Read turkana 2 Ngakiro a Ngirwa 15 Bible Online

2 Ngakiro a Ngirwa 15 - turkana bible

2 Ngakiro a Ngirwa 15

¹Min etau a Akuj nia Asaria lokookeng a Oded,

²sodi tolot ngesi aanyun ekapolon Asa tolimok tama, “Topupok ngakiro kang, iyong Asa ka ngitunga daang a Yuda ta lua Benjamen! Erukito Ekapolon Akuj ka esi erai kirukito esi ka ngesi. Ani kisak esi ngesi, ianyunete. Nakaneni ani kiisikis esi ngesi, kiisikini ngesi esi.

³Ebooyoto Ngisirael nikooyen emam Akuj na iteni, ka ngimurok lu itatamete kesi tamam etal.

⁴Nakaneni ani eanyunete kesi ngichan, apot toreas nia Ekapolon Akuj ana erai Akuj a Ngisirael. Tasaka kesi ngesi sodi taanyut.

⁵Ngirwa ngulu, amam itwaan apedori abunere ka arotokin a ekisil, kainyo ayakasi ngichan ka ekurikur nakwapea daang.

⁶Toliwor akwap apei ichiekiari nache, toliwor ere epei ichiekiari loche, kainyo abu Akuj inu kesi ngichan ka ngakiro naaronok.

⁷Nakaneni ejoikinit iyong ititinyer! Nyiilout ngakiro etau, kainyo kiinakinio ebachit kotere etich lo isubi iyong.”

⁸Ani iirari Asa ngakiro na adwari Asaria lokookeng a Oded, abu etau keng topwatun. Abu ngesi tachaka ngakujo nasubuna daang na ayakasi nakwapea a Yuda ka Benjamen, ka ngakujo nasubuna daang na angatari alorerea alu kolong alemari ngesi anakwap ana ngimukur a Epiraim. Tobongonok ngesi akiduk ekeno a ngakipeyos losek adukokinitae tooma alaar a akai a Akuj.

⁹Aponito sek ngitunga lukaalak lowae a Asa alo Epiraim, ka Manase ta Simeon, sodi toloma kesi nakwap na apolokinit Asa, kainyo apot kesi kingolikis atamar erukito Ekapolon Akuj ka Asa. Tanyara Asa kesi daang ka ngitunga a Yuda ka Benjamen.

¹⁰Tochunakinos kesi Yerusalem elap lo a nguuni ekaru loa ngitomon ka ngikan lo araakar Asa ekapolon.

¹¹Akolongit ngina, apot kesi tolemikis Ekapolon Akuj ngakipeyos alobaren alu abuunete kesi alu araakasi ngaatuk ngamiae ngakan-kaarei ka ngamesekin ngabunge ngakan-kaarei.

¹²Apot kesi tachamakin atamar kilipi Ekapolon Akuj na erai Akuj kata apaakech a ngitai kech kadaang ka akiyar kech daang.

¹³Itwaan daang ni nyilipi Ekapolon Akuj, eario, kesorokona kori kemojongit, kerai ikile kori iberu.

¹⁴Apot kesi kikongo alokiro a Ekapolon Akuj iremasi, ka achala, ka akutakin ngaburucho ta ngaamwar.

¹⁵Apot ngitunga a Yuda daang talakaros kotere akikong ngina, kainyo apot kesi kikongo a ngitai kech kadaang, nabo apot kesi tasaka Ekapolon Akuj dir. Apot kesi taanyut Ekapolon Akuj, sodi nak Akuj kesi ekisil lo eriami kesi.

¹⁶Abu ekapolon Asa tolema ataakeng na anyaritae Maaka tojongo araakau akimat nakapolon, kainyo asubunit ngesi ekisikwaane lokikadakini a Achera.*g** Touko Asa ekisikwaane ngolo totubutubu kinom anadipo a Kidiron.

¹⁷Tani pekinyasunit Asa ngiwaitin daang lu elipeenere ngakujo nagelayek alo Isirael, arai ngesi lo amam ibore asechit ngirwa daang lu ayarea ngesi.

¹⁸Abu ngesi kiwaak tooma akai a Akuj ngiboro daang lu kolong ekongi apakeng Abija atamar toliworos ngika Akuj. Kiwaak tani ngiboro lua egolit ka lukwangae lu ekongitor ngesi ilope.

¹⁹Emam nabo ejie amin nakwap tanang ekaru loa ngitomwon-uni ka ngikan lo araakar ngesi ekapolon.