Read turkana 2 Ngakiro a Ngirwa 25 Bible Online

2 Ngakiro a Ngirwa 25 - turkana bible

2 Ngakiro a Ngirwa 25

¹Toliwor Amasia ekapolon eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Anyaritae itiokeng Yewadin na arai aka ere a Yerusalem.

²Asubi ngesi ngakiro na ejoikinito Ekapolon Akuj, nakaneni peerichakina.

³Ani napei esikokinor ngesi anapolou keng, abu taar ngikapolok a arieng lukolong aarete apakeng.

⁴ Nakaneni nyeara ngesi ngide kech, pearai abu kiwap ngakiro nakolong adunguni Ekapolon Akuj alotal a Musa kona, “Nyeario ngikauriak kotere akisech a ngide kech, nabo nyeario ngide kotere akisech a ngikauriak kech. Eario itwaan kotere akisech na asubi ngesi ilope.”

⁵Abu Amasia tochunak ngikiliok daang a ngitela a Yuda ka Benjamen totiakatiaka ngajorei itemem ka ngimacharin kech, kiwaanak ngikarikok a ngasigerea ana eraakasi ngabunge ngapei-pei, ka ngamiae ngapei-pei. Araakasi kesi ngikiliok lu enangito ngikaru kech ngitomwon-arei ka lu iporito. Arai ekimar kech kadaang 300,000. Araakasi ngikiliok ngulu lu epakunitae, lukajwok nabo toyenete ejie a ngakwaaras ka ngaupwala.

⁶Abu ngesi nabo togiel ngasigerea ngache alo Isirael na araakasi 100,000 nakajwok, togiel a ngakwangae ana arai apotis kech ngakiloi 3,400.

⁷Nakaneni abu ekadwaran eche tolot nia ekapolon tolimok tama, “Ee ekapolon, nyiirukosi ka ngasigerea a Ngisirael kainyo nyerukito Ekapolon Akuj ka ngitela lua apolou ana lokwap lugu.

⁸Ipedori iyong akitam atamar kori kesi kiinakinete iyong agogongu na idwangea alojie, nakaneni erai Akuj kiinakini iyong agogongu kidwangea ngimoe kori kidwangere iyong.”

⁹Kingit Amasia ekadwaran tama, “Ikokinio tokona ngaropiyae daang na atachak ayong kesi ai?” Tatachu ekadwaran tama, “Epedori Ekapolon Akuj abuakin iyong nakaalak na idwangito nguna!”

¹⁰Sodi talakak Amasia ngasigerea nguna tolimok atamar toloto nawiyei. Tobongosi kesi nawiyei engoikinito ngitunga a Yuda kotere ngakiro nguna.

¹¹Tonyou Amasia etitiny toriko ngasigerea keng nadipo a Amakat. Tojwoto kaneni taara ngasigerea a Ngiedomae 10,000.

¹²Sodi torikosi ngiche 10,000 eyarete. Torikosi kesi lore a Sela, yaasi kidiama akope tachakut kaina taara ngatabab na ayakasi kwap.

¹³Nakaneni apot ngasigerea a Ngisirael nasek awouni Amasia arikor lojie, kitijikis ngirerea a Yuda lu ayakasi kiding Samaria ka Bes-oron, taara ngitunga ngabunge ngauni ka angatar ngiboro lukaalak.

¹⁴Ani ebonguni Amasia alojie alo edwangea Ngiedomae, abu yau ngakujo kech nasubuna kitowo kesi, sodi kilip ka akinomanakin emitina.

¹⁵Apot ngakiro nguna kitongoa Ekapolon Akuj, sodi tomea ekadwaran nia Amasia. Tolimok ekadwaran Amasia tama, “Kotere nyo ilipea iyong ngakujo nagelayek, nakolong akuruwori tani ayuun ngitunga kech anikon?”

¹⁶Kitutubok Amasia ngesi ngakiro tama, “Napei ori kitiliworea sua iyong ekesuruoron a ekapolon? Kililing nyeketaar tokona ayong iyong ngitunga!” Kililing ekadwaran, nakaneni ani eringa nyililinga tolim tama, “Ayen tokona ayong atamar atiaku Akuj akinyasun iyong, kainyo isubak iyong ngakiro nugu, nabo iwou akiirar ngakiro kang.”

¹⁷Abu Amasia lo arai ekapolon a Yuda ka ngikesuruorok keng totuko akitijikin Isirael. Tomea ngesi ngitunga nia ekapolon a Isirael alo anyaritae Yewach lo arai lokookeng a Yewaas tarai etatait a Yeu, ebenyi ngesi esaki ejie.[17]

¹⁸Sodi tomea ekapolon Yewach ngitunga alimokin ngesi kona, “Ayei kolong eregae lo a ngimoru a Lebanon lo abala tolimokisi ekitoe lobe echekereng kona, ‘Kipoto nakookon kiut lokookang.’ Kitoru etiengit a moding neni kipudaa eregae ngolo.

¹⁹Tokona bocha Amasia, abe iwoga iyong ibala, ‘Edwang ayong Ngiedomae.’ Nakaneni abala ayong iyong kiboikin nawi. Nyo ikurio iyong ngichan lu eyaunete ngakiro naaronok nikon ka ngitunga kon?”

²⁰Nakaneni towou Amasia akiirar ngakiro nguna. Atiakunit sek Akuj atamar idwangio Amasia kainyo abu kilip ngakujo a Ngiedomae.

²¹Sodi tonyou ekapolon Yewach tolot kitiji Amasia lo arai ekapolon a Yuda. Tojikinos kesi alo Bes Chemech anakwap a Yuda.

²²Kidwangae ngasigerea a Yuda tamataros nawiyei kech.

²³Kirum Yewach Amasia toriko Yerusalem. Ani enangi neni touko awas a ere napei alokidor a Epiraim tanang lokidor a Ekeli. Arai aoyau ani aukori ngesi ngamitae esibit ngamiae ngaarei.

²⁴Tolema ngesi egolit daang ka ngakwangae na ayakasi kai a Akuj. Tolema tani ngiboro a akai a Akuj lu eyokiyete ngalesea a Obed Edom, ka ngaropiyae a akai a ekapolon. Torik ngesi tani ngirikon, tobongo Samaria.

²⁵Kiboi Amasia lo arai ekapolon a Yuda ngikaru ngitomon ka ngikan ketoana Yewach lo arai ekapolon a Isirael kerumor.

²⁶Ngakiro nache daang na asubi Amasia napei anakisiakinet a apolou keng tanang losal, igiritae nakitab na enyaritae Ngakiro a ngikapolok a Yuda ka Isirael.

²⁷Napei alorwa alu angerio Amasia Ekapolon Akuj, apot ngitunga alo Yerusalem totuko anyoikin ngesi. Ekisidi, todok ngesi tolot lore a Lakich, nakaneni apot ngimoe keng kiwapa ngesi kaina taara.

²⁸Apon akwaan keng kiwokoroe a angole yaarae Yerusalem, sodi tonukakinae nalielin a ngikapolok na eyakasi lore a Daudi.