Read turkana 2 Ngakiro a Ngirwa 21 Bible Online

2 Ngakiro a Ngirwa 21 - turkana bible

2 Ngakiro a Ngirwa 21

¹Totoan Yeochapat tonukakinae nalielin a ngikapolok alore a Daudi, kilunyokin lokookeng Yeoram nados keng toliwor ekapolon.

²Yeoram lokookeng a Yeochapat alo arai ekapolon a Yuda, ayakasi talokookeng ngikan-kapei lu anyaritae Asaria, ka Yeyel, ka Sekaria, ka Asariau, ka Mikael ta Chapatia.

³Ainakinit apakech kesi ngainakinet nakaalak na araakasi egolit, ka ngakwangae ta ngiboro luche luajokak, sodi kiwaak Yeochapat talokookeng daang lorerea lu adukitoe ngawasea, epei lore epei. Ani aloger araakar Yeoram lokookeng loapolon, abu Yeochapat kilunyok ngesi nados keng toliwor ekapolon.

⁴Ani isikokin Yeoram anapolou keng, abu taar talokaatokeng daang ka ngikapolok a arieng keng ngiche.

⁵Araakasi ngikaru a Yeoram ngitomwon-uni ka ngiarei na aliworor ekapolon, toliwor ngesi ekapolon alo Yerusalem a ngikaru a ngikan-kauni.

⁶Abu ngesi kiwap ngakiro naaronok a ekapolon Aab ka ngikapolok luche a Isirael, kainyo eusit ngesi nakookeng a Aab. Tosechak ngesi Ekapolon Akuj,

⁷ nakaneni peasaki ekapolon Akuj akinyasun apolou a awi a Daudi kainyo achamakina kolong sek ngesi ka Daudi kichikak atamar erubakinete ngalesea keng eraakasi ngikapolok jiik.

⁸Ngirwa lu araakar Yeoram ekapolon, apot ngitunga a Edom tongero ekapolon a Yuda, sodi toseut ekapolon kech a ngikulepek.

⁹Sodi tonyout Yeoram ka ngikarikok a ngasigerea keng ta ngaurukukui kech na iritae toloto toremo Edom. Kiriama ngasigerea a Ngiedomae kesi, nakaneni ani enangi nakwaare, topukuchoros kesi tosiwa.

¹⁰Angero ngitunga a Edom ekapolon a[14] Yuda napei ngina jik tani tokona. Ngirwa lupei ngulu, tongero ngitunga a ere a Libina dang Yeoram, kainyo aisikinit Yeoram ekapolon Akuj na erai Akuj kata apaakeng.

¹¹Abu ngesi toduk tani ni ilipeenere ngakujo nagelayek nakwap na ngimukur a Yuda, sodi torikok ngitunga a Yuda ka Yerusalem nakisech, tosechakis Ekapolon Akuj.

¹²Inunae Yeoram abarua a ekadwaran Elija na egirit kona, “Kirirae iyong Ekapolon Akuj na erai Akuj a apaakon Daudi, kainyo iwou iyong akiwap ngakiro nakolong asubi apakon Yeochapat kori nakolong asubi apaakon Asa.

¹³Pearai iwap iyong ngakiro a ngikapolok a Isirael, itiliwo ngitunga a Yuda ka Yerusalem lu nyemunosi Akuj, loger lokolong asubete Aab ka ngikapolok lu atupito ngesi. Iar iyong tani talokaatokon lu araakasi ngitunga luajokak akidwang iyong.

¹⁴Kotere ngakiro nguna kirirae Ekapolon Akuj iyong lokojokon ka ngide kon ta ngaberu kon. Inyasuni ngesi ngiboro kon.

¹⁵Kitingi iyong ilope edeke a ngamaliteny lokaapilan lo iatanakin apipilu keng ngirwa daang.”

¹⁶Alomito Ngipilisti ngiche ka Ngimwaarabui diyete ni alomito ngitunga a Kuch ngiche alokwaas a anam. Abu Ekapolon Akuj kichuchia kesi akitijikin Yeoram.

¹⁷Toremo kesi Yuda sodi tolemasi ngiboro daang ka talokookeng, pearai Aasia lo arai lokookeng loochi.

¹⁸Arumoret kanguna kadaang, abu Ekapolon Akuj kititing Yeoram edeke a ngamaliteny lokaapilan.

¹⁹Toting edeke ngolo ngesi a ngikaru a ngiarei iyosi aroner, ekisidi totoan Yeoram eriaba noi. Apot ngitunga keng nyiinokakis akim na igorore ngesi esutonokinio loger lo kolong enokanakinere na kata apaakeng.

²⁰Aliwor Yeoram ekapolon eraakasi ngikaru keng ngitomwon-uni ka ngiarei. Toliwor ngesi ekapolon alo Yerusalem a ngikaru a ngikan-kauni. Emam itwaan abu toriangakin kotere akitu keng. Tonukakinae ngesi lore a Daudi, nakaneni meere nalielin a ngikapolok.