Read turkana 2 Ngakiro a Ngirwa 22 Bible Online

2 Ngakiro a Ngirwa 22 - turkana bible

2 Ngakiro a Ngirwa 22

¹Apot ngitunga a Yerusalem kilunyokis Aasia nados a apakeng toliwor ekapolon, kainyo apot sek Ngimwaarabui ngiche taara talokookeng a Yeoram luapolok daang.

²Araakasi ngikaru a Aasia ngitomwon-arei ka ngiarei na aliworor ekapolon. Toliwor ngesi ekapolon alo Yerusalem a ekaru a epei. Anyaritae itiokeng Asalia, na arai nakookeng a Aab, tarai atatait a Omri, alo kolong arai ekapolon a Isirael.

³Abu Aasia kiwap ngakiro naaronok asubete ngitunga a awi a Aab kainyo etutuki itiokeng ngesi akisub naaronok.

⁴Abu ngesi tosechak Ekapolon Akuj, kainyo na atoanea apakeng, apot ngitunga luche a awi a Aab kitutuko. Ngakiro nguna enyasunete ngesi.

⁵Abu ngesi kiira ngakiro kech sodi kimorikin ka ekapolon a Isirael lo anyaritae Yoram toloto kitijwoto ekapolon a Siria lo anyaritae Asael. Apot ngasigerea tojikinos alo Ramos anakwap a Gilead, sodi towanae Yoram.

⁶Tobongo Yoram lore a Yesireel akitedek ngajemei keng. Sodi tolot Aasia aanyun ngesi kaina.

⁷Esitoruni Akuj esal a apolou a Aasia nalotoru keng aanyun Yoram. Na ayakar Aasia inaa, apot ngesi ka Yoram toloto akisiriamiar Yeu lokookeng a Nimchi, lo aseunit Ekapolon Akuj atamar kinyasu apolou a awi a Aab.

⁸Na eriraa Yeu apolou a awi a Aab, apot kiriamun ka ngikarikok a Yuda, kata lochien a Aasia lusek arukito ka Aasia analotoru keng. Taar Yeu kesi daang.

⁹Tasakae Aasia toriamunae edukit alo Samaria. Torikoroe ngesi nia Yeu taarae. Apon tonukae ngesi ani arimare apaakeng ekapolon Yeochapat, losek asubit ngakiro nakaalak ani a Ekapolon Akuj. Emam itwaan a awi a Aasia ni abu kidong ni apedori aliwor ekapolon.

¹⁰Ani napei ayenea Asalia na arai itiokeng a ekapolon Aasia atamar aar lokookeng, abu tolim atamar taarae ngitunga a awi a ekapolon daang.

¹¹Ayei Aasia nakaatokeng na a aberu anache na eusit emuron lo anyaritae Yeoyada. Abu ngesi kidaa lokookeng a Aasia epei lo anyaritae Yoach, tachada ngesi ani ayakasi talokaatokeng luche lu adikino eario. Abu Yeocheba kidaa Yoach ka aberu na adakit ngesi, kidaa anamaniyat anaperot alokai a Akuj. Kidaa Yeocheba idia ngini ani eyei Asalia sodi nyear.

¹²Kidae Yoach kaneni a ngikaru a ngikan-kapei alu araakar Asalia akapolon.