Read turkana 2 Ngakiro a Ngirwa 18 Bible Online

2 Ngakiro a Ngirwa 18 - turkana bible

2 Ngakiro a Ngirwa 18

¹Ani eliwor Yeochapat lo arai ekapolon a Yuda ekabaran lo ipuruunitoe, tachamakin ngesi ka Aab lo arai ekapolon a Isirael atamar iutasi itwaan a awi a Yeochapat ka ni awi a Aab.

²Adaunet a ngikaru a ngiche, tolot Yeochapat Samaria nia Aab. Abu Aab taarak Yeochapat ka ngitunga lu arukitotor ngamesekin nakaalak ka ngaatuk tanyama ngitunga. Kimaima Aab Yeochapat esaki kirukosi ka ngesi toremo ere a Ramos alo Gilead.

³Tolimok Aab Yeochapat tama, “Ibuni iyong erukosi etijikisi Ramos a?” Tatachu Yeochapat tama, “Anyouni ayong esaa daang lo inyounio iyong. Ngasigerea kang dang enyounito. Kirukori sua ka iyong.”

⁴Sodi tolim nabo Yeochapat tama, “Nakaneni kimiek mono engitutu Ekapolon Akuj ngakiro nugu.”

⁵Sodi tochunak Aab ngikadwarak luko asibit ngamiae ngoomwon kingit tama, “Alosi etijik Ramos kori nyalosi?” Tatachut ngikadwarak tamasi, “Kape. Kisidwangi Ekapolon Akuj iyong.”

⁶Nakaneni kingis Yeochapat tama, “Emam nege ekadwaran a Ekapolon Akuj lo kipedori ngoni akingit a?”

⁷Tatachu Aab tama, “Eringa eyei itwaan ipei ni kipedori ngoni akingit ngakiro a Ekapolon Akuj. Enyaritae ngesi Mikaya lokookeng a Imula. Nakaneni aremokino ayong ngesi kainyo nyedwareene ngesi ngakiro naajokak anikang, pearai naaronok jiik.” Tolim Yeochapat tama, “Nyejoikinit iyong ilimuni kongina.”

⁸Sodi tanyarau Aab epei a ngikapolok a arieng keng tolimok tama, “Kape toriku Mikaya lokookeng a Imula nege atipei.”

⁹Ebooyete ngikapolok luarei ngulu alokicholongo kech a apolou, enapito ngiworui lukooyak a ngikapolok. Ebooyete kesi anidaet ngalemet anikalapatan ekidor a ere a Samaria. Ayakasi ngikadwarak daang neni adwarete alongaren ngikapolok ngulu.

¹⁰Abu epei kech lo anyaritae Sedekia lokookeng a Kenaana tosubak ngaamwar nasua tolimok Aab tama, “Ebala Ekapolon Akuj kona, ‘Itijikini iyong Ngisiria a ngaamwar kanu tomunya.’ ”

¹¹Tolimut ngikadwarak luche daang ngakiro napei nguna ebalasi, “Kape kitijik Ramos kidwang. Kisidwangi Ekapolon Akuj iyong.”

¹²Abu itwaan nisek amearitae anyaraun Mikaya tolimok Mikaya tama, “Adwar ngikadwarak luche daang ngakiro naajokak ani a ekapolon, ejoikinit iyong dang ilimuni napei nguna.”

¹³Nakaneni tolim Mikaya tama, “Ekongi ayong alokiro a Ekapolon Akuj ana eyari atamar ngakiro nakalimokini Akuj kang ayong, kesi alimuni ayong!”

¹⁴Ani enanguni ngesi nia ekapolon Aab, kingit Aab ngesi tama, “Mikaya, ejoikinit ayong ka ekapolon Yeochapat kilosi akitijikin Ramos kori mam?” Tatachu Mikaya tama, “Kape kitijik kidwang. Kisidwang Ekapolon Akuj iyong.”

¹⁵Tolim Aab tama, “Ibala katolimok ngalimokinet ngaai atamar nakisuruorea iyong ayong alokiro a Ekapolon Akuj, kiruor ngakiro na iteni?”

