Read turkana 2 Ngakiro a Ngirwa 17 Bible Online

2 Ngakiro a Ngirwa 17 - turkana bible

2 Ngakiro a Ngirwa 17

¹Kilunyokin Yeochapat nados a apakeng Asa toliwor ekapolon, sodi kitogogong angerit keng Isirael.

²Kiwaak ngesi ngajorei keng lorerea a Yuda lu adukitoe ngawasea anakwap a Yuda, ka ngirerea lusek alemarit Asa anakwap a Epiraim.

³Topia Ekapolon Akuj Yeochapat kainyo abu ngesi kiwap eboyor a apakeng lo ekingaren, nyilipa ngesi Baal.

⁴Tosub ngesi etich a Akuj anaka apakeng, kiwap ngitalio a Akuj. Nyesuba ngesi ngakiro nasek asubete ngikapolok a Isirael.

⁵Abu Ekapolon Akuj nak Yeochapat apolou na isikokina alo Yuda. Inut ngitunga daang ngesi ngainakinet sodi toliwor ngesi ekabaran nabo lo erimae lokojokon.

⁶Abu ngesi totitinyer anakisub etich a Ekapolon Akuj, sodi kinyasu ngesi wadaang ni elipeenere ngakujo nagelayek, nabo kinyasu ngakisikwaanet a akuj anaberu enyaritae Achera alo Yuda.

⁷Ekaru lo a nguuni a apolou keng, abu ngesi tomea ngikapolok a arieng keng akitatam alorerea a Yuda. Anyaritae ngikapolok ngulu Benail, ka Obadia, ka Sekaria, ka Nesanel ta Mikaya.

⁸Kirukosi kesi ka Ngilawi ngikan-koomwon ta ngimurok a Akuj ngiarei. Anyaritae Ngilawi ngulu Chemaya, ka Nesania, ka Sebadia, ka Asael, ka Chemiramos, ka Yeonasan, ka Adonija, ka Tobija ta Tobadonija. Anyaritae ngimurok Elichama ka Yeoram.

⁹Totinga kesi akitab a etal a Ekapolon Akuj toloto lorerea a Yuda daang itatamete ngitunga Etal.

¹⁰Kitoem Ekapolon Akuj ngapolosio na edunyatar Yuda daang toema akitijikin Yeochapat.

¹¹Apot Ngipilisti ngiche inut Yeochapat ngakwangae nakaalak ka ngainakinet ngache. Inut nabo Ngimwaarabui ngiche ngesi ngamesekin 7,700 ka ngaanei 7,700.

¹²Toliwor Yeochapat lo eyenikinitae noi. Toduk ngesi ngawasea wadaang a akwap a Yuda ka ngirerea

¹³lu ekachio akimuj nakaalan.

¹⁴Kiwaak ngesi ngasigerea na eyenikinitae nakajwok Yerusalem, torek a ngimacharin kech. Adina ngesi arai ekarikon a ngajorei a ngimacharin a ekitela a Yuda. Arikit ngesi ngasigerea 300,000.

¹⁵Lo atupit Adina ngesi Yewanan lo arikit ngasigerea 280,000.

¹⁶Totupak Amasia lokookeng a Sikiri lo arikit ngasigerea 200,000. (Alemuna Amasia akisub etich a Ekapolon Akuj.)

¹⁷Eliada ngesi arikit ngajorei a ngimacharin a ekitela a Benjamen. Arai ngesi lokajwon. Arikit ngesi ngasigerea 200,000 na atingito ngaupwala ka ngakawa.

¹⁸Lo atupit Eliada ngesi Yeosabad lo arikit ngasigerea 180,000 na atingito ngiboro kech a ejie.

¹⁹Asubete ngitunga ngulu etich a ekapolon alo Yerusalem, toyakas ngasigerea nache nasek ewaakinit ekapolon lorerea luche lu adukitoe ngawasea alo Yuda.