Read turkana 2 Ngakiro a Ngirwa 19 Bible Online

2 Ngakiro a Ngirwa 19 - turkana bible

2 Ngakiro a Ngirwa 19

¹Abu Yeochapat lo arai ekapolon a Yuda tobongu akaalimon nawi keng na ayei Yerusalem.

²Abu ekadwaran lo anyaritae Yeu lokookeng a Anani kisiriamia ngesi tolimok tama, “Esibit ejok akingarakin ngitunga luaronok ka aminakin lu eremokino Ekapolon Akuj a? Kotere ngakiro na isubak iyong, kingoik iyong Ekapolon Akuj.

³Kaneni dang, eyakasi cha naajokak nikon kainyo inyasu iyong ngakisikwaanet daang a akuj anaberu anabe Achera ana kolong elipito ngitunga, tasak akirichakin akiwap ngakiro na esaki Akuj.”

⁴Tani kerai Yerusalem alomit Yeochapat, elaanakini ngesi jiik ngitunga napei alo Beer-cheba alokuju tanang lokwaas a akwap ana ngimukur a Epiraim alokwap. Asubi ngesi kongina esaki abuun ngitunga nia Ekapolon Akuj ana erai Akuj kata apaakech.

⁵Toseu ngesi ngikatubok ngakiro alorerea kadaang a Yuda alu adukitoe ngawasea

⁶sodi tolimok kesi tama, “Tochoikisi eger lo itubeeneto esi ngakiro, kainyo nyiwapito esi ngakiro a itwaan pearai na a Ekapolon Akuj. Erukito ngesi ka esi esaa lo ilimunioto eriras.

⁷Torimas Ekapolon Akuj ka achoikin etich kus, kainyo nyechamit Ekapolon Akuj na erai Akuj kus akingalaanar ngitunga ngiboro kori akipakanar ngitunga ngiche, kori akidiaunun ngaropiyae nadiaket.”

⁸Alo Yerusalem, abu Yeochapat toseu Ngilawi, ka ngimurok a Akuj ta ngikarikok ngiche toliworos ngikatubok ngakiro alokesio alu esecheeneta ngitunga etal a Ekapolon Akuj ka lu engolopatar ngitunga a ere.

⁹Kichikichikak ngesi kesi kona, “Ejoikinit esi isubete etich kus ikerito Ekapolon Akuj, imunosi ngesi a ngitai kus kadaang.

¹⁰Na eponeta ngitunga kus luche lugu alorerea kech, yaut ngikesio nikus kerai lo earitere itwaan kori lo a etal, kori ngakiro na edungunitoe, ejoikinit esi itatamete kesi lokojokon eger lo echamit esubete ngirwa lua ekies kangolo, sodi nyeesechakineta kesi Ekapolon Akuj. Ani pekisubakis kongina, kingoikini Ekapolon Akuj esi ka ngitunga kus luche. Nakaneni ani kisuba esi etich kus, nyiliworosi ngikasechak.

¹¹Amaria lo erai emuron loapolon a Akuj ngesi kipolokini esi alokesio kadaang alu a ngakiro a Ekapolon Akuj. Sebadia lokookeng a Ichimael alo erai ekapolon a arieng alo Yuda, ngesi kipolokini esi alokesio kadaang a arieng. Ngilawi kesi ingolikinete atamar asubakin ngakiro a ngikesio kadaang alu atub. Totitinyeketo sodi kiwapa ngakiro nguna. Min Ekapolon Akuj lowae kangulu etenooko!”