Read turkana 2 Ngakiro a Ngirwa 11 Bible Online

2 Ngakiro a Ngirwa 11 - turkana bible

2 Ngakiro a Ngirwa 11

¹Ani enanguni Reoboam Yerusalem, tochunak ngitunga a ngitela a Yuda ka Benjamen lu araakasi ngasigerea nakajwok 180,000. Asaki ngesi alosit akitijwore ngitela lua lokwap Isirael topolokinio kesi nabo.

²Nakaneni kisuruor Akuj ekadwaran Chemaya tama,

³“Tolimok Reoboam lokookeng a Solomon, lo erai ekapolon a Yuda, tolimok tani ngitunga daang a ngitela a Yuda ka Benjamen kona,

⁴‘Ebala Ekapolon Akuj esi nyiitijikis Ngisirael lu eraakasi ngiyenet kus. Kapesi esi daang nawiyei kainyo eraakasi ngakiro na asubakin ngakang.’ ” Kiirasi kesi ngakiro na adunguni Ekapolon Akuj, nyeelot akitijwore Yeroboam.

⁵Tolom Reoboam Yerusalem sodi toduk ngawasea a ngirerea kalu anakwap a Yuda ka Benjamen.

⁶Toduk Betleem, ka Etam, ka Tekoa

⁷ka Betsur, ka Soko, ka Adulam,

⁸ka Gas, ka Marecha, ka Sip,

⁹ka Adoraim, ka Lakich, ka Aseka,

¹⁰ka Sora, ka Aijalon ta Eburon.

¹¹Toduk ngesi ngawasea a ngirerea kangulu lokojokon kitogogong. Toseu ngesi ngikarikok a ngasigerea ngipei-pei kiwaanak lorerea ngulu. Kiwaanak nabo lorerea ngulu ngikerui a akimuj, ka akimiet ta emuna.

¹²Kiwaak tani ngaupwala ka ngakwaaras. A eger kangolo, abu ngesi topolok Yuda ka Benjamen.

¹³Apot ngimurok a Akuj ka Ngilawi lu ayakasi nakwap a Isirael daang toloto kuju, nakwap a Yuda.

¹⁴Kimiekis Ngilawi ngakwapea kech na iyokiyo ngibaren ka ngakwapea nache, sodi toloto Yuda ka Yerusalem, kainyo apot Yeroboam ka talokookeng kitengero Ngilawi akisub etich eraakasi ngimurok a Akuj.

¹⁵Toseu Yeroboam ngimurok keng a ilope tosuba etich ani ilipitere ngakujo nagelayek, ka akilip ngipean ta ngakujo na asubunit ngesi isikwaanit ka ngitak lukiliok.

¹⁶Alotela kadaang a Ngisirael, apot ngitunga lu amunokinito akilip Ekapolon Akuj na erai Akuj a Ngisirael, kiwapakis Ngilawi toloto Yerusalem akipeyonokin Ekapolon Akuj na erai Akuj kata apaakech.

¹⁷ Abu apolou a Yuda kisikokin kotere ngakiro nguna. Apot kesi kibaka alowae a Reoboam alo arai lokookeng a Solomon a ngikaru a nguuni. Kibooyoto kesi a ngikaru a nguuni loger a ngirwa alu kolong araakatar Daudi ka Solomon ngikapolok.

¹⁸Eusi Reoboam aberu na anyaritae Maalas na arai nakookeng a Yerimos alo arai lokookeng a Daudi. Itiokeng a Maalas ngesi Abiyail na arai nakookeng a Eliab tarai atatait a Yese.

¹⁹Kidou Maalas ngide lusapa nguuni lu anyaritae Yeuch, ka Chemaria ta Saam.

²⁰Ani ekisidi kiut Reoboam Maaka na arai nakookeng a Abusalom. Kidou aberu ngina ngide lusapa nguomwon lu anyaritae Abija, ka Atai ka Sisa ta Chelomis.

²¹Araakasi ngaberu a Reoboam nakuuta ngatomon ka ngakan-kauni, taraakas ngapesur a ngabwes ngatomwon-kapei. Araakasi talokookeng ngitomwon-arei ka ngikan-kauni, taraakas tanakookeng ngatomwon-kapei. Anaberu keng kadaang, amina ngesi Maaka na arai nakookeng a Abusalom noi.

²²Amina Reoboam lokookeng a Maaka lo anyaritae Abija akidwang ngide keng daang. Asaki ngesi edia ngolo kilunyokin nados keng ekisidi toliwor ekapolon.

²³Abu Reoboam totiakanak talokookeng ngitichisio a eger alo a aosou. Kiwaak ngesi talokookeng wadaang a akwap a Yuda ka Benjamen, lorerea lu adukitoe ngawasea. Nak ngesi kesi ngiboro lukaalak a apatanu, tasakak nabo ngaberu nakaalak.