¹⁶ Tatachu Mikaya tama, “Engolik ayong ngasigerea a Ngisirael epetakina kidiama ngimukur loger a ngamesekin ana emam ekeyokon. Tolim Ekapolon Akuj tama, ‘Emam ngitunga lugu ekarikon. Kimiekisi kesi tobongosi nawi akaalimon.’ ”

¹⁷Tolimok Aab Yeochapat tama, “Petete kalimokini ayong iyong atamar nyedwareene logo naajokak jik anikang, pearai naaronok a?”

¹⁸Tolim Mikaya tama, “Kiira tokona ngakiro na elimunit Ekapolon Akuj! Engolikini ayong Ekapolon Akuj ibooyi alokicholong keng anadis, ka ngimalaikae keng daang ewaasi alodiyete keng, aloteten ka kedieny.

¹⁹Kingis Ekapolon Akuj tama, ‘Ngae ingalae Aab tolosio taarae alo Ramos?’ Tolimut ngimalaikae ngiche nugu, tolimut luche ngun.

²⁰Sodi bu etau towo alongaren Ekapolon Akuj tolim tama, ‘Engalae ayong ngesi.’ Kingit Ekapolon Akuj ngesi tama, ‘A eger kaali?’

²¹Tatachu etau tama, ‘Alosi ayong etiliwo ngikadwarak a Aab daang ngikaliokok.’ Tolim Ekapolon Akuj tama, ‘Kape kingala ngesi. Ipedori iyong.’ ”

²²Torumo Mikaya ngakiro keng ebala, “Ngakiro na asubakin kesi nugu, eteliokon Ekapolon Akuj ngikadwarak lukon lugu, sodi kingalata iyong. Nakaneni adungu Ekapolon Akuj alope atamar iriamunosi iyong ka naaronok!”

²³Sodi tonyou ekadwaran Sedekia tolot kibap Mikaya namatengen ebala, “Ekokini Etau a Akuj kadepari ayong kisuruor iyong ai?”

²⁴Tatachu Mikaya tama, “Iyenuni iyong akolongit na ilosio akiduk anamaniyat ana alotooma.”

²⁵Todungok ekapolon Aab epei a ngikapolok a arieng keng tama, “Kirumutu Mikaya torikosi nia Amon alo erai ekapolon a ere, ka Yoach lo erai lokookeng a ekapolon.

²⁶Tolimokis kesi atamar abala ayong kona, ‘Kiwaakisi itwaan en lojela kisumuja ngamugati ka ngakipi tanang abonguni ayong ajok!’ ”

²⁷Tolim Mikaya tama, “Ani kibongu iyong akaalimon, nyisuruoro Ekapolon Akuj ayong.” Kiatak nabo tama, “Kiira iyong itwaan daang ngakiro na alimu ayong nguna!”

²⁸Sodi toloto Aab lo arai ekapolon a Isirael ka Yeochapat lo arai ekapolon a Yuda akitijikin ere a Ramos alo Gilead.

²⁹Tolimok Aab Yeochapat tama, “Ani kilosi ngoni lojie, epasakin ayong, nakaneni tanap iyong ngiworui kon lua apolou.”

³⁰Adungokinit sek ekapolon a Siria ngikarikok a ngasigerea keng lu aweikinito ngaurukukui na iritae, tolimok tama, “Nyiitijikis itwaan iche kedit kori kepolot pearai ekapolon a Isirael bon.”

³¹Ani ingolikinete kesi ekapolon Yeochapat, tamasi, “Ekapolon a Isirael logo.” Sodi toreas kesi esakete akitijikin ngesi. Nakaneni toowanik Yeochapat sodi toyuu Ekapolon Akuj ngesi. Toree Akuj kesi anikeng.

³²Ani eyenete ngikarikok a ngasigerea atamar meere ngolo ekapolon a Isirael, tobongut tojongoto akiwapit ngesi.

³³Toguma asiger apei a Siria emal keng, sodi kichanyu ekapolon Aab, togum nakiriamet a ngiboro alu ejie anapit ngesi. Sodi tolimok ngesi ekamean aurukuk keng na iritae tama, “Torei topudo alojie kainyo kawan ayong!”

³⁴Torirau ejie noi akolongit ngina. Kigangakinae Aab naurukuk keng ingoliarit lowae lo a ngitunga a Siria. Ani adooyoret a akolong, totoan ngesi.