Read turkana 2 Ngakiro a Ngirwa 23 Bible Online

2 Ngakiro a Ngirwa 23 - turkana bible

2 Ngakiro a Ngirwa 23

¹Adaunet a ngikaru a ngikan-kapei, abu Yeoyada lo arai emuron totiaku asubakin ngakiro ngache. Abu ngesi topupokin ka ngikarikok a ngasigerea ngikan. Araakasi kesi Asaria lokookeng a Yeroam, ka Ichimael lokookeng a Yewanan, ka Asaria lokookeng a Obed, ka Maseya lokookeng a Adaya ta Elichapat lokookeng a Sikiri.

² Apot kesi toloto lorerea a akwap a Yuda daang sodi tobuut Ngilawi ta ngikapolok a ngimacharin daang, tobuut Yerusalem.

³Tochunakinos kesi daang kai a Akuj, sodi tachamakinos ka Yoach lo arai lokookeng a ekapolon. Tolimok Yeoyada kesi tama, “Lokookeng a ekapolon alokasian logo! Ngesi tokona eliwor ekapolon loger lokolong echikakinea Ekapolon Akuj ekapolon Daudi atamar eliworosi ngalesea keng ngikapolok.

⁴Tosubakisi kona. Na eponeta ngimurok ka Ngilawi akisub etich akolongit na Sabato, etiakasi kesi ngatiaket ngauni. Itee atiaket apei ngidorin a akai a Akuj,

⁵itee atiaket ache akai a akapolon, sodi pena luche ni enyaritae ekidor a Ngateak. Echunakinosi ngitunga daang tooma nalaar a akai a Akuj.

⁶Emam itwaan echamitae elomari tooma kai a Akuj mati ngimurok, ka Ngilawi lu esubete etich. Epedorete kesi alomar kainyo italeunitoe kesi, nakaneni ejoikinit ngitunga luche daang iwapete ngakiro na elimunit Ekapolon Akuj, sodi pena nikalapatan.

⁷Esakitae Ngilawi ewaasi kiriama ekapolon etakito ngilengea kech, kiruko ka kesi ani elosi kadaang. Itwaan cha daang ni elomuni kai a Akuj, ejoikinit eario.”

⁸Apot Ngilawi ka ngitunga a Yuda tosubakis ngakiro na alimuni Yeoyada. Apon ngitunga lu arumorete etich kech akwaar na Sabato nyeelakakin eloose, sodi tochunakis ngikarikok ngitunga lu aponito lotich akolongit ngina ka lu arumorito etich.

⁹Abu Yeoyada nak ngikarikok ngakwaaras nakolong arai ngaka ekapolon Daudi nasek ekachakinitae kai a Akuj.

¹⁰Abu ngesi kitowo ngasigerea na atakito ngilengea kisiriam ewae lo alongaren akai a Akuj, kiyoko ekapolon, napei alowae alowae alo alokuju akai tanang lowae lo alokwap, kiriama ekeno a ngakipeyos ka akai.

¹¹Abu Yeoyada kipud Yoach nikalapatan, kiwaak ekiraun nakou keng. Ani erumor nak akitab na igiritae ngitalio lu iwapi ekapolon a akwap. Kitiliworoe ngesi ekapolon. Apot Yeoyada ka talokookeng kidokakis Yoach akimiet, sodi kiremasi ngitunga daang tamasi, “Kiboi ekapolon nikooyen!”

¹²Ani iirari Asalia echale lo akereta ngitunga ka lo epurotor ekapolon, abu ngesi kikirikiraar kai a Akuj ni achunakina ngitunga.

¹³Ani enangi neni taanyunga ekapolon lo aringa eseunio ewei alokidor a akai a Akuj, alodiyete apir anipalem ewaanatar ngikapolok. Eriamito ngesi ngikapolok a ngasigerea ka ngikakutak ngaburucho. Achalasi ngitunga daang imariteteete, tokusete ngaburucho. Apot ngikaeok lu atingito ngiboro kech a aeo, kingarenikis erikito ngitunga. Abu Asalia tochilichilia ngiworui keng kirema tama, “Erukoonu longeriet akapolon! Erukoonu!”

¹⁴Peasaki Yeoyada taarakinae Asalia diyete akai a Akuj. Abu ngesi tolimok ngikapolok a ngasigerea tama, “Kipudosi ngesi kane yaasi kiding ngasigerea, sodi taara itwaan cha daang ni esaki ayuun ngesi.”

¹⁵Torwakinos kesi ngesi torikosi kai a ekapolon, sodi taara ngesi ani enyaritae ekidor a Angole.

¹⁶Abu emuron a Akuj lo anyaritae Yeoyada kilomak ekapolon Yoach ka ngitunga keng nakiro na achamakinotor ka Ekapolon Akuj toliworos kesi ngitunga a Ekapolon Akuj.

¹⁷Apot ngitunga daang tolomasi kai a Baal sodi toukosi Baal. Tobwangabwangata kesi ngikenoi ka ngakujo nasubuna, sodi taara Matan lo arai emuron a Baal alongaren ngikenoi lu ipeyoore.

¹⁸Abu Yeoyada tolem ngimurok ka Ngilawi toweikis etich lo esubio alokai a Akuj. Asakitae kesi esubete etich lo kolong atiakakini ekapolon Daudi kesi, ka akinom ngakipeyos na ipeyonokinio Ekapolon Akuj itemem ka etal a Musa. Kesi aweikinito tani ngieosio ka ngisukukui.

¹⁹Abu Yeoyada kiwaak ngasigerea kiyoko ngidorin a akai a Akuj sodi kiratakineta ngitunga lu nyitaleuno nyeelomut.

²⁰Apot ngikapolok a ngasigerea ka ngikarikok luche, ka ngikapolok luche, ka ngikapolok a arieng ta ngitunga luche daang kirukosi ka Yeoyada sodi torikut ekapolon alokai a Akuj torikosi kai a ekapolon. Tolomasi kesi kitoro lokidor lo alokinga sodi tolot Yoach kiboikin lokicholong a ekapolon.

²¹Apot ngitunga daang talakaros sodi tongop echale alore ani aarere Asalia.