Read turkana 2 Ngakiro a Ngirwa 1 Bible Online

2 Ngakiro a Ngirwa 1 - turkana bible

2 Ngakiro a Ngirwa 1

¹Abu Solomon lo arai lokookeng a ekapolon Daudi kisiak apolou keng alo Isirael. Abu Ekapolon Akuj na erai Akuj keng topia ngesi kitiliwo lo eyenikinitae noi.

²Abu ekapolon Solomon kisuruor Ngisirael daang, ngulu araakasi ngikarikok a ngasigerea a abunget, ka amiat, ka ngikapolok a arieng daang, ka ngikapolok a ngawiyei daang ta ngitunga luche daang.

³Todungok kesi atamar kirukosi ka ngesi ni ilipeenere alo Gibeon. Toloto kesi inaa kainyo ayei eam a Akuj neni. Asubakini kolong Musa lo arai ekasuban etich a Ekapolon Akuj eam ngolo anariet. (

⁴Nakaneni ayei asaduku a achamunet a Akuj Yerusalem, ewaakinitae tooma loeam losek adukokini Daudi na ayaunea asaduku alo Kirias Yearim.)

⁵Ekeno a ngakipeyos lo a ngasua ananyangayek lo asubakini Besalel, ayei ngaren eam a Akuj alo Gibeon. Arai Besalel lokookeng a Uri tarai etatait a Ur. Apot Solomon ka ngitunga daang kilipa Ekapolon Akuj kaina.

⁶ Abu Solomon kipeyonok Ekapolon Akuj ngakipeyos alokeno alo a ngasua ananyangayek alongaren eam. Araakasi ngakipeyos nguna ngibaren abunget apei lu inomio nginerin daang.

⁷Akolongit ngina nakwaare, bu Akuj nia Solomon kingit tama, “Nyo isaki iyong kainak ayong iyong?”

⁸Tatachu Solomon tama, “Idodiunit kolong iyong jiik amina naationon anika apakang Daudi, nabo kimiek tokona ayong elunyokin lokicholong keng, atoliwor ekapolon.

⁹Ee, Ekapolon Akuj na irai Akuj, kiyook ngakiro nakolong ichikakini iyong apakang. Kitiliwo iyong ayong ekapolon a ngitunga alukaalak noi etia asinyen.

¹⁰ Nakinae robo aosou ka achwaanu atopolokinio kesi. Ani kemam, ekokini ayong apolokini ngitunga lukon kaalak lugu ai?”

¹¹Tatachak Akuj Solomon tama, “Iseu iyong ibore niajokon. Akidwang iyong akisak ebari kori ngiboro luajokak, kori ekipur, kori akitu a ngimoe kon, kori tani ngirwa kon lu iyarea kiatakinae, ilimu iyong atamar isaki aosou ka achwaanu topolokinio ngitunga kang, lu ketiliwo ayong iyong ekapolon kech.

¹² Kainakini ayong iyong aosou ka achwaanu. Kainakini nabo dang ebari ka ngiboro luajokak ta ekipur akidwang ngikapolok daang lukolong engarenete iyong ka lu isidiunosi.”

¹³Sodi torotok Solomon ani elipeenere alo Gibeon, ani ayei eam a Akuj, sodi tobongo Yerusalem. Topolok ngesi Ngisirael kaneni.

¹⁴Tochunak Solomon ngaurukukui na irito ngangolei abunget apei ka ngamiae ngoomwon ka ngasigerea nakameak ngangolei ngabunge ngatomon ka ngaarei. Kiwaak ngesi ngiche kech Yerusalem, sodi kiwaak ngiche lorerea lugelagelae.

¹⁵Ngirwa lu araakar Solomon ekapolon, asojunito ngasua nakwangae alo Yerusalem loger a ngalup. Alalak nabo ngakito a ngichekereng loger lo elalakeata ngikuno anaukon.

¹⁶Aweikinito ngimuchurus a ekapolon Solomon egielit a ngangolei ana ayauniyo alo Musiri ka Kilikia,[1]

¹⁷ ka ngaurukukui na eriuniyo alo Misiri. Agielanakinete kesi ngikapolok a Ngiiti ka Siria aurukuk apei ngakiloi ngakan-kapei a ngaropiyae, ani ngangolei ngakiloi 1.5 a ngaropiyae.