Read turkana 1 Ngakiro a Ngirwa 27 Bible Online

1 Ngakiro a Ngirwa 27 - turkana bible

1 Ngakiro a Ngirwa 27

¹Eraakasi lugu ngirora a Ngisirael, alu araakasi ngikarikok a ngajorei a ngawiyei, ka ngikarikok a ngajorei a ngimacharin, ta ngikarikok a arieng lu asubete etich anapolou kangina. Elap epei, ayei atiakar a ngitunga ngabunge ngatomwon-arei ka ngoomwon lu asubete etich eweikinit ekarikon epei.

²Yachobeam lo arai lokookeng a Sabudiel ngesi arai ekarikon a atiakar ana ekingaren ana asubi etich elap lo ekingaren. Araakasi kesi 24,000. (

³Arai ngesi eka emachar a Peres, alo arai eka ekitela a Yuda).

⁴Dodai lo alesit a Aoi (Mikilos arai ekarikon lo atupit ngesi), arai ekarikon a atiakar ana ngaarei ana asubi etich elap lo a ngiarei. Araakasi kesi 24,000.

⁵Benaya lo arai lokookeng a emuron alo anyaritae Yeoyada ngesi arai ekarikon a atiakar ana ngauni ana asubi etich elap lo a nguuni. Araakasi kesi 24,000.

⁶Arai ngesi ekarikon “Alutomwon-uni” (lokookeng a Amisabab ngesi abu kilunyokin nados keng toliwor ekarikon a atiakar kangina).

⁷Asael lokaatokeng a Yoab (lokookeng a Sebadia ngesi abu kilunyokin nados keng) ngesi arai ekarikon a atiakar ana ngoomwon ana asubi etich elap lo a nguomwon. Araakasi kesi 24,000.

⁸Chamuus lo arai alesit a Ichar ngesi arai ekarikon a atiakaru ana ngakan ana asubi etich elap lo a ngikan. Araakasi kesi 24,000.

⁹Ira lo arai lokookeng a Ikech, lo abunit alo Tekoa, ngesi arai ekarikon a atiakar ana ngakan-kapei ana asubi etich elap lo a ngikan-kapei. Araakasi kesi 24,000.

¹⁰Eles lo emachar a Epiraim, lo abunit alo Pelon, ngesi arai ekarikon a atiakar ana ngakan-kaarei ana asubi etich elap lo a ngikan-kaarei. Araakasi kesi 24,000.

¹¹Sebekai lo abunit alo Ucha (arai ngesi eka emachar a Sera, alo arai eka ekitela a Yuda) ngesi arai ekarikon a atiakar ana ngakan-kauni, ana asubi etich elap loa ngikan-kauni. Araakasi kesi 24,000.

¹²Abieser lo abunit alo Anasos anakwap a ekitela a Benjamen ngesi arai ekarikon a atiakar ana ngakan-koomwon ana asubi etich elap lo a ngikan-koomwon. Araakasi kesi 24,000.

¹³Maarai lo abunit alo Netopa (arai ngesi eka ekitela a Sera) ngesi arai ekarikon a atiakar ana ngatomon ana asubi etich elap lo a ngitomon. Araakasi kesi 24,000.

¹⁴Benaya lo abunit alo Pirason anakwap a ekitela a Epiraim ngesi arai ekarikon a atiakar ana ngatomon ka apei ana asubi etich elap lo a ngitomon ka epei. Araakasi kesi 24,000.

¹⁵Elidai lo abunit alo Netopa (arai alesit a Osiniel) ngesi arai ekarikon a atiakar ana ngatomon ka ngaarei ana asubi etich elap lo a ngitomon ka ngiarei. Araakasi kesi 24,000.

¹⁶Eraakasi lugu ngirora a ngikapolok a arieng alu asubete etich alo Isirael. Lo ekitela a Reuben ngesi Elieser lokookeng a Sikiri. Lo ekitela a Simeon ngesi Chepatia lokookeng a Maaka.

¹⁷Lo ekitela a Lawi ngesi Achabia lokookeng a Kemuel. Lo ekitela a Aron ngesi Sadok.

¹⁸Lo a ekitela a Yuda ngesi Eliu lokaatokeng a ekapolon Daudi. Lo ekitela a Isakar ngesi Omri lokookeng a Mikael.

¹⁹Lo ekitela a Sebulun ngesi Ichimaya lokookeng a Obadia. Lo ekitela a Naputal ngesi Yerimos lokookeng a Asiriel.

²⁰Lo ekitela a Epiraim ngesi Ochea lokookeng a Asasia. Lo ekitela a Too Manase ngesi Yoel lokookeng a Pedaya.

²¹Lo ekitela a Kide Manase ngesi Ido lokookeng a Sekaria. Lo ekitela a Benjamen ngesi Yaasiel lokookeng a Abiner.

²²Lo ekitela a Dan ngesi Asarel lokookeng a Yeroam.

²³Nyimara ekapolon Daudi ngitunga lu aringa ngikaru kech nyenanga ngitomwon-arei, kotere ni echikakinitor Ekapolon Akuj atamar etalalae Ngisirael totiata ngikanyer lu eyakasi nadis.

²⁴ Yoab lo anyaritae itiokeng Seruya, abu kisiak akimar ngitunga nakaneni nyerumoro akimar daang. Kirira Akuj ngitunga kotere akimaret ngitunga ngina. Kotere ngakiro nguna, apon nyiigir etiae a ngitunga nakitabea a Daudi na arieng.

²⁵Eraakasi lugu ngirora a ngitunga alu aweikinito ngiboro a ekapolon. Asimapes lokookeng a Adiel ngesi awekinit ngikerui a ekapolon. Yonasan lokookeng a Usia ngesi aweikinit ngikerui luche.

²⁶Esiri lokookeng a Kelub ngesi aweikinit etich alomana.

²⁷Chimei lo abunit alo Rama ngesi aweikinit ngamanat a ngimusabib. Sabudi lo abunit alo Chepam ngesi aweikinit ngikerui a emuna.

²⁸Baal Anan lo abunit alo Geder ngesi aweikinit ngikito a akimiet ka ngikuno (lu eyakasi naukon na alo too). Yoach ngesi aweikinit ngikerui a akimiet a ngikito.

²⁹Chiritai lo abunit alo Charon ngesi aweikinit ngaatuk na ayakasi naro a Charon. Chapat lokookeng a Adilai ngesi aweikinit ngaatuk na ayakasi nadipoe.

³⁰Obil lo arai Echimailit ngesi aweikinit ngikaala. Yedeya lo abunit alo Meronos ngesi aweikinit ngisikiria.

³¹Yasis lo arai Egiriit ngesi aweikinit ngamesekin ka ngaanei. Araakasi ngulu daang ngitunga lu aweikinito ngiboro a ekapolon Daudi.

³²Amae keng a Daudi lo anyaritae Yonasan, arai eketutukon lokooson tarai itwaan ni esomat. Ngesi ka Yeyel lo arai lokookeng a Akimoni aweikinito akitatam ngide a ekapolon.

³³Aisopel arai eketutukon a ekapolon. Uchai lo arai Earikit arai lopaekeng a ekapolon.

³⁴Ani etoani Aisopel, toliworos Abiasar ka Yeoyada lo arai lokookeng a Benaya ngiketutukok a ekapolon. Yoab arai ekarikon a ngasigerea a ekapolon.