Read turkana 2 Ngakiro a Ngirwa 33 Bible Online

2 Ngakiro a Ngirwa 33 - turkana bible

2 Ngakiro a Ngirwa 33

¹Araakasi ngikaru a Manase ngitomon ka ngiarei na aliworor ngesi ekapolon a Yuda. Toliwor ngesi ekapolon alo Yerusalem a ngikaru a ngitomwon-kan ka ngikan.

²Tosechak ngesi Ekapolon Akuj, kiwap ngakiro nakakadakinak a ngibukui alusek etwarakini Ekapolon Akuj anakwap na alooso Ngisirael ngaren.

³Tobongonok ngesi akiduk ngakais nakolong abwangabwangaari apakeng na araakasi ngakilipasinei ngakujo nagelayek. Toduk ngesi ngikenoi lu ilipitere Baal. Tosubak ngesi ngakisikwaanet a akuj anaberu anabe Achera, sodi kilip ngikanyer.

⁴Toduk ngesi ngikenoi lu ipeyonokinere ngakujo nagelayek tooma kai a Akuj, nikolong abala Ekapolon Akuj ejoikinit kelipere ngesi jik.

⁵Toduk ngesi ngikenoi lu ilipitere ngikanyer nalaarin naarei a akai a Akuj.

⁶Kipeye ngesi talokookeng toliworos ngakipeyos na inomio anadipo a Inom. Adwareene ngesi tomuroe. Aanyununi ngesi ngikekeriak ka ngimurok. Tosechak ngesi Ekapolon Akuj noi kitilili.

⁷Kiwaak ngesi ekisikwaane a akuj anasubuna tooma kai a Akuj, nikolong alimokini Akuj Daudi ka lokookeng Solomon tama, “Alokai kana, kanege alo Yerusalem ngesi aseu ayong anakwap kadaang ana ngitela alutomon ka ngiarei a Ngisirael atamar kelipere ayong.

⁸Ani kiwapa Ngisirael ngakiro daang na adung ayong, kirichakis ngitalio daang lukolong etaanyuni ekasuban etich kang Musa kesi, nyemiekini ayong kesi itwarakinio anakwap ana kolong ainakini ayong taapaakech.”

⁹ Abu Manase torikok ngitunga a Yuda akisub ngasechesea naaronok noi na idwangito na asubete ngibukui lu etwarakini Ekapolon Akuj anakwap na alooso Ngisirael ngaren.

¹⁰Kichikichik Ekapolon Akuj Manase ka ngitunga keng, nakaneni towout kesi akiirar.

¹¹Sodi kimiek Ekapolon Akuj ngikarikok a ngasigerea a Asiria kitijikis Yuda. Kirumut kesi Manase, todupanakis ngimutuin nakwaan keng, toena a ngiriko, sodi torikosi Babilon.

¹²Ani eanyuni ngesi ngichan ngulu, abu kitiditeun kimaima Ekapolon Akuj na erai Akuj keng sodi kilip esaki kingarak ngesi.

¹³Kiira Akuj akilip a Manase sodi tobua ngesi Yerusalem aliwor ekapolon nabo. Toyen Manase atamar Ekapolon Akuj erai Akuj.

¹⁴Arumoret kanguna, abu Manase kiatak aoyau a awas ana alokinga, alowae alo alo kide ere a Daudi, napei anadipo ana eyei diyete elelea a Gion toten kwap lokidor a Ekolia ta ewae lo enyaritae Opel. Abu ngesi kiwaak ngikarikok a ngasigerea toweikis ngasigerea alorerea kadaang a Yuda alu adukitoe ngawasea.

¹⁵Tolema ngesi alokai a Akuj ngakujo nagelayek ka ekisikwaane lokolong ewaakinit ngesi neni, ka ngikenoi lu ipeyonokinere ngakujo nagelayek, lusek adukitoe lomukura lo adukitoe akai a Akuj ta ngikenoi lu ayakasi lowaitin luche a Yerusalem. Kipudo ngesi ngiboro ngulu daang alore tachaka.

¹⁶Abu ngesi tani tobongonok akiduk ekeno lo elipeenere Ekapolon Akuj, sodi kipeyo ngakipeyos a ekisil, ka nabuakinet Akuj alakara. Todungok ngesi ngitunga a Yuda daang atamar kilipa Ekapolon Akuj na erai Akuj a Ngisirael.

¹⁷Tani na arubakinitotor ngitunga ipeyoenete ngakipeyos alowaitin aluche elipeenere, arai Ekapolon Akuj bon epeyonokinete kesi ngakipeyos nguna.

¹⁸Ngakiro nache daang na asubi Manase, ka akