Read turkana 2 Ngakiro a Ngirwa 2 Bible Online

2 Ngakiro a Ngirwa 2 - turkana bible

2 Ngakiro a Ngirwa 2

¹Totiaku ekapolon Solomon atamar aduki akai a Akuj kilipeenere Ekapolon Akuj. Totiaku nabo atamar aduki akai keng a elope na erai akai a ekapolon.

²Kiwaak ngesi ngitunga ngabunge ngatomwon-kaarei lotich lo a akirituunun ngiboro luduket, sodi kiwaak ngitunga ngabunge ngatomwon-kauni lotich lo a abokuunun ngamoru. Ayakasi ngitunga ngabunge ngauni ka ngamiae ngakan-kapei lu aweikinito kesi.

³Tomea Solomon ngitunga nia Iram alo arai ekapolon a Tiro, ebala, “Tosubere ayong ngakiro nakolong isubea iyong apakang Daudi, na igielanakinea iyong ngesi ngakito a ngichekereng todukio akai keng.

⁴Asaki ayong adukokin akai na edodikinea Ekapolon Akuj na erai Akuj kang arima. Eliwor akai ngina na italeunitoe, toliwor ngesi kilosi ayong ka ngitunga kang elipeta ngesi sodi enoma emitina lo a ngikito alukaakunyok. Neni ngesi kilemunea sua ngalemunet a ngamugati ana italeunitoe, atolemanakisi Ekapolon Akuj jiik. Eliwor tani ngesi kipeyeo sua ngakipeyos na inomio nataparach ka ebong, ka ngirwa lua Sabato, ka ngirwa lua esukukuu alo eanyungarere elap ta ngirwa luche lu italeunitoe idodikinitere Ekapolon Akuj na erai Akuj kosi arima. Adungoki ngesi Ngisirael akisub loger ngolo jik.

⁵Epolot akai a Akuj na asaki ayong akiduk, kainyo epolot Akuj kosi idwangit ngakujo daang.

⁶Nakaneni ngae epedori akiduk akai a Akuj? Tarai tani adis daang etia ni etia, nyitemokino ngesi. Ekokini tokona ayong aduki akai keng na epolot idwangit ekeno lo inomanakinere ngesi emitina ai?

⁷Tomeu tokona itwaan idio nikang ni erai ekunonoit alotich a egolit, ka ngasua nakwangae, ka nanyangayek ta nakirionok apotiok. Toliwor itwaan ngini ni eyeni akisub ngawarui napusiek, ka napusiek-arengak ta naarengak. Ebuni ngesi tosuba etich ka ngitunga lukunonoi lu eyakasi Yuda ka Yerusalem lukolong aseuni apakang Daudi.

⁸Inunae ayong alo Lebanon tani ngichekereng ka ngidomou ta ngaalimo kainyo ayeni ayong atamar eyenete ngitunga kon akitub ngakito. Ameuni ayong ngitunga kang kingarakin ka lukon

⁹akitub ngakito nakaalak kainyo eliwor akai na asaki ayong akiduk naapolon nabo nakebusean.

¹⁰ Kainuni ayong iyong akimuj a ngitunga kon alu esubete etich, ngesi ngakanoi ngataanea a metrik 2,000, ka erau ngataanea a metrik 2,000 ka emuna lo epuritoe ngalitae 400,000 ta akimiet a ngikito ngalitae 400,000.”

¹¹Kigira ekapolon Iram abarua nia Solomon etachakinit ebala, “Aloger eminar Ekapolon Akuj ngitunga keng, kitiliwo ngesi iyong ekapolon kech.

¹²Kipuroe Ekapolon Akuj na erai Akuj a Ngisirael na kolong asubi adis ka akwap! Ainaki ngesi ekapolon Daudi lokookeng lokooson, tarai lokachwaan nabo ekunonoit lo tokona esaki akiduk akai a Ekapolon Akuj ka akai keng a ilope.

¹³Ameuni ayong itwaan ni enyaritae Uram nikon. Erai ngesi ekunonoit lokachwaan.

¹⁴Erai itiokeng aka ekitela a Dan, tarai apakeng itwaan a akwap a Tiro. Eyeni ngesi asubun ngiboro a egolit, ka akwangat, ka ngasua nanyangayek, ka ngasua nakirionok, ka ngamoru ta ngakito. Eyeni asubun ngiboro a ngiworui alupusiek, ka lupusiek-arengak, ka luarengak ta lukaanikak. Epedori ngesi akulun asir daang nacha elimokinio ngesi. Kimiek ngesi tosuba etich ka ngikunonoi kon aapei ka lukolong asubete etich a ekapolon Daudi alo erai apakon.

¹⁵Tokona bocha, inunae sua ngakanoi, ka erau, ka emuna ta akimiet a ngikito nakolong kichikakini iyong sua atamar kiinuni.

¹⁶Kiyapakini sua iyong ngakito a ngichekereng daang na isaki iyong alomoru a Lebanon, sodi atoena totukokin ani erumor atachakakisi nanam kiwaaros tanang Yopa. Ani enangunete neni, tolema iyong kesi kaneni yaa Yerusalem.”

¹⁷Abu ekapolon Solomon kimaru ngitunga a ngakwapea anache daang lu alomito nakwap a Isirael. Ekwaan ekimar ngolo ka lokolong emarea Daudi lo erai apakeng ngitunga. Toliwor ekimar a ngitunga kangulu 153,600.

¹⁸Alotunga kangulu, abu ngesi kipaku ngitunga 70,000 nak etich lo a akiwok ngiboro, kipaku ngitunga 80,000 nak etich lo a akibet ngamoru alomoru, sodi toseu ngikaweikinak 3,600 kitusuba ngitunga etich.