Read turkana 2 Ngakiro a Ngirwa 24 Bible Online

2 Ngakiro a Ngirwa 24 - turkana bible

2 Ngakiro a Ngirwa 24

¹Araakasi ngikaru a Yoach ngikan-kaarei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomwon-omwon. Anyaritae itiokeng Sibia na arai aka ere a Beer-cheba.

²Asubeene Yoach ngakiro na etalakarito Ekapolon Akuj ngirwa daang lu ayarea emuron Yeoyada.

³Toseu Yeoyada ngaberu ngaarei toliworos ngaka Yoach. Kidoikis ngaberu nguna Yoach ngide lusapa ka lupesur.

⁴Ekisidi totiaku Yoach atamar tobongokinoe akiduk akai a Akuj.

⁵Tochunak ngesi ngimurok ka Ngilawi tolimok tama, “Kapesi lorerea a Yuda, tochunut alotunga kadaang ngaropiyae na ebongonokinere akiduk akai a Akuj loger lopalem esubio ekaru daang. Kiburuburakisi ngakiro nguna.” Nakaneni apot Ngilawi nyiiburuburakis.

⁶ Sodi tanyarau Yoach Yeoyada lo arai ekapolon kech kingit tama, “Kotere nyo peilimokinea iyong Ngilawi atamar toloto lotunga a Yuda ka Yerusalem kidiaut echur lokolong adunguni Musa lo erai ekasuban etich a Ekapolon Akuj, atamar tolemut ngitunga tobongonokinere akiduk eam a Akuj?”

⁷Apot sek ngitunga a aberu anaaronon[15] be Asalia kangina kinyasut akai a Akuj sodi tolemasi ngiboro lu italeunitoe tosubeta etich a Baal.

⁸Todungok ekapolon Ngilawi atamar tosubakis asaduku na iwaanakinio ngadekon sodi kiwaakis lokidor a akai a Akuj.

⁹Apon tomearae ngitunga lowaitin a Yuda daang ka Yerusalem alimokin ngitunga atamar tolemut echur lokolong etelemuununi Musa lo erai ekasuban etich a Ekapolon Akuj, kitelem Ngisirael anariet.

¹⁰Apot ngakiro nguna tojoikis ngitunga ka ngikapolok kech. Tolemut kesi ngaropiyae kileleba asaduku.

¹¹Akolongit daang, ayaanarete Ngilawi asaduku lokapolon a arieng lo aweikinit asaduku. Arai nacha ilelebunor asaduku, tolemut ekegiran a ekapolon ka ekapolon loochi a Emuron aloapolon, tolemut ngaropiyae anasaduku sodi tobuasi asaduku ni ewaanakinio. Aloger kangolo, kidiaunut kesi ngaropiyae nakaalak.

¹²Apot ekapolon ka Yeoyada tolemut ngaropiyae nakis ngitunga lu abongonokinete akiduk akai a Akuj. Kigira kesi ngitunga lu araakasi ngikadukok a ngamoru, ka lua ngakito ta lua ngasua. Tobongonokis kesi akiduk akai a Akuj.

¹³Apot ngikadukok ngulu daang toduko lokojokon, sodi tobong akai loger lokolong ekoni, nabo togogonger.

¹⁴Ani erumorio abongonokin akiduk, apon egolit ka ngakwangae na edongete nakinae ekapolon ka Yeoyada. Tolemut kesi tosubere ngatubwae ka ngiboro luche a akai a Akuj. Ngirwa lu aringaakar Yeoyada eyari, epeyoo ngakipeyos alokai a Akuj jiik.

¹⁵Ani emojongi Yeoyada enangete ngikaru keng amiat apei ka ngitomwon-uni, totoan.

¹⁶Tonukakinae ngesi nalielin a ngikapolok na eyakasi lore a Daudi kotere etich loajokon asubi ngesi ani a Ngisirael, ka Akuj ta akai a Akuj.

¹⁷Ekisidi a Akitu a Yeoyada, apot ngikapolok a Yuda kimaimaa Yoach atamar topupeene ngakiro kech.

¹⁸Sodi tojongoto ngitunga akilipeenen alokai a Ekapolon Akuj ana erai Akuj kata apaakech, sodi kisiakis kesi akilip ngakujo nasubuna ka ekisikwaane a akuj anaberu be Achera. Abu angoit a Ekapolon Akuj min nia Yuda ka Yerusalem kotere akisech nakech ngina.

¹⁹Tomea Ekapolon Akuj ngikadwarak akichikichik kesi sodi tobongioto nikeng, nakaneni towout kesi akiirar.

²⁰Sodi min etau a Akuj nia Sekaria alo arai lokookeng a emuron Yeoyada. Towo ngesi ani eteeto ngitunga ngesi, sodi tolimok ngitunga tama, “Ebala Akuj kona, ‘Kotere nyo iwouneta esi akiwap ngitalio keng lu tokona kiinut esi nginyas? Ingero esi ngesi, kinger ngesi dang esi!’ ”

²¹Abu ekapolon totuko ka ngitunga akiar Sekaria. Todungok ngesi ngitunga atamar tachaka Sekaria a ngamoru analaar a akai a Akuj.

²² Kimuriak Yoach etich lokolong ajokon asubea apakeng a Sekaria lo enyaritae Yeoyada, asubea ngesi, sodi taar Yoach Sekaria. Esaa lo eridea Sekaria, abu tolim tama, “Kimiekisi Ekapolon Akuj kingolik ngakiro na isubi iyong sodi tatachak!”

²³Esal a ekaru kangolo, apot ngasigerea a Siria kitijikis ngitunga a Yuda ka Yerusalem, taara ngikapolok daang, tangatasi ngiboro lukokaalak tobongioto Damasko.

²⁴Akidioko ngasigerea a Siria, nakaneni abu Ekapolon Akuj nak kesi agogongu na idwangeta ngasigerea a Yuda nakaalak kainyo apot kesi tongero Ekapolon Akuj na erai Akuj kata apaakech. Apon Yoach kirirae a eger kangolo.

²⁵Apon ngesi towanae lokojokon. Ani erotokinete ngimoe, apot ngikapolok a arieng a Yoach ngiarei totuko akiar ngesi sodi tatachakineta akitu a lokookeng[16] a Yeoyada alo arai emuron a Akuj. Tonukakinae Yoach lore a Daudi, nakaneni meere nalielin a ngikapolok. (

²⁶Anyaritae epei a ngikiliok alu atukete akiar ngesi Sabad lo arai lokookeng a aberu ana anyaritae Chimeas, ana ekitela a Amon. Anyaritae loche Yeosabad lo arai lokookeng a aberu ana anyaritae Chimuris, ana ekitela a Moab.)

²⁷Ngakiro kata lokookeng a Yoach, ka ngakiro naaronok adwario ani a Yoach ta eger lo abongonokinio ngesi akiduk akai a Akuj, igiritae daang nakitab na isisae ngakiro a ngikapolok. Abu lokookeng lo anyaritae Amasia kilunyokin nados keng toliwor ekapolon.