Read turkana 2 Ngakiro a Ngirwa 16 Bible Online

2 Ngakiro a Ngirwa 16 - turkana bible

2 Ngakiro a Ngirwa 16

¹Ekaru lo a ngitomwon-uni ka ngikan-kapei lo araakar Asa ekapolon a Yuda, abu Baacha lo arai ekapolon a Isirael torem Yuda, kisiak akiduk awas Rama sodi kiratakinea ngikalotok daang lu elomete ka apudor alo Yuda.

²Sodi tolem Asa ngakwangae ka egolit alobari a akai a Akuj ka lo a akai a ekapolon sodi tomea ngitunga yaasi Damasko nia Benadad alo arai ekapolon a Siria ebala,

³“Kimiek atachamakin loger lokolong achamatar taapayok. Eraakasi ngakwangae nugu ka egolit logo ngainakinet kon. Tongeros tokona ka Baacha lo erai ekapolon a Isirael, sodi tolemarea ngesi ngajorei keng anakwap kang.”

⁴Tacham Benadad ngakiro a Asa sodi tomea ngikarikok a ngasigerea keng ka ngasigerea kech akitijikin ngirerea a Isirael. Tolemasi kesi ngirerea lu enyaritae Ijon, ka Dan, ka Abel Bes Maaka ta ngirerea a akwap a Naputal daang lu ekachanakinio ngiboro.

⁵Ani iirari ekapolon Baacha ngakiro nguna, tojongo akiduk ngawasea Rama dio aisikin etich ngolo.

⁶Sodi tochunak ekapolon Asa ngitunga alo Yuda kadaang todungok atamar tolemasi ngamoru ka ngakito nasek adukio Baacha alo Rama. Tolemut kesi ngamoru ka ngakito nguna sodi todukioto ngirerea a Geba ka Misipa.

⁷Ngirwa ngulu, tolot ekadwaran Anani nia ekapolon Asa tolimok tama, “Aloger igienokinor iyong ekapolon a Siria akidwang akigienokin Ekapolon Akuj na erai Akuj kon, abucharosi ngasigerea a ekapolon a Isirael[9] anikon.

⁸Ikwa pealalak kolong ngajorei a Kuch ka Libia, toyakas ngaurukukui na iritae ka ngikameak ngangolei lukaalak a? Abu Ekapolon Akuj kisidwang iyong kesi kainyo igienokino iyong ngesi.

⁹Iyoki Ekapolon Akuj akwap daang, sodi kitogogong ngulu emunosi ngesi. Ani aloger isubakinea iyong ngakiro na abangaanut nugu, napei tokona jik, iliwor iyong itwaan a ejie.”

¹⁰Abu Asa tongoik ekadwaran ngolo kotere ngakiro nguna, sodi toen ngesi alojela. Ngirwa ngulu kesi esiakinea Asa aboliar ngitunga ngiche.

¹¹Ngakiro daang nakolong asubi Asa anapolou keng napei anakisiakinet tanang losal, igiritae nakitab na enyaritae Ngakiro a ngikapolok a Yuda ka Isirael.

¹²Ekaru lo a ngitomwon-uni ka ngikan-koomwon lo araakar Asa ekapolon, abu edeke a ngakejen kingwal ngesi. Tani alodeke kangolo, abu ngesi nyeelot nia Ekapolon Akuj, pearai abu tolot lomurok.

¹³Adaunet a ngikaru a ngiarei, abu ngesi totoan

¹⁴tonukakinae naliel keng nasek akulakinit ngesi nataaba alore a Daudi. Apot kesi tolemut ngikito lukakukunyok ka ngamieta nakakukunyok kiwasakis nakwaan keng tonuketa. Kirirakis kesi akim natiapolon kigorotor ngesi esutonokinete.