Read turkana 2 Ngakiro a Ngirwa 30 Bible Online

2 Ngakiro a Ngirwa 30 - turkana bible

2 Ngakiro a Ngirwa 30

¹Tomea Esekia ngitunga nia Ngisirael kadaang ka Yuda, kigir ngabaruae tani nia ngitunga a Epiraim ka Manase atamar pot kai a Ekapolon Akuj alo Yerusalem tosubakineta esukukuu a Adeparet torimare Ekapolon Akuj na erai Akuj a Ngisirael.

²Apot ekapolon Esekia ka ngikapolok a arieng keng ta ngitunga daang a Yerusalem, tachamakin atamar enyamio esukukuu a Adeparet elap lo a ngiarei.

³Peapedorete sek kesi akinyam esukukuu a Adeparet ngirwa lu asakitere kainyo peetaleuno ngimurok lukaalak, nabo peachunakina ngitunga lukaalak Yerusalem.

⁴Tojoikis ekapolon ka ngitunga ngakiro na arekinito kesi nguna,

⁵sodi tanyaraut kesi Ngisirael daang napei alo Dan tanang Beer-cheba. Tanyaraunae kesi kiriamariama Yerusalem akinyam esukukuu a Adeparet. Alalak ngitunga lu anyaraunitae noi, nyepona lukaalak loger ngolo a ache.

⁶Apot ngitunga lu ameario toloto wadaang anakwap a Isirael ka Yuda etingito ngabaruae a ekapolon ka ngikapolok a arieng keng. Egiritae ngabaruae nguna kona: “Ee Ngisirael, lu ibuchunosi alojie a ngikapolok a Asiria. Tobongutu tokona nia Ekapolon Akuj ana erai Akuj a Aburaam, ka Isaka ta Yakobo, sodi tobongunio ngesi nikus.

⁷Nyiikokis taapaakus ka Ngisirael luche lukolong peamunosi Ekapolon Akuj na erai Akuj kech, sodi kirira ngesi kesi lokojokon, loger lo tokona iteeto esi.

⁸Nyiiliworosi lukechanak loger lokolong araakatar kesi, nakaneni kiwapa ngakiro a Ekapolon Akuj. Potu kai keng na eyei Yerusalem. Etaleu Ekapolon Akuj na erai Akuj kus akai ngina jik. Potu kilipa ngesi sodi nyikingoikinea ngesi esi nabo.

⁹Ani kibongut esi nia Ekapolon Akuj, epete ngisien lotunga lu erikorito ngiyenet kus sodi kimiekis kesi tobongut nawi, kainyo ejok Ekapolon Akuj na erai Akuj kus nabo erai na ngisien. Ani kibongut esi nikeng, kichamuni ngesi esi.”

¹⁰Apot ngitunga lu amearitae toloto lorerea daang anakwap a ngitela a Epiraim ka Manase tananga nakwap a ekitela a Sebulun alokwap, nakaneni apot ngitunga tokianatar kesi toboliatar.

¹¹Ayakasi ngitunga ngidikidio a ngitela a Acher, ka Manase ta Sebulun lu apot tachamut alosit Yerusalem.

¹²Abu Akuj tosub etich tani anakwap a Yuda sodi kimorik ngitunga, kiwapa ngakiro na adungunete ekapolon ka ngikapolok a arieng keng.

¹³Apot ngitunga lukaalak noi tochunun Yerusalem akinyam esukukuu a ngamugati anapadok.

¹⁴Apot kesi tolemasi ngikenoi daang lukolong epeyoore ngakipeyos ka akinom emitina alo Yerusalem, yaasi tachakakis nadipo a Kidiron.

¹⁵Akolongit na ngatomon ka ngoomwon a elap alo a ngiarei, apot kesi taara ngimesekin luchik lu araakasi ngakipeyos a Adeparet. Apot ngileech kiruma ngimurok ka Ngilawi lusek peetaleuno, sodi kitaleunos kesi ka akipeyore ngakipeyos na inomio alokai a Akuj.

¹⁶Apot kesi pena lotichisio kech alokai a Akuj, itemem ka etal a Musa alo arai itwaan a Akuj. Apot Ngilawi kikobakis ngimurok ngaakot a ngibaren alu epeyoo. Towatakis ngimurok ngaakot nguna lokeno a ngakipeyos.

¹⁷Ani aloger araakatar ngitunga lukaalak lupeetaleuno, peapedorete akiar ngimesekin a esukukuu a Adeparet, taara Ngilawi ngimesekin ngulu sodi kitaleut tolemikis Ekapolon Akuj.

¹⁸Ayakasi ngitunga lukaalak lua ngitela a Epiraim, ka Manase, ka Isakar ta Sebulun lupeetaleuno, nakaneni anyamete kesi esukukuu a Adeparet peerichunito ngitalio keng, kainyo elipakinit sek ekapolon Esekia kesi ebala,

¹⁹“Ee Ekapolon Akuj na irai Akuj kata apaakosi, kotere ajokis kon torimak itwaan daang ni kilipit iyong a etau keng kadaang tani bo pekitaleuno.”

²⁰Kiira Ekapolon Akuj akilip a Esekia sodi torimak ngitunga, nyiirira kesi.

²¹Apot ngitunga lu achunakina Yerusalem tanyama esukukuu a ngamugati anapadok a ngirwa a ngikan-kaarei, tanyama a alakara anakaalan. Akolongit daang, apot Ngilawi ka ngimurok kipuro Ekapolon Akuj a ngikilinga kech kadaang.[19]

²²Abu Esekia kipur Ngilawi kotere etich loajokon loa akisilip ngitunga Ekapolon Akuj. Adaunet a ngirwa alukan-kaarei, alu epeyooto kesi ngakipeyos ipurosi Ekapolon Akuj na erai Akuj kata apaakech,

²³apot kesi totiakut akinyam esukukuu ngolo a ngirwa a ngiche a ngikan-kaarei. Apot kesi tanyama esukukuu ngolo a alakara.

²⁴Abu ekapolon Esekia nak ngitunga ngimongin abunget apei ka ngimesekin ngabunge ngakan-kaarei sodi taara tanyama. Apot ngikapolok a arieng keng nakis ngitunga ngimongin ngiche abunget apei ka ngimesekin ngabunge ngatomon. Kitaleunos ngimurok lukaalak.

²⁵Talakaros ngitunga daang lu aponito alo Yuda ka ngimurok, ka Ngilawi, ka ngitunga lu aponito alokwap ta ngitunga a ngakwapea anache lu alomito nakwap a Isirael ka Yuda.

²⁶Min alakara natiapolon lore a Yerusalem, kainyo peasubakina ngakiro na ekote nguna a ache nakolong adangaror ngirwa lua Solomon alo arai lokookeng a Daudi.

²⁷Tonyout ngimurok ka Ngilawi topiasi ngitunga. Anawi keng anadis, abu Akuj kiira ngakilipasinei kech tacham.