Read turkana 1 Ngakiro a Ngirwa 26 Bible Online

1 Ngakiro a Ngirwa 26 - turkana bible

1 Ngakiro a Ngirwa 26

¹Lugu kesi araakasi ngitichisio a Ngilawi alu araakasi ngasigerea a akai a Akuj. Alomachar a Kora, ayei Mechelemia lo arai lokookeng a Kore, lo arai eyenet a Asap.

²Ayakasi ngesi talokookeng ngikan-kaarei, akisiakin aloapolon, anyaritae kesi Sekaria, ka Yediael, ka Sebadia, ka Yasiniel,

³ka Elam, ka Yewanan ta Elioenai.

⁴Ayei tani Obed Edom lo apiari Akuj nak ngide lusapa ngikan-kauni, akisiakin aloapolon anyaritae kesi Chemaya, ka Yeosabad, ka Yoa, ka Sakar, ka Nesanel,

⁵ ka Amiel, ka Isakar ta Peulesai.

⁶Ayakasi lokookeng lo anyaritae Chemaya talokookeng lu araakasi ngikapolok anawi a apakech kainyo araakasi kesi ngikiliok lu eyenikinitae.

⁷Anyaritae talokookeng a Chemaya Osini, ka Rapael, ka Obed, ka Elisabad, ka Eliu ta Semakia. Eliu ka Semakia kesi ayenikinitae noi.

⁸Ngitunga a Obed Edom, lu asubete etich ngolo, araakasi ngitomwon-kapei ka ngiarei, lu ayenete etich ngolo lokojokon.

⁹Ngitunga a awi a Mechelemia araakasi ngitomon ka ngikan-kauni lu ayenete etich ngolo.

¹⁰Ani alomachar a Merari, ayei Osa lo ayakasi ngide lusapa nguomwon lu anyaritae Chimuri, (etiliwori apakeng ngesi ekapolon, tarai bo tani pearai ngesi ageari akidouno).

¹¹Ngirora aluche kesi ta Ilikia, ka Tebalia ta Sekaria. Ngide lusapa daang a awi a Osa lutomon ka nguuni araakasi ngasigerea a akai a Akuj.

¹²Atiakitae ngasigerea nguna a ngawiyei totiakakinae etich lo esubete alokai a Akuj, loger a Ngilawi aluche.

¹³Ngitunga a awi a apei, napei aniichi tanang niapolon, arameene ekura toyenea atamar ekidor ali eyoki.

¹⁴Abu ekura totiakak Chelemia ekidor lo alo kide. Ani lokookeng Sekaria lo arai itwaan ni etutukeene jiik ngitunga ngakiro naajokak, abu ekura totiakak ekidor lo alokwap.

¹⁵Totiakakinae Obed Edom lo alokuju, totiakakinae lokookeng akiyok ngikerui.

¹⁶Totiakakinae Chupim ka Osa ekidor lo alo too, ka ekidor lo anyaritae Chalekes lo ayei lorot lo etorit lowae lo alokidiama. Atiakitae ngisaa lu iyokiyere ngidorin, alunyaanasi ngasigerea.

¹⁷Eyokiyete ngasigerea ngakan-kapei ewae lo alo kide akolongit apei. Ani ewae lo alokwap nguomwon, ani ewae lo alokuju nguomwon. Eyokiyete ngasigerea ngoomwon ngikerui akolongit apei, ekeru epei, kiyoko ngiarei.

¹⁸Diyete alaar na alo too, ayakasi ngasigerea ngoomwon lorot, toyakas ngaarei nalaar.

¹⁹Etich ngolo atiakakinitae ngasigerea alomacharin a Kora ka Merari.

²⁰Ayakasi Ngilawi ngiche lu aweikinito ni iwaanakinio ngaropiyae alokai a Akuj, ka ngikerui lua ngiboro alu italekinitoe Akuj.

²¹Epei kata lokookeng a Gerichon lo anyaritae Ladan, arai apaakeng a ngawiyei wiyei anagelagelae erukito aapei ka ngitunga a awi a lokookeng alo anyaritae Yeyel.

²²Talokookeng a Ladan ngiarei lu anyaritae Sesam ka Yoel kesi aweikinito ni iwaanakinio ngaropiyae alokai a Akuj ta ngikerui.

²³Atiakakinitae tani ngalesea a Amuram, ka Ichar, ka Eburon ta Usiel ngitichisio ngiche.

²⁴Chebuel lo arai lokookeng a Gerichom ngesi arai ekapolon aluche kadaang aweikinito ni iwaanakinio ngaropiyae a akai a Akuj. Arai Gerichom lokookeng a Musa.

²⁵Kotere lokaatokeng a Gerichom lo anyaritae Elieser, ayanasi Chelomis ka Chebuel. Elieser arai apakeng a Reabia. Reabia arai apakeng a Yechia. Yechia arai apakeng a Yoram. Yoram arai apakeng a Sikiri. Sikiri arai apakeng a Chelomis.

²⁶Chelomis ka ngiyenet keng kesi aweikinito ngainakinet na etaleunit ekapolon Daudi eraakasi ngaka Akuj. Ngainakinet nguna kesi na alemunete ngikapolok a ngawiyei, ka ngikapolok a ngimacharin ta ngikapolok a ngasigerea.

²⁷Tolemut kesi ngiboro ngiche lu angatarete alojie kitaleut tosubere etich alokai a Akuj.

²⁸Chelomis ka ngiyenet keng aweikinito ibore daang ni etaleunitoe tosubere etich alokai a Akuj, napei anainakinet ana ayauni ekadwaran a Akuj Samuel, ka na ayauni ekapolon Saul, ka na ayauni Abiner lo arai lokookeng a Ner ta na ayauni Yoab lo arai lokookeng a Seruya.

²⁹Analesea a Ichar, Kenania ka talokookeng atiakakinitae ngakiro a ngitichisio alu esubio, alu ikote aweikin ekimar ka akitiak ngikesio a Ngisirael.

³⁰Analesea a Eburon, ka Achabia ta ngiyenet keng ngitomon ka ngikan-kaarei, lu araakasi daang ngikiliok lu ayenikinitae, kesi aweikinito etich a Ekapolon Akuj ka loa arieng daang alo Isirael, too angolol a Yorudan.

³¹Yeria ngesi arai arai ekapolon a ngalesea a Eburon. Ekaru lo a ngitomwon-omwon lo araakar Daudi ekapolon, apon tasakae angichun aur a ngalesea a Eburon. Apon taanyunae ngasigerea na ayenikinitae a ngitunga kangulu elomito Yaser nia akwap a Gilead .

³²Toseu ekapolon Daudi ngikapolok a ngawiyei wiyei ngabunge ngaarei ka ngamiae ngakan-kaarei lu ayenikinitae, lu araakasi ngiyenet a Yeria, sodi kitoweik kesi etich a Ekapolon Akuj ka lo a arieng daang alo Isirael, kide angolol Yorudan, nakwapea a Reuben, ka Gad ta Kide Manase.