Read turkana 2 Ngakiro a Ngirwa 20 Bible Online

2 Ngakiro a Ngirwa 20 - turkana bible

2 Ngakiro a Ngirwa 20

¹Adaunet a ngirwa a ngiche, apot ngasigerea a Ngimoab ka Ngiamor aapei ka ngipaalon kech lu anyaritae Ngimeun[10] toloto akitijikin Yeochapat.

²Pot ngitunga ngiche tolimokis Yeochapat tamasi, “Ebunit ajore natikaalan alo Edom, itorunito lowae loche a anam a Amakat, eponito akitijikin iyong. Alemasi Asason Tamar.” (Enyaritae ekiro keng eche Engedi.)

³Toem Yeochapat sodi kilip Ekapolon Akuj. Todung ngesi atamar toronoi akimuj anakwap a Yuda kadaang.

⁴Tonyout ngitunga alorerea a Yuda kadaang toloto Yerusalem akilip Ekapolon Akuj kingarak.

⁵Tochunakinos kesi ka ngitunga a Yerusalem tooma alaar nakitetet a akai a Akuj. Tolot ekapolon Yeochapat towo alongaren kech

⁶sodi kilip ebala, “Ee Ekapolon Akuj na irai Akuj kata apaakosi, iyei iyong nadis ipolokinit ngibukui a ngakwapea daang. Eyei iyong agogongu ka apolou, emam itwaan epedori aweikin iyong.

⁷Irai iyong Akuj kosi. Nakolong aponeta ngitunga kon Ngisirael nakwap naga, ibu iyong kitwarak ngitunga lu alomito nege, sodi nak akwap naga ngalesea a Aburaam alo arai lopae kon toliwor akech jik.

⁸Aloma kesi nakwap naga, toduko akai kon nakirimatar iyong ebalasi,

⁹ ‘Ani kepot ngakiro naaronok akirirare sua, na eraakasi ejie,[11] kori edeke loaronon, kori akoro, kiponi sua atowaa alongaren akai nakon naga, nakilipitere iyong, sodi ekaloikisi iyong kotere ngichan kosi, dio kiira iyong sua kitoyuu.’

¹⁰“Apot tokona ngitunga a Amon ka Moab ta Edom akitijikin sua. Nakolong aponeta taapaakosi alo Misiri, ibu iyong nyiilakak kesi elomarete nakwapea a ngitunga kangulu. Apot taapaakosi kiloda ngakwapea kech, nyeemunyasi kesi.

¹¹Ngakiro tokona kitachakis kesi sua nugu, ngesi akitwarakin sua anakwap ana kolong kiinakini iyong.

¹²Ee Akuj kosi, nyirirae tokona iyong kesi a? Kainyo emam sua ngikilinga kitijio ajore natikaalan ebunit nikosi naga. Nyikiyeni sua ngakiro nakisubakini, nakaneni kiponit nikon kingarak.”

¹³Awaasi ngikiliok a Yuda daang alokai a Akuj erukito ka ngaberu kech ta ngide kech.

¹⁴Toloma Etau a Akuj nia Elawit a epei alo ayei kiding asepich a ngitunga. Anyaritae ngesi Yaasiel lokookeng a Sekaria, alo arai lokookeng a Benaya, alo arai lokookeng a Yeyel, alo arai lokookeng a Matania, alo arai alesit a emachar a Asap.

¹⁵Tolim Yaasiel tama, “Iyong ekapolon Yeochapat, ka ngitunga a Yuda daang ta lua Yerusalem, topupokisi, ebala Ekapolon Akuj kona, ‘Nyieam. Nyiiriangakinosi kotere ajore nakaalan naga. Erai ejie eka Akuj, meere ekus.

¹⁶Toloto moi kitijikis kesi enangunete napak a Asis. Iriamunosi esi ka kesi losal a adipo ana eyei kide ariet a Yeruel.

¹⁷ Nyijiete esi tani alojie kangolo. Kapesi cha esi kibaka kidarut. Ingolikinete esi Ekapolon Akuj idwangi kotere esi.’ Ngitunga a Yuda ka Yerusalem, nyiitiito kori nyieam. Kapesi lojie, irukete esi ka Ekapolon Akuj!”

¹⁸Ani erumor kijuuru ekapolon Yeochapat tatap ereet keng ngalup, sodi kijuuruoto ngitunga daang ka ngesi aapei kilipa Ekapolon Akuj.

¹⁹Tonyout Ngilawi lua ngimacharin a Koas ka Kora kiremasi ipuruunito Ekapolon Akuj na erai Akuj a Ngisirael.

²⁰Tonyout kesi nataparach elilim kiswakakis nariet na eyei diyete Tekoa. Ani enyounete kesi alosit, kisuruor Yeochapat kesi ebala, “Topupokinae ngitunga a Yuda ka Yerusalem! Kigienokinos Ekapolon Akuj na erai Akuj kus sodi kisikokinos. Tonupa ngakiro a ngikadwarak keng sodi kidwanga.”

²¹Arumoret a akisuruor ngitunga, toseu ekapolon ngikaeok, kitanap ngiworui lukooyak lupalem enapeeneo ngirwa lua etal. Kingarenikis ngikaeok ngasigerea eeosi ebalasi, “Kipuroe Ekapolon Akuj! Erai amina keng aka jik!”

²²Ani isiakinete kesi aeo, kisibiler Ekapolon Akuj ngasigerea a Ngiamon, ka Ngimoab ta Ngiedomae.

²³Apot Ngiamon ka Ngimoab kitijikis Ngiedomae tomunyasi. Ani erumorete, tojikinos kesi make tomunyaros.

²⁴Ani enangunete ngasigerea a Yuda naita na erounit ariet, kingoliasi lowae lo ayakasi ngimoe. Kingolikis daang eperete analup ketoaka. Emam tani ipei ni abu tobuchar.

²⁵Toloto Yeochapat ka ngasigerea keng alemar ngiboro lu angatario. Ani eloose, toriamut ngaatuk[12] nakaalak, ka ngamuja, ka ngiworui ta ngiboro luche luajokak. Kiboikinos kesi neni ngirwa nguuni echunete ngiboro, nakaneni talalaketa ngiboro noi tokuruwo kesi alemar daang.

²⁶Tochunakinos kesi nadipo a Beraka akolongit na ngoomwon akipuro Ekapolon Akuj kotere ngakiro daang na asubaki. Ngakiro nguna enyaritere neni “Beraka”.[13]

²⁷Toriko Yeochapat ngasigerea keng tobongosi Yerusalem elakara kainyo abu Ekapolon Akuj kidwang ngimoe kech.

²⁸Ani enangunete kesi Yerusalem, toloto kai a Akuj ideese ngagitae tokusete ngaburucho.

²⁹Toema ngibukui daang na eirareta eger lo edwangea Ekapolon Akuj ngimoe a Ngisirael.

³⁰Sodi topolok Yeochapat akwap a ekisil, nak Akuj ngesi ekisil alowaitin kadaang.

³¹Araakasi ngikaru a Yeochapat ngitomwon-uni ka ngikan na esiakinea ngesi apolokin Yuda. Toliwor ngesi ekapolon alo Yerusalem a ngikaru a ngitomwon-arei ka ngikan. Anyaritae itiokeng Asuba na arai nakookeng a Chili.

³²Loger a apakeng alo engareni ngesi, abu Yeochapat tosub nguna eyookino alongaren Ekapolon Akuj.

³³Nakaneni apon nyiinyasun ni ilipeenere ngakujo nagelayek. Apot ngitunga nyeereunosi akilip Ekapolon Akuj na erai Akuj kata apaakech a ngitai kech kadaang.

³⁴Ngakiro na asubi Yeochapat napei anakisiakinet a apolou keng tanang losal, igiritae nakitab na enyaritae Ngakiro a Yeu a lokookeng a Anani. Erai akitab ngina epewae a akitab ana enyaritae Ngakiro a ngikapolok a Isirael.

³⁵Ngirwa ngiche, achamakinosi Yeochapat ka Aasia lo arai ekapolon a Isirael lo asubi ngakiro naaronok nakaalak.

³⁶Toduko kesi ngatubwae naapolok alodoket alo enyaritae Esionigeber, tometa ananamea.

³⁷Nakaneni abu Elieser lokookeng a Dodapau lo a ere a Marecha kichikichik Yeochapat ebala, “Aloger ichamakinotor iyong ka Aasia, inyasuni Ekapolon Akuj ibore ni isubakis esi.” Apon ngatubwae kinyasunae, nyemea ananam jik.