Read turkana 2 Ngakiro a Ngirwa 12 Bible Online

2 Ngakiro a Ngirwa 12 - turkana bible

2 Ngakiro a Ngirwa 12

¹Napei esikokinor apolou a Reoboam togogonger, apot ngesi ka Ngisirael daang toisikis etal a Ekapolon Akuj.

²Ekaru lo a ngikan lo araakar Reoboam ekapolon, apon kesi kirirae ani peamunotor Ekapolon Akuj. Abu Chichak lo arai ekapolon a Misiri kitijik Yerusalem,

³erukito ka ngaurukukui na iritae 1,200, ka ngikameak ngangolei 60,000 ka ngasigerea nakaalak na nyimarun, erukito aapei ka ngasigerea a ngitunga a Libia, ka lua Suk ta lua Kuch.*g**

⁴Abu Chichak tolema ngirerea a Yuda lu adukitoe ngawasea nakaagongok, tolot ngaren tanang Yerusalem.

⁵Sodi tolot ekadwaran Chemaya nia ekapolon Reoboam ka ngikarikok a Yuda lu achunakina Yerusalem esakete abuchar ani a Chichak. Tolimok Chemaya kesi tama, “Ebala Ekapolon Akuj kona, ‘Kiisikis esi ayong. Aloger kangolo, kaisikinea ayong dang esi Chichak.’ ”

⁶Apot ekapolon ka ngikarikok tachamut atamar kisechit kesi, sodi tolimut tamasi, “Etenooko ngakiro na esubi Ekapolon Akuj.”

⁷Ani ingolikini Ekapolon Akuj atamar etiditeunosi kesi, abu ngesi kisuruor Chemaya tama, “Aloger achamuneta kesi akisech kech, nyerirae ayong kesi lokojokon. Nyebuni angoit kang towan Yerusalem,

⁸ nakaneni idwangi Chichak kesi, toyeneta atamar etiakak akisub etich kang ka akisub etich a ngikapolok a ngakwapea.”

⁹Bu Chichak lo arai ekapolon a Misiri Yerusalem, sodi tolema ebari a akai a Akuj ka lo a akai a ekapolon. Tolema ngesi ibore daang aapei ka ngaupwala na egolit nakolong asubakini Solomon.

¹⁰Tosubak ekapolon Reoboam ngaupwala ngache anasua ananyangayek kilunyok nados ana alemario. Nak ngesi ngaupwala nguna ngasigerea na eyokiyete ngidorin totinga.

¹¹Toliwor nacha elosio ekapolon kai a Akuj, totinga ngasigerea nguna ngaupwala, ani erumor tobuasi kai na eyokiyete kesi ngidorin.

¹²Ani aloger etiditeunor ngesi ani a Ekapolon Akuj, abu angoit a Ekapolon Akuj nyeemunya ngesi jik, nakaneni apot ngakiro tojoketa ani a Yuda.

¹³Abu apolou a Reoboam kisikokin alo Yerusalem. Araakasi ngikaru keng ngitomwon-omwon ka epei na aliworor ekapolon. Toliwor ngesi ekapolon a ngikaru a ngitomon ka ngikan-kaarei alore a Yerusalem, alo aseuni Ekapolon Akuj anakwap a Isirael kadaang toliwor ilipeenere ngesi. Anyaritae itiokeng a Reoboam Naama. Arai aka akwap a Amon.

¹⁴Tosech Reoboam kainyo nyesaka akisub ngakiro na esaki Ekapolon Akuj.

¹⁵Ngakiro na asubi Reoboam daang napei anakisiakinet tanang losal, ka ngakiro a awi keng, igiritae nakitab na enyaritae Ngakiro a ekadwaran Chemaya, ka nakitab na enyaritae Ngakiro a ekadwaran Ido. Ajienete Reoboam ka Yeroboam jiik.

¹⁶Totoan Reoboam tonukakinae nalielin na ngikapolok eyakasi lore a Daudi, sodi abu lokookeng Abija kilunyokin nados keng toliwor ekapolon.