Read turkana 2 Ngakiro a Ngirwa 29 Bible Online

2 Ngakiro a Ngirwa 29 - turkana bible

2 Ngakiro a Ngirwa 29

¹Toliwor Esekia ekapolon a Yuda eraakasi ngikaru keng ngitomwon-arei ka ngikan. Toliwor ngesi ekapolon alo Yerusalem a ngikaru a ngitomwon-arei ka ngikan-koomwon. Anyaritae itiokeng Abija nakookeng a Sekaria.

²Kiwap ngesi ekitetemes a ekapolon Daudi, alo arai apaakeng, tosub ngakiro na ejoikinito Ekapolon Akuj.

³Elap lo ekingaren a ekaru alo aliworor Esekia ekapolon, abu ngesi tangaa nabo ngidorin a akai a Akuj sodi tobongokinoe akiduk.

⁴Tochunak ngesi ngimurok ka Ngilawi nalaar na alo kide akai a Akuj

⁵sodi kisuruor kesi kaina. Tolim tama, “Esi Ngilawi, kitaleunos sodi kitaleut akai a Ekapolon Akuj ana erai Akuj kata apaakus. Tolemasi ibore daang ni inyasuni akai a Akuj.

⁶Peamunosi kolong taapaayok Ekapolon Akuj na erai Akuj yok, sodi tosuba ngakiro napeajoikinito ngesi. Tongero kesi ngesi, tomuleno ni ibooyo Ekapolon Akuj.

⁷Togolo kesi ngidorin a akai a Akuj, kimiekis ngataae edungeete. Apot kesi nyiinom emitina kori nyiipeyoto ngakipeyos alokai a Akuj a Ngisirael.

⁸Kotere ngakiro nguna, angoiki Ekapolon Akuj Yuda ka Yerusalem. Asubea kesi ngakiro na eteriangakis ka akitoem itwaan daang, loger lo tokona iteeto esi ngikulepek.

⁹Aario taapaayok alojie sodi torikoe ngaberu yok ka ngide yok.

¹⁰“Atiaku tokona ayong achamakin ka Ekapolon Akuj na erai Akuj a Ngisirael, sodi nyikingoikinea ngesi ngoni nabo.

¹¹Ngide kang, nyiimamakis kainyo kiseu Ekapolon Akuj esi akinom emitina ka akirik ngitunga akilipeenen ngesi.”

¹²Ngilawi lugu kesi ayakasi neni. Alomachar a Koas, ayakasi Maas lokookeng a Amasai ka Yoel lokookeng a Asaria. Alomachar a Merari, ayakasi Kich lokookeng a Abudi ka Asaria lokookeng a Yealelel. Alomachar a Gerichon, ayakasi Yoa lokookeng a Simuna ka Eden lokookeng a Yoa.

¹³Alomachar a Elisapan, ayakasi Chimuri ka Yeul. Alomachar a Asap, ayakasi Sekaria ka Matania.

¹⁴Alomachar a Eman, ayakasi Yewul ka Chimei. Alomachar a Yedusun, ayakasi Chemaya ka Usiel.

¹⁵Apot ngitunga ngulu tochunakis Ngilawi luche sodi kitaleunos daang. Ani erumor tosuba kesi ngakiro nasek adungunit ekapolon, sodi kisiakis akitaleun akai a Akuj, itemem ka etal a Ekapolon Akuj.

¹⁶Tolomasi ngimurok tooma akai akitaleun, kipudosi kesi ibore daang nipeetaleuno kiwaakis nalaar a akai a Akuj, sodi yaasi Ngilawi nikalapatan a ere, nadipo a Kidiron.

¹⁷Esiakinio etich ngolo akolongit na ekingaren a elap alo ekingaren. Ani akolongit na ngakan-kauni, torumor daang aapei ka amaniyat na elomarere kai a Akuj. Ani erumor tosuba nabo etich a ngirwa a ngiche a ngikan-kauni tanang akolongit na ngatomon ka ngakan-kapei a elap kangolo, esubanakinete akai a Akuj kilipere.

¹⁸Toloto Ngilawi nia Esekia tolimokis tamasi, “Kirumo sua akitaleun akai a Akuj daang aapei ka ekeno a ngakipeyos ana inomio, ka emeesa a ngamugati a Akuj ta ngiboro kech daang.

¹⁹Kibuu sua tani ngiboro daang lukolong alemarit ekapolon Aas ngirwa lupeamunor ngesi Akuj. Kitaleu sua ngiboro ngulu nabo. Eyakasi daang ngaren ekeno a ngakipeyos a Ekapolon Akuj.”

²⁰Tonyou ekapolon Esekia atipei tochunak ngikapolok a ere sodi kirukosi kai a Akuj. Tolemut kesi ngimongin ngikan-kaarei, ka ngimesekin ngikan-kaarei, ka ngimesekin luuchik ngikan-kaarei ta ngikora ngikan-kaarei.

²¹Araakasi ngibaren ngulu ngakipeyos na elemarere ngasechesea a ngitunga a awi a ekapolon, ka ngitunga a Yuda ta akitaleun akai a Akuj. Tolimok ekapolon ngimurok lu araakasi ngalesea a Aron atamar kipeyoto ngibaren ngulu alokeno toliworos ngakipeyos.

²²Taara ngimurok ngimongin mono, totupuut ngimesekin, totupuut ngimesekin luuchik, sodi towatakis ngaakot a akipeyos kadaang lokeno.

²³Ani erumor yaasi ngikora nia ekapolon ka ngitunga luche lu elipito, sodi kidokokis ngitunga ngulu ngakan kidiama lokora.

²⁴Ani erumor taara ngimurok ngikora sodi tobukokis ngaakot a ngikora lokeno toliwor akipeyos na elemarere ngasechesea a ngitunga kadaang, kainyo adungunit sek ekapolon atamar tolemunae ngakipeyos na inomio ka na ngasechesea kotere Ngisirael daang.

²⁵Kiwap ekapolon ngakiro nakolong alimokini Ekapolon Akuj ekapolon Daudi, kisitoru nia Gad alo arai ekadwaran a ekapolon, kisitoru nabo nia ekadwaran Nasan. Kitowo Esekia Ngilawi alokai a Akuj etingito ngagitae ka ngasua.

²⁶Ekote ngiboro ngulu lukolong atingit ekapolon Daudi. Apot ngimurok towaa kaneni etingito tani ngaburucho.

²⁷Abu Esekia todung atamar tolemunae akipeyos na inomio. Ani isiakinio akinom akipeyos, toeokis ngitunga ipurosi Ekapolon Akuj, sodi kisiakis ngikaeok akutakin ngaburucho ka ngiboro luche daang.

²⁸Kilipa ngitunga daang lu ayakasi neni toeos tanang esaa lo enomere ngakipeyos daang.

²⁹Sodi toriediko ekapolon Esekia ka ngitunga luche daang kilipa Akuj.

³⁰Apot ekapolon ka ngikapolok luche a akwap tolimokis Ngilawi atamar toeonokis Ekapolon Akuj ngieosio a ekipur lu kolong egiri Daudi ka lu egiri ekadwaran Asap. Sodi toeokis ngitunga elakara lokojokon, toriediko kilipa Akuj.

³¹Tolimok Esekia ngitunga tama, “Ani aloger italeunotor esi, yautu ngakipeyos nabuakinet Ekapolon Akuj alakara.” Apot kesi kiirasi ngakiro nguna tosubakis. Yaut tani ngiche ngibaren a akiding kech toliworos ngakipeyos na inomio.

³²Yaut kesi ngimongin ngitomwon-kaarei, ka ngimesekin amiat apei, ka ngimesekin luuchik ngamiae ngaarei, inut Ekapolon Akuj toliworos ngakipeyos na inomio.

³³Yaut nabo ngimongin ngamiae ngakan-kapei, ka ngimesekin ngabunge ngauni, toliworos ngakipeyos na enyamete ngitunga.

³⁴Ani aloger akidiokioto ngimurok, peapedorete akiar ngibaren ngulu daang. Apot Ngilawi kingarakis kesi tanang ni arumoror etich. Esaa ngolo, kitaleuno ngimurok lukaalak. (Ekiuna Ngilawi noi anakitaleun kech akidwang ngimurok.)

³⁵Epeyoenete ngimurok ngakipeyos na inomio nginerin daang aapei ka akinom nikatoronon a ngakipeyos ana anyamete ngitunga ta emuna lo abukonokinio nakipeyos na inomio. Sodi kisiakinae akilipeenen alokai a Akuj nabo.

³⁶Talakaros ekapolon Esekia ka ngitunga, kainyo abu Akuj kingarak kesi arumor etich ngolo daang atipei.