Read turkana 2 Ngakiro a Ngirwa 31 Bible Online

2 Ngakiro a Ngirwa 31 - turkana bible

2 Ngakiro a Ngirwa 31

¹ Arumoret a ngakiro kanguna kadaang, apot Ngisirael daang lu ayakasi neni, toloto lorerea a Yuda daang tobwangabwangaasi ngapirio a ngamoru ka atubutub ngakisikwaanet a akuj anaberu anabe Achera, sodi kinyasut ngikenoi lu ipeyonokinere ngakujo nagelayek. Apot kesi tosuba ngakiro napei nguna anakwap a Yuda kadaang, ka ngakwapea a Benjamen, ka Epiraim ta Manase. Ani erumor tobongosi kesi nawiyei kech.

²Abu ekapolon Esekia torek atukuoru a ngimurok ka Ngilawi, totiakanak ipei kech daang etich keng. Ngitichisio ngulu kesi akipeyore ngakipeyos na inomio, ka ngakipeyos a ekisil, akilipeenen alokai a Akuj, akipuro Akuj ka abuakin alakara alowaitin alugelagelae a akai a Akuj.

³ Abu Esekia tolemuunu alosipaan keng ngibaren lu alemunio eraakasi ngakipeyos na inomio ataparach daang ka atabong daang, ka lu epeyoo ngirwa lua Sabato, ka ngirwa lu esukukuu alo eanyungarere elap ta ngisukukui luche lu esakit etal a Ekapolon Akuj.

⁴Todungok ekapolon ngitunga a Yerusalem atamar tolemanakisi ngimurok ka Ngilawi ngalemunet na eraakasi ngakech, sodi tolemunotor kesi loger lo esakitor etal a Ekapolon Akuj.

⁵Napei adungunere ngakiro nguna, apot Ngisirael yaut ngainakinet na araakasi ngikinyam kech luajokak, ka emuna, ka akimiet a ngikito, ka akimiet a ao, ka ngalemet nache ta ngalemunet[20] a ngiboro kech kadaang.

⁶Apot tani ngitunga daang lu alomito lorerea a Yuda yaut ngalemunet a ngaatuk kech ka ngamesekin, yaut tani ngainakinet nakaalak noi sodi kitaleut toliworos ngaka Ekapolon Akuj ana erai Akuj kech.

⁷Esiakinete kesi ayaunun ngainakinet elap lo a nguuni sodi kidiatas tanang elap lo a ngikan-kaarei.

⁸Ani ingolikinete ekapolon Esekia ka ngikapolok a arieng keng etiae a ngiboro alu alemunio, apot kesi kipuro Ekapolon Akuj ka Ngisirael lu eraakasi ngitunga keng.

⁹Abu ekapolon kisuruor ngimurok ka Ngilawi ngakiro a ngainakinet kanguna.

¹⁰Abu emuron loapolon lo anyaritae Asaria lo arai alesit a Sadok, tolimok ekapolon tama, “Napei kolong esiakineta ngitunga ayaunun ngadekon kech kai a Akuj, kimuj sua kimwoko nabo edeun ngiboro lukaalak. Eyakasi ngiboro lugu kainyo epiarit Ekapolon Akuj ngitunga keng.”

¹¹Todungok ekapolon Esekia kesi atamar tosubakis ngidulae alokai a Akuj,

¹²sodi kiwaakis ngainakinet daang ka ngalemunet kikachakinae ejok. Abu Elawit epei lo anyaritae Konania toweik ngiboro ngulu. Lokaatokeng lo anyaritae Chimei ngesi engarakinit ngesi.

¹³Ngilawi ngitomon kesi aseunitae akisub etich ka kesi. Anyaritae kesi Yeyel, ka Asasia, ka Naas, ka Asael, ka Yerimos, ka Yosabad, ka Eliel, ka Isimakia, ka Maas ta Benaya. Asubio ngakiro nguna daang loger lo adungunitotor ekapolon Esekia ka Asaria lo arai emuron loapolon.

¹⁴Elawit lo anyaritae Kore lokookeng a Imuna lo arai asiger naketeon ekidor lo alo kide akai a Akuj, ngesi aweikinit ngainakinet na alemanakinio Ekapolon Akuj ka akikor ngainakinet nguna.

¹⁵Alorerea aluche alu alomito ngimurok, ayakasi Ngilawi lu engarakinito ngesi. Anyaritae kesi Eden, ka Miniamin, ka Yechua, ka Chemaya, ka Amaria ta Chekania. Akoranakinete kesi Ngilawi luche akimuj kitiriyana itemem ka ngitichisio lu atiakanakinitae kesi,

¹⁶meere itemem ka ngimacharin. Akoranakinio akimuj ngina ngikiliok daang lu araakasi ngikaru kech ngitomwon-uni[21] kori lu eporito, lu asubete ngitichisio alokai a Akuj akolongit daang itemem ka eger lo atiakanakinitae.

¹⁷Atiakanakinio ngimurok ngitichisio a ngimacharin, totiakakinae Ngilawi lokech a ngalooso.

¹⁸Kigirae kesi daang aapei ka ngaberu kech, ka ngide ta ngitunga luche lu erikito kesi, kainyo erichunito kesi akitaleun.

¹⁹Ayakasi ngitunga lu asubete etich lo akikor akimuj. Akoranakinete kesi ngikiliok daang lua ngawiyei a ngimurok, ka itwaan cha daang ni egiritae lomacharin a Ngilawi.

²⁰Anakwap kadaang a Yuda, abu ekapolon Esekia tosub ngakiro na eyookino nabo na ajoikinito Ekapolon Akuj na erai Akuj keng.

²¹Tojoker etich keng daang, kainyo ibore ni asubi ngesi daang kotere akai a Akuj, kori Etal, asubi ngesi kotere amuno ka alemuna ani Akuj.