Read turkana 1 Ngakiro a Ngirwa 29 Bible Online

1 Ngakiro a Ngirwa 29 - turkana bible

1 Ngakiro a Ngirwa 29

¹Tolimok ekapolon Daudi ngitunga daang ngakiro nugu tama, “Lokookang Solomon lo aseu Akuj, eringa edit, nyeyeni akisub etich lokojokon. Etiono etich lo esakio akisub kainyo meere eka akai a ekapolon alo erai itwaan, pearai erai akai a Ekapolon Akuj ana erai Akuj.

²Erichakin ayong asubak ngiboro daang a akai a Akuj, lu eraakasi egolit, ka akwangat, ka asuat nanyang, ka nakirion, ka ngakito ka ngamoru nakaalak a ngaropiyae ka asir, ka ngamoru nakookes na isiritoe ta nakabulitinei.

³Ani eyakasi ngiboro luche ngulu daang alemu ayong, alemu nabo ayong akwangat ka egolit lu eraakasi ngikang a ilope, kotere ni aminar ayong akai a Akuj.

⁴Alemu ayong egolit loajokon noi ngataanea a metirik na iporito amiat apei. Alemu akwangat naajokon noi ngataanea a metirik ngamiae ngaarei ka ngatomwon-omwon, kotere akitokorian ngikwaasea akai a Akuj,

⁵ ka nabo ngiboro daang lu esubete ngikadukok.”

⁶Apot ngikapolok a ngimacharin ka lua ngitela, ka ngikarikok a ngasigerea ta ngikaweikinak a ngiboro a ekapolon, tolemunos alemun

⁷ngiboro kotere etich a akai a Akuj. Araakasi ngiboro ngulu egolit ngataanea a metirik na eporito 170, ka akwangat ngataanea a metirik na eporito 340, ka asuat nanyang ngataanea a metirik 620 ta asuat nakirion ngataanea a metirik na eporito 3,400.

⁸Ani lu atingito ngamoru nakaalak a ngaropiyae kiwaakis ni iwaanakinio ngaropiyae a akai a Akuj, ni aweikinit Yeyel lo emachar a Ngilawi anyaritae Gerichom.

⁹Apot ngitunga tolemikis Ekapolon Akuj echamito. Talakaros kesi noi ani alemuneta ngiboro lukaalak. Abu ekapolon Daudi dang talakar lokojokon noi.

¹⁰Kipuruu ekapolon Daudi Ekapolon Akuj alongaren ngitunga daang. Tolim ngesi tama, “Ekapolon Akuj na irai Akuj a apaakosi Yakobo, kimiekisi iyong kipuruun jik!

¹¹Irai iyong nakiyenikinitae togogong tarai nakebusean, naajokon, topolot. Ibore daang ni eyei nadis ka nakwap erai ikon. Ee Ekapolon Akuj, ipol iyong idwangit daang.

¹²Erai ebari daang ka arimatoi ngikon. Ipolokinit iyong ibore daang a ngikilinga ka agogongu. Ipedori iyong akitiliwor itwaan ni eyenikinitae togogong.

¹³ Tokona Akuj kosi, kibuakinit iyong alakara, epuros ekiro kon lokebusean.

¹⁴“Tani ikoni neni, emam ibore kiinakini ayong ka ngitunga kang iyong, kainyo nikon ebunitor ibore kosi daang, nakaneni kibuak sua iyong ibore nisek erai ikon.

¹⁵Iyeni iyong Ekapolon Akuj atamar kitorit sua nakiyar naga loger a ngipeyok ka ngitunga a ngakwapea anache, loger lokolong kata apaakosi. Ikote ngirwa kosi etorube lo ipori, nyikipedori sua abuchar anakitu.

¹⁶Ee Ekapolon Akuj na irai Akuj kosi, kichun sua ebari logo daang adukio akai nakirimar ekiro kon lo italeunitoe, nakaneni abuni daang anikon, nabo erai ebari daang ekon.

¹⁷Ayeni ayong atamar itemit iyong etau a itwaan kadaang, nakaneni kijoikinito iyong ngitunga lu etenooko. Kalemik ayong iyong ngiboro lugu daang a ateneanut a etau kang, engolik tani ngitunga kon daang lu echunakina nege elakara ani ayauneta ngalemunet nikon.

¹⁸Ekapolon Akuj na irai Akuj kata apaakosi Aburaam, ka Isaka ta Yakobo, kitiliwo kare jiik ateneanut na ikoni naga na eyei agogongu alotai a ngitunga, toreeu iyong ngitai kech nikon jiik.

¹⁹Kingarak lokookang Solomon sodi kiitan a etau keng kadaang akirichakin ngitalio kon daang, nabo toduk akai na arekini ayong eger lo edukere daang.”

²⁰Abu Daudi todungok ngitunga tama, “Kipuruutu Ekapolon Akuj na erai Akuj kus!” Apot ngitunga daang kipuruut Akuj kata apaakech, toriediko sodi kidodikis Ekapolon Akuj arimatoi, kidodikis tani ekapolon kech arimatoi.

²¹Akolongit na atupit ngina, taara kesi ngibaren kipeyoto, kitaleut ani a Ekapolon Akuj, ani erumor nakis ngitunga tanyama. Apot nabo kipeyoto ngimongin abunget apei, ka ngimesekin abunget apei, ka ngimesekin luuchik abunget apei, kinoma nginerin daang a ngibaren kangulu alokeno. Apot kesi yaut tani emuna lo epuritoe erai ngakipeyos.

²²Sodi talakaros kesi noi akolongit ngina imujete tamaase alongaren Ekapolon Akuj. Kitiliwosi kesi Solomon ekapolon na ngaarei kidokakis akimiet a etal nakou alongaren Ekapolon Akuj, toliwor Sadok emuron.

²³Sodi kilunyokin Solomon nados naka apakeng toliwor ekapolon, anapolou ana kolong esiakini Ekapolon Akuj. Toliwor ngesi ekapolon lo esubi daang itemokino eriyan, sodi kiwapa Ngisirael daang ngakiro keng.

²⁴Ngikapolok a arieng daang, ka ngasigerea, ka talokookeng a Daudi luche, kichikichikas atamar kichamuni Solomon erai ekapolon.

²⁵ Kitowo Ekapolon Akuj ngitunga a akwap daang alongaren Solomon erimasi ngesi. Abu kitosegaan ngesi noi akidwang ekapolon eche daang lokolong sek kepolokinit Isirael.

²⁶Daudi lo arai lokookeng a Yese, apolokini Isirael daang

²⁷a ngikaru a ngitomwon-omwon. Arai ngesi ekapolon alo Eburon a ngikaru a ngikan-kaarei. Toliwor ekapolon alo Yerusalem a ngikaru a ngitomwon-uni ka nguuni.

²⁸Totoan ngesi akaalimon kemojong, tarai ekabaran lo arimae. Kilunyokin lokookeng Solomon nados keng toliwor ekapolon.

²⁹Ngakiro a ekapolon Daudi napei anakisiakinet tanang losal, igiritae nakitabea a ngikadwarak aluuni anyaritae Samuel, ka Nasan ta Gad.

³⁰ Idodiunito na igiritae nguna eger lo apolokinitor ngesi akwap, ka ajwonu keng ta ngakiro daang na asubakinosi anikeng, ka Ngisirael ta ngapolosio na edunyatar.