritae Yeria, ka Amaria, ka Yaasiel ta Yekameam.

²⁰Lokookeng a Koas lo a nguomwon lo anyaritae Usiel, ayakasi talokookeng ngiarei lu anyaritae Mika ka Ichia.

²¹Ayakasi Merari talokookeng ngiarei lu anyaritae Mali ka Muchi. Ayakasi Mali talokookeng ngiarei lu anyaritae Eleasar ka Kich.

²²Nakaneni totoan nyeanyuna ngide lusapa, lupesur make ayakasi. Kiuta talokookeng a Kich lu araakasi ngichenin kech ngapesur nguna.

²³Ayakasi lokookeng a Merari lo a ngiarei lo anyaritae Muchi talokookeng nguuni lu anyaritae Mali, ka Eder ta Yerimos.

²⁴ Lugu kesi araakasi ngalesea a Lawi, a ngimacharin kech ka ngawiyei wiyei, igirakinitae ekiro a ipei kech kadaang. Ipei a ngalesea kech daang ni araakasi ngikaru keng ngitomwon-arei ka ni eporito, ayei etich lo asubi alokai a Akuj.

²⁵Tolim Daudi tama, “Ainaki Ekapolon Akuj na erai Akuj a Ngisirael ngitunga keng ekisil. Emini ngesi Yerusalem jik.

²⁶Kotere ngakiro nguna, nyeringa nabo Ngilawi etingete eam a Akuj ka ngiboro luche daang ilipeenere.”

²⁷Kotere ngakiro na esal alimuni Daudi nguna, apon Ngilawi kigirakinae lotich na anangeta ngikaru kech ngitomwon-arei.

²⁸Ngitichisio ngulu kesi lu akingarakin ngimurok luyenet a Aron lu asubete etich ani elipeenere, ka achoikin ngalaarin ka ngamaniyae kech, ka akirichun ibore daang ni italeuno,

²⁹ka achoikin ngamugati na elemanakinio Akuj, ka ngakiria na elemuununio ngakipeyos, ka ngamandasia na nyiwaakinitae ekitoe lo itubui, ka ngakipeyos na imao, ka ngakiria na imorikinitae ka akimiet a ngikito ta aanyun apotis ka akitem ngadekon a akai a Akuj,

³⁰ka akipuruun ta akikut Ekapolon Akuj ataparach ka atabong daang,

³¹esaa daang lo inomere ngakipeyos a Ekapolon Akuj akolongit a Sabato, ka esukukuu a elap alokitetet ta ngisukukui luche. Torekinae ngitalio lu edodiunito etiae a ngimurok alu esubete ekimar ngolo asubet apei. Totiakakinae ngimurok etich lo ilipitotor Ekapolon Akuj jiik.

³² Nakinae kesi etich lo echoikineta eam ka akai a Akuj, ka akingarakin ngiyenet kech ani ilipeenere alokai a Akuj. Ngiyenet kech ngulu kesi lu ayanasi ka Aron.