Read turkana 2 Ngakiro a Ngirwa 3 Bible Online

2 Ngakiro a Ngirwa 3 - turkana bible

2 Ngakiro a Ngirwa 3

¹Aseunit sek ekapolon Daudi lo erai apakeng a Solomon ni edukokinio akai a Akuj. Arai neni kidiama emoru a Moria alo Yerusalem, nikolong abunio Ekapolon Akuj nia Daudi. Neni ngesi nikolong etiliworit itwaan nibe Arauna nia ekitela a Ngiebus niramet ngalemet keng. Kisiak ekapolon Solomon adukuoru

²elap lo a ngiarei ekaru lo a nguomwon lo araakar ngesi ekapolon.

³Eger logo ngesi etemio ekapolon Solomon akai a Akuj na aduki ngesi. Arai aoyau ngamitae ngatomwon-arei ka ngakan-kaarei tarai ewae louriyen ngamitae ngakan-koomwon.

⁴Arai aoyau a amaniyat ana elomarere tooma ngamitae ngakan-koomwon, ariyan ka ewae louriyen a akai a Akuj, tarai aoyau na alokidiama ngamitae ngatomwon-kan ka ngoomwon. Ewae lo alotooma a amaniyat kangina, elalatae a egolit bon.

⁵Adukitoe amaniyat naapolon a ngakito a ngidomou sodi kilalae a egolit bon, sodi kitakae asir a ngingolea ka ngiriko.

⁶Kitisir Solomon akai a Akuj a ngamoru anaajokak alalak ngaropiyae ka egolit lo ayaunio anakwap enyaritae Paripaim.

⁷Kilala ngesi ngikwaasea a akai a egolit, ka ngakito, ka nilomaret ta ngidorin, sodi kitisir ngikwaasea kiwaak ngiborei lua ngabeben.*g**

⁸Amaniyat na alotooma na enyaritae ni italeuno noi, arai aoyau ngamitae ngakan-koomwon, tarai ewae louriyen ngamitae ngakan-koomwon, ariyan ka ewae louriyen a akai. Egolit lo aburuchiarere ewae lo italeuno noi, eporit apotis keng ngataanea ngatomwon-arei.

⁹ Arai apotis a egolit alo asubere ngisumarea ngagiramea 570. Aburuchiaritae ngikwaasea a ngamaniyae ana alokidiama dang a egolit.

¹⁰Todungok ekapolon ngitunga atamar tosubakis ngiborei lua ngabeben ngiarei anasua toburuchiasi a egolit, sodi kiwaakinae lowae lo italeunitoe noi.

¹¹Arai aoyau a ngabeben kech epetaritae ngamitae ngakan-koomwon. Arai abeben a ipei kech ngamitae 2.2. Atapit abeben ngina ekwaas a akai, kiriamito ka abeben a ibore aniche alokiding akai.

¹²Ibore niche, arai abeben keng apei ngamitae 2.2. Atapit abeben ngina ekwaas a akai, kiriamito ka abeben a ibore ani ekingaren alokiding akai.

¹³Arai aoyau a ngabeben kanguna epetaritae ngamitae ngakan-koomwon. Awaasi ngiborei ngulu ekienyikinito ekidor.

¹⁴ Tosubunae awaru na erapere ewae lo italeuno noi. Asubunio a ngawarui anakaanikak ajokak ka ngawarui nache na eraakasi napusiek, ka napusiek-arengak ta naarengak, sodi todonyokinoe asir a ngiborei alu a ngabeben.

¹⁵Tosubak ekapolon ngapirio ngaarei. Arai aoyau a apei ngamitae ngatomon ka ngakan ka anus, sodi kitowo kesi alongaren akai a Akuj. Ayakasi ngapirio nguna ngiwaitin lua ngakies lu arai aoyau a epei ngamitae 2.2.

¹⁶Etisiritoe kidiama ngapirio nguna a ngiriko alu edanyitae ka asir na ikwaan ka ngalam amiat apei na asubunitae a ngasua ananyangayek.

¹⁷Kitowae ngapirio nguna alowaitin a ekidor a akai a Akuj. Kitowo apei alokuju, nache alokwap, sodi tanyara na alokuju Yakin, tanyara na alokwap Boas.[2]