Read turkana 1 Ngakiro a Ngirwa 5 Bible Online

1 Ngakiro a Ngirwa 5 - turkana bible

1 Ngakiro a Ngirwa 5

¹Eraakasi nugu ngalesea a Reuben alo arai lokookeng a Yakobo loapolon. (Ani kona aperioto ngesi ka apese a ngabwes apei na arai aka apakeng, apon ngesi todemarae apolou a awi kech nakinae Yosep.

²Nakaneni arai ekitela a awi a Yuda abu toliwor lokajwon noi sodi toliwor nikeng aseunere ekapolon a ngitela kadaang.)

³ Reuben lo arai lokookeng a Yakobo loapolon, ayakasi ngide lusapa nguomwon lu anyaritae Anak, ka Palu, ka Esiron ta Karimi.

⁴Eraakasi nugu ngalesea a Yoel napei ananaket a apei tanang nache. Anyaritae lokookeng a Yoel Chemaya. Anyaritae lokookeng a Chemaya Gog. Anyaritae lokookeng a Gog Chimei.

⁵Anyaritae lokookeng a Chimei Mika. Anyaritae lokookeng a Mika Reya. Anyaritae lokookeng a Reya Baal.

⁶ Anyaritae lokookeng a Baal Beera. Ekapolon a Asiria lo anyaritae Tigilas Pileser, abu kirum Beera lo arai ekarikon a ekitela kangolo, toeniya nakwap ache.

⁷Ngirora a ngitunga alu araakasi ngikarikok a ngimacharin alokitela a Reuben kesi ta Yeiel, ka Sekaria

⁸ta Bela, lokookeng a Asas tarai etatait a Chema alo a emachar a Yoel. Alomito ngitunga a emachar kalo Aroer ka akwap na ayei too kaneni, tanang Nebo ka Baal Meon.

⁹Ayakasi kesi ngibaren lukaalak anakwap a Gilead. Kotere ngakiro nguna, apot kesi toloma nakwap na alo kide tanang nariet na eakarit enangit nangolol a Eupurate.

¹⁰Ngirwa lu araakar Saul ekapolon, apot ngitunga a ekitela a Reuben toremo Ngiagir taara, sodi toloma nakwap kech alo kide Gilead.

¹¹Alomito ngitunga a ekitela a Gad lowae lo alokwap ani alomito ngitunga a ekitela a Reuben. Alomito kesi ni enyaritae Bachan, tanang kide Saleka.

¹²Yoel ngesi arai ekarikon a emachar aloapolon. Chapan ngesi arai ekarikon a emachar alo atupit ngolo. Yanai ka Chapat araakasi ngikarikok a ngimacharin aluche alo Bachan.

¹³Ngitunga luche a ekitela a Gad, araakasi ngika ngimacharin alukan-kaarei enyaritae Mikael, ka Mechulam, ka Cheba, ka Yorai, ka Yakan, ka Sia ta Eber.

¹⁴Araakasi kesi ngalesea a Abiyail alo arai lokookeng a Uri. Ani iwapiyario nikolong etorunete, eraakasi taapaakech kesi lu anyaritae Abiyail, ka Uri, ka Yaroa, ka Gilead, ka Mikael, ka Yechichai, ka Yado ta Bus.

¹⁵Ai lo arai lokookeng a Abidiel, tarai etatait a Guni, ngesi arai ekapolon a ngitunga a ngimacharin kalu.

¹⁶Alomito kesi lorerea a ngakwapea a Bachan ka Gilead ta ni eyokiyo ngibaren alo Charon. (

¹⁷Egirio ngirora lugu ngirwa lua ekapolon Yosam alo a Yuda, ka ekapolon Yeroboam lo a Isirael.)

¹⁸Alotela a Reuben, ka Gad ta Too Manase, ayakasi ngasigerea 44,760 na etatamitae ajwore a ngaupwala, ka ngilengea ta ngakawa.

¹⁹Kitijwoto kesi ngitela a Ngiagir lu anyaritae Yetur, ka Napich ta Nodad.

²⁰Apot kesi kigienokinos Akuj sodi kilipa esakete atamar kingarak kesi. Abu Akuj kiira ngakilipasinei kech, sodi kidwanga ngitela ngulu Ngiagir ka ngitunga lu ebakito ka Ngiagir.

²¹Tangatasi kesi alomoe kech ngikaala 50,000, ka ngamesekin 250,000, ka ngisikiria 2,000 ta ngitunga 100,000 lu aenio torikoe.

²²Taara kesi ngimoe kech lukaalak kainyo arai ejie ngolo lo achamit Akuj. Apot kesi jik toloma nakwap ngina tanang ngirwa lu arikere[7] ngitunga.

²³Apot ngitunga a Kide Manase toloma nakwap a Bachan. Arai ni alomito kesi alowae alo alokwap Baal Erimon ka Senir ta emoru a Erimon. Apot kesi talalaketa noi.

²⁴Ngikapolok a ngatekerin kech kesi ta Eper, ka Ichi, ka Eliel, ka Asiriel, ka Yeremia, ka Odapia ta Yadiel. Araakasi kesi ngasigerea na ayenikinitae, taraakas ngikapolok a ngatekerin kech lu aruunito.

²⁵Nakaneni towout ngitunga amuno Akuj kata apaakech, sodi toisikis ngesi toliworos ilipito ngakujo a ngibukui alusek etwarakini Akuj anakwap kangina.

²⁶ Kotere ngakiro nguna, abu Akuj kitorem ekapolon anyaritae Pul akwap kech. Arai Pul ekapolon a akwap a Asiria. (Anyaritae ekiro keng eche Tigilas Pileser.) Kitwarak ekapolon ngolo ngitela a Reuben, ka Gad ta Kide Manase, sodi kitolom kesi jik ni enyaritae Ala, ka Abor ta Ara. Kitolom kesi tani diyete angolol a Gosan.