Read turkana 2 Ngakiro a Ngirwa 13 Bible Online

2 Ngakiro a Ngirwa 13 - turkana bible

2 Ngakiro a Ngirwa 13

¹Ekaru lo a ngitomon ka ngikan-kauni lo araakar Yeroboam ekapolon a Isirael, toliwor Abija ekapolon a Yuda.

²Toliwor ngesi ekapolon a ngikaru a nguuni alo Yerusalem. Anyaritae itiokeng Mikaya na arai nakookeng a Uriel, na abunit alore a Gibea. Tojikinos Abija ka Yeroboam.

³Ayakasi Abija ngasigerea nakajwok 400,000. Kitijik Yeroboam ngesi erikit ngasigerea nakajwok 800,000.

⁴Kiriamun ngasigerea nakwap na ngimukur a Epiraim. Todoka ekapolon Abija kidiama emoru a Semaraim tama, “Iyong Yeroboam ka Ngisirael daang, topupokisi mono esi!

⁵Nyiyenete esi atamar achamakinosi kolong Ekapolon Akuj na erai Akuj a Ngisirael ka Daudi kikong Akuj jik na ebala eliworosi Daudi ka ngalesea keng ngikapolok jik a?

⁶Abu Yeroboam lokookeng a Nebat tonger Solomon lo arai ekapolon keng.

⁷Ani ekisidi tochunak Yeroboam ngirukooi lupasiek sodi kitopega Reoboam lokookeng a Solomon. Aringa Reoboam edit nyeyena ngakiro. Peapedori akikotar kesi.

⁸Isakete tokona esi akitijwore apolou na ainaki Ekapolon Akuj ngalesea a Daudi, ani irikitotor ngasigerea nakaalak, ka nabo ni itingitotor ngitak lukiliok lu esubunitae alogolit, lukolong asubakini Yeroboam toliworos ngakujo kus a?

⁹Iritarete kolong esi ngimurok a Akuj lu araakasi ngalesea a Aron, kiritasi tani Ngilawi, sodi toseut ngimurok kus loger a ngibukui alugelayek. Toliwor itwaan cha daang ni eyauni emong kori ngimesekin ngikan-kaarei epedori akitaleun toliwor emuron a ngakujo ana nyeraakasi ngakujo.

¹⁰“Nakaneni eringa sua kisubi etich a Ekapolon Akuj ana erai Akuj kosi, nyengero sua ngesi. Eyakasi sua ngimurok lu eraakasi ngalesea a Aron, kesi esubete etich eraakasi ngimurok a Akuj. Ingarakinito Ngilawi kesi.

¹¹Ipeyonokinete kesi Ekapolon Akuj ataparach daang ka atabong daang emitina ka ngakipeyos na inomio nginerin daang. Elemuunete kesi ngalemunet a ngamugati alomeesa alo italeunitoe. Atabong daang, inokanakinete kesi ngataae anasipet a egolit. Kirichakinit sua ngakiro na edungunit Ekapolon Akuj, nakaneni ingero esi ngesi.

¹²Akuj alope erai akarikon kosi, toyakas ngimurok keng nege etingito ngaburucho esakete akutakin kitanyaraata sua atojikin ka esi. Ekoe Ngisirael, nyiitijwoto Ekapolon Akuj na erai Akuj kata apaakus! Nyidwangete esi!”

¹³Abu Yeroboam tomea ngajorei keng ngache kituumwokis ngasigerea a Yuda anaabor, toyakas nache lowae lo alongaren.

¹⁴Ani ingoliarete ngitunga a Yuda, kingolikis ajore kiriam kesi. Kikaloikis kesi Ekapolon Akuj esakete akingarakino, sodi tokutakis ngimurok ngaburucho.

¹⁵Kiremasi ngitunga a Yuda lokojokon. Torik Abija kesi kisiakis ejie. Kidwang Akuj Yeroboam ka ngasigerea a Ngisirael.

¹⁶Tamataros Ngisirael ani a ngitunga a Yuda. Kimiek Ekapolon Akuj ngitunga a Yuda idwangete kesi.

¹⁷Apot Abija ka ngitunga keng taara Ngisirael lukaalak. Taarae ngasigerea a Ngisirael nakajwok 500,000.

¹⁸Apot ngitunga a Yuda kidwanga Ngisirael kainyo egienosi kesi Ekapolon Akuj na erai Akuj kata apaakech.

¹⁹Abu Abija kiwap Yeroboam sodi todema ngirerea keng ngiche lu enyaritae Besel, ka Yechana ta Epiron, ka ngadakarin na edunyatar ngirerea ngulu.

²⁰Abu apolou a Yeroboam nyiisikokin nabo jik ngirwa lu araakar Abija ekapolon. Ani ekisidi, taram Ekapolon Akuj Yeroboam taar.

²¹Toliwor Abija lo eyenikinitae. Arikit ngesi ngaberu ngatomon ka ngoomwon. Araakasi ngide keng lusapa ngitomwon-arei ka ngiarei, taraakas lupesur ngitomon ka ngikan-kapei.

²²Ngakiro nache a Abija, na eruoro ngesi ka na asubi, igiritae nakitab na enyaritae Ngakiro a ekadwaran Ido.