Read turkana 2 Ngakiro a Ngirwa 26 Bible Online

2 Ngakiro a Ngirwa 26 - turkana bible

2 Ngakiro a Ngirwa 26

¹Apot ngitunga a Yuda daang toseut Usia lo araakasi ngikaru keng ngitomon ka ngikan-kapei, kilunyokis nados a apakeng alo anyaritae Amasia, toliwor ekapolon. (

²Ani ketoana Amasia kerumor, tolema Usia ere a Elas nabo sodi toduk.)

³Aliwor Usia ekapolon eraakasi ngikaru keng ngitomon ka ngikan-kapei. Toliwor ngesi ekapolon alo Yerusalem a ngikaru a ngitomwon-kan ka ngiarei. Anyaritae itiokeng Yekolia na arai aka ere a Yerusalem.

⁴Kiwap Usia ekitetemes a apakeng, tosub ngakiro na ajoikinito Ekapolon Akuj.

⁵Amuno Usia etich a Ekapolon Akuj ngirwa lu ayarea Sekaria, lo etatami ngesi akiker Akuj. Topia Akuj Usia.

⁶Tolot Usia akitijwore Ngipilisti. Touko ngesi ngawasea a ngirerea alu enyaritae Gas, ka Yaminia ta Achidod, sodi toduk ngawasea a ngirerea alu ayakasi diyete Achidod ta ngiwaitin luche a Pilistia.

⁷Kingarak Akuj ngesi kidwang Ngipilisti, ka Ngimwaarabui lu alomito Gurbaal ta Ngimeun.

⁸Apot Ngimaon tobukonokis Usia echur, toyenikinae ngesi lokojokon tanang ekipur keng tani Misiri.

⁹Kitogogong Usia ngawasea a Yerusalem toduk ngakais nakooyak lokidor a Ekeli, ka lokidor a Adipo ta ni erear awas.

¹⁰Abu ngesi toduk ngakais nakooyak nguna tani nariet. Towad ngesi ngakare nakaalak kainyo ayakasi ngesi ngibaren lukaalak naukon na lotoo ka naroatin. Ani aloger aminar ngesi akitare, abu ngesi kisitaa ngitunga ngamanat a ngimusabib nakwap na ngimukur, ka akitare akwap na itokoniunete ngalup akimuj.

¹¹Ayakasi ngesi ngasigerea nakaalak nakajwok. Egirete ngikegirak ekimar a ngasigerea kanguna. Anyaritae ngikegirak Yeyel ka Maaseya. Anania lo arai epei a ngikapolok a arieng ngesi aweikinit kesi.

¹²Arai ekimar a ngikarikok a ngasigerea 2,600.

¹³Arai ekimar a ngasigerea anakajwok, ana asakitae itijiete ngimoe a ekapolon, araakasi 307,500.

¹⁴Tokorak Usia ngasigerea ngaupwala, ka ngakwaaras, ka ngapukoto, ka ngasua na enapio alorarum, ka ngakawa ka ngimalea ta ngamoru na isirimokinio kibaariyoroe.

¹⁵Alo Yerusalem, apot ngitunga keng tosubakis ngiboro lu egumanarere ngimalea, ka lu imasanarere ngamoru naapolok, kimasunae anakais anakooyak ta ngikwaasea a awas a ere. Topetakin ekipur keng wadaang, toyenikinae ngesi kotere eger lo engarakinitor Akuj ngesi.

¹⁶Ani isikokin Usia, abu ngesi kinisakin, kinyasut ngakiro nguna. Abu ngesi towou akiirar ngakiro a Ekapolon Akuj ana erai Akuj keng, toloma ngesi kai a Akuj sodi kinom emitina alokeno alo inomeenere emitina.

¹⁷Abu Asaria lo arai emuron a Akuj kirukosi ka ngimurok ngiche lukaatinyok ngikan-kauni, kiwapakis ekapolon,

¹⁸ esakete akiratakin ngesi. Tolimut tamasi, “Usia! Meere iyong echamitae inomanakini Ekapolon Akuj emitina. Ngimurok lu eraakasi ngalesea a Aron make kesi etaleun tosuba etich ngolo. Torotok ani italeuno kane. Itongo iyong Ekapolon Akuj na erai Akuj, nabo nyeringa Akuj kipiarit iyong.”

¹⁹Awei Usia alokai a Akuj, alokwaas a ekeno alo inomere emitina, etingit atartar na inomere emitina. Tongoik ngesi ngimurok ngulu. Atipei abu enomokere toting ereet keng.

²⁰Apot Asaria ka ngimurok luche tokienyikis, kingolikis atamar keting enomokere ereet keng. Kitingaasi kesi ngesi torotok alokai a Akuj. Topudo ngesi atipei kainyo abu Ekapolon Akuj kirira ngesi.

²¹Abu edeke ngolo kitiliwo Usia lo nyitaleuno ngirwa daang lu ayarea ngesi. Peapedori ngesi alomar kai a Akuj, nakaneni abu tolom kai na arai akeng a ilope. Tojongo ngesi akisub ngitichisio keng daang. Abu lokookeng lo anyaritae Yosam topolok akwap.

²²Abu ekadwaran Isaya lo arai lokookeng a Amos kigir ngakiro nache daang na asubi ekapolon Usia ngirwa lu araakar ekapolon.

²³ Totoan Usia tonukakinae diyete ngalielin a ngikapolok. Kotere edeke lo atingit ngesi, apon nyeenukakin nalielin a ngikapolok. Abu lokookeng lo anyaritae Yosam kilunyokin nados keng toliwor ekapolon.