Read turkana 2 Ngakiro a Ngirwa 27 Bible Online

2 Ngakiro a Ngirwa 27 - turkana bible

2 Ngakiro a Ngirwa 27

¹Toliwor Yosam ekapolon eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomon ka ngikan-kapei. Anyaritae itiokeng Yerucha na arai nakookeng a Sadok.

²Tosub ngesi ngakiro na ejoikinito Ekapolon Akuj loger lo kolong asubea apakeng. Abu ngesi nyeesech loger lokolong asechea apakeng kotere akinom emitina[18] alokai a Akuj. Kaneni dang, apot ngitunga torubakis esecheenete.

³Yosam ngesi aduki ekidor lo alokwap akai a Akuj, toduk nabo lokojokon awas a ere alowae alo enyaritae Opel.

⁴Toduk Yosam ngirerea a Yuda sodi toduk ngakais na eyuunotor ngitunga ka ngakais nakooyak na iteere akwap, toduk namon.

⁵Kitiji ngesi ekapolon a Ngiamon ka ngasigerea keng sodi kidwang. Ani erumor kidesik Yosam Ngiamon abukonokin ngesi echur ekaru daang a ngikaru a nguuni. Ngiboro lu alemuununio kesi ngakwangae ngakiloi 3,400, ka ngakanoi ngataanea 1,000 ta erau ngataanea 1,000.

⁶Abu Yosam toliwor lo eyenikinitae kainyo amuno ngesi ngakiro a Ekapolon Akuj ana arai Akuj keng.

⁷Ngakiro nache daang na asubi Yosam anapolou keng, ka ngijiesinei keng ta ngakiro na ewapit ngesi, igiritae nakitab na enyaritae Ngakiro a Ngikapolok a Isirael ka Yuda.

⁸Araakasi ngikaru a Yosam ngitomwon-arei ka ngikan na aliworor ekapolon. Toliwor ngesi ekapolon alo Yerusalem a ngikaru a ngitomon ka ngikan-kapei.

⁹Totoan ngesi tonukakinae lore a Daudi. Abu lokookeng lo anyaritae Aas kilunyokin nados keng toliwor ekapolon.