Read turkana 2 Ngakiro a Ngirwa 14 Bible Online

2 Ngakiro a Ngirwa 14 - turkana bible

2 Ngakiro a Ngirwa 14

¹Totoan ekapolon Abija tonukakinae nalielin a ngikapolok na eyakasi lore a Daudi. Kilunyokin lokookeng lo anyaritae Asa nados keng toliwor ekapolon. Ngirwa ngulu, min ekisil nakwap a ngikaru a ngitomon.

²Kitalaka Asa Ekapolon Akuj na erai Akuj keng tosub ngakiro na eyookino tojokak anakonyen a Ekapolon Akuj.

³Tolema ngesi ngikenoi a ngakipeyos a ngakujo anagelayek ka ni ilipeenere. Tobwangabwanga ngesi ngapirio ka atubutub ngakisikwaanet a akuj anaberu enyaritae Achera.*g**

⁴Todungok ngesi ngitunga a Yuda atamar tosuba ngakiro na esaki Ekapolon Akuj na erai Akuj kata apaakech, ka akiwap ngakitatamet keng ka ngitalio.

⁵Ngirwa lu araakar Asa ekapolon, min ekisil nakwap kainyo abu ngesi tolema ni ilipeenere ngakujo nagelayek ka ngikenoi kech lukinomet emitina, sodi kipudo alorerea kadaang a Yuda.

⁶Toduk ngawasea nakaagongok a ngirerea a Yuda ngirwa ngulu. Amam ejie ayei kainyo abu Ekapolon Akuj nak ngesi ekisil.

⁷Tolimok ngesi ngitunga a Yuda tama, “Potu atoduko ngirerea lugu, atodukokisi ngawasea, ka ngipemin ta ngidorin lu elegerio ngakilori. Erai akwap ayok kainyo kisub ngoni nguna esaki Ekapolon Akuj na erai Akuj yok. Kiyok ngesi ngoni nabo eratak ejie alowaitin kadaang.” Apot kesi toduko, kisikokin eboyor kech.

⁸Ayakasi ekapolon Asa ngasigerea 300,000 na aponito alo Yuda na atingito ngaupwala ka ngakwaaras. Ayakasi nabo ngasigerea 280,000 na aponito anakwap a Benjamen na atingito ngaupwala ka agumanar ngimalea a amod. Araakasi ngitunga ngulu daang lukajwok lu ekileenikinit.

⁹Abu itwaan a akwap a Kuch ni anyaritae Sera torem Yuda erikit ngasigerea amilion apei ka ngaurukukui na irito ngangolei ngamiae ngauni. Torem tanang Marecha.

¹⁰Tolot Asa kisiriamia ngesi, kibaka kesi anadipo a Sepata, alodiyete Marecha.

¹¹Kilip Asa Ekapolon Akuj na erai Akuj keng ebala, “Ee Ekapolon Akuj, ipedori iyong kingarak ajore na nyejwono ka na ejwono. Ee Ekapolon Akuj na irai Akuj kosi, kingarakinae sua tokona, kainyo kigieno sua iyong. Erai iyong kiponitor sua akitijwore ajore natikaalan naga. Ekapolon Akuj, irai iyong Akuj kosi. Wara itwaan nyikidwang iyong.”

¹²Kidwang Ekapolon Akuj ngasigerea a Kuch na etijikinioto Asa ka ngasigerea a Yuda, sodi tamataros.

¹³Kiwapakis Asa ka ngajorei keng tananga Gerar. Taarae ngitunga a Kuch lukaalak tokuruwo tani achunakin nabo tojwoto.[8] Abu Ekapolon Akuj ka ngasigerea keng kidwanga kesi, sodi tangatasi ngasigerea ngiboro lukaalak.

¹⁴Kinyasut kesi ngirerea daang lu edunyatar Gerar, kainyo akerito ngitunga kaneni Ekapolon Akuj. Todemasi ngasigerea ngitunga ngiboro alorerea kangulu kadaang, tangatasi ngiboro lukaalak noi.

¹⁵Apot kesi kitijikis tani ngadakarin a ngikeyokok a ngiche, tolemasi ngamesekin nakaalak ka ngikaala. Ani erumor tobongosi Yerusalem.