Read turkana 1 Ngakiro a Ngirwa 28 Bible Online

1 Ngakiro a Ngirwa 28 - turkana bible

1 Ngakiro a Ngirwa 28

¹Todung ekapolon Daudi atamar tochunakin ngikarikok a Ngisirael daang Yerusalem. Apot ngikarikok daang a ngajorei a ngitela, ka lu asubete etich anapolou, ka ngikarikok a ngajorei a ngimacharin ta lu aweikinito ngiboro ka ngibaren a ekapolon ka talokookeng, apot tochunakin. Daang lu asubete etich alokai a ekapolon, ka ngasigerea na ayenikinitae ta ngikiliok lu ayenikinitae daang, apot tochunakinos Yerusalem.

²Towo Daudi alongaren kech kisuruor ebala, “Ngikaitotoi ka ngitunga kang, topupokinae. Asaki ayong akiduk akai na esipokinio asaduku a Achamunet a Ekapolon Akuj, toliwor ni idokokinit Ekapolon Akuj na erai Akuj yok ngakejen keng. Arek ayong tani ngiboro lu adukokinea ngesi akai na edodikinea arimatoi.

³Nakaneni katolimok Akuj ayong tama, ‘Nyiduki iyong akai kotere ekiro kang kainyo ijii iyong ngijiesinei, ibuko ngaakot.’

⁴Tani ikoni neni, Ekapolon Akuj na erai Akuj a Isirael, kaseuni ayong ka ngalesea kang apolokin Isirael jik. Aseuni ngesi ekitela a Yuda toliwor ekapolon, ani alokitela a Yuda, toseu ngesi awi a apakang. Ani alotunga kadaang a awi kangina, abu tojoik ngesi akitiliwor ayong ekapolon a Isirael kadaang.

⁵ Kainak ngesi ayong ngide lusapa lukaalak. Ani alode kangulu kadaang, toseu ngesi Solomon apolokin Isirael na erai apolou a Ekapolon Akuj.

⁶“Katolimok Ekapolon akuj ayong tama, ‘Lokookon Solomon ngesi eduki akai kang. Aseu ayong ngesi toliwor lokookang, atoliwor ayong apakeng.

⁷Eturubi ayong apolou keng jik erai kirichak ngesi lokojokon akiwap ngitalio kang daang ka ngakiro na adunguni ayong loger lo esubea tokona.’

⁸“Tokona bocha ngitunga kang, alongaren Akuj yok ka Ngisirael daang lu echunakina nege, lu eraakasi ngitunga a Ekapolon akuj, kechikichiki esi atamar kiwapa lokojokon ngakiro daang nakidungok ngoni Ekapolon Akuj na erai Akuj yok, sodi torubakis esi ilomito nakwap naajokon naga, ani erumor kimiekineta nganaketa na isidiunosi kiruma jik.”

⁹Ani eliwor Solomon tolimok tama, “Lokoku, kechikichiki iyong atamar tacham Akuj a apakon tosub etich keng a etau kon kadaang, ka ngitamen kon daang. Eyeni ngesi ngakiro na itami iyong daang ka na iitanit. Ani kilot iyong nikeng, kichamuni ngesi iyong. Nakaneni ani kinger iyong ngesi, kiisikini ngesi iyong jik.

¹⁰Ejoikinit iyong iyeni atamar kiseu iyong Ekapolon Akuj toduk akai keng na italeunitoe. Totionik tokona akiduk akai ngina.”

¹¹Kidodik Daudi Solomon eger daang lo edukere akai a Akuj, ka ngikerui ta ngamaniyae nache ka ni italeunitoe noi, ni erimanakinere ngasechesea.

¹²Kidodik tani ngakiro daang na ayeni ngesi kotere akiduk ngataboi ka ngamaniyae na eriamito, ka ngikerui lu ewaanakinio ngiboro a akai a Akuj ka ngiboro lu italekinitoe Ekapolon Akuj.

¹³Kidodik Daudi ngesi tani eger lo itenanakinea ngimurok ka Ngilawi alosube ngitichisio kech, kidodik eger lo esubere etich alokai a Akuj, ka achoikin ngiboro a akai a Akuj daang.

¹⁴Tolimok ngesi etiae a akwangat ka egolit alu esubere ngiboro,

¹⁵kidodik ngesi etiae a egolit a ataa kadaang ka ni esiponokinio ataa,

¹⁶kidodik etiae a akwangat a ngimeesae alu a ngakwangae, ka etiae a egolit a emeesa alo iwaanakinio ngamugati na elemanakinio Akuj.

¹⁷Tolim ngesi tani etiae a egolit aloasegan alo esubere ngakichiera na ngikel a nguuni, ka ngatubwae nachukul, ka ngichupae. Tolimok etiae a akwangat ka egolit lo esubere ngatubwae,

¹⁸ka etiae a egolit aloasegan edukere ekeno lo inomeenere emitina. Kidodik ngesi tani eger lo esubere aurukuk kotere ngiborei lua ngabeben lu epetakinito ngabeben kech kidiama asaduku a Achamunet a Ekapolon Akuj.

¹⁹Tolim ekapolon Daudi tama, “Eyakasi ngakiro nugu daang ni igiritae ngakiro nakolong kalimokini ayong Ekapolon Akuj atamar tosubere etich.”

²⁰Tolimok ekapolon Daudi lokookeng tama, “Togogonger nabo totitinyer. Kisiak etich, wara ibore iche nyikiratak iyong. Ekapolon Akuj na erai Akuj, na asubi ayong etich keng, irukete ka iyong. Nyikiisikini ngesi iyong, nakaneni irukete ka iyong tanang irumori etich a akai kangina.

²¹Atiakakin ngimurok ka Ngilawi etich lo esubete alokai. Ngitunga daang lu eyenete akisub etich, imuit akingarakin iyong. Ngitunga daang ka ngikarikok kech, esubete ngakiro daang na idungokini iyong kesi atamar tosuba.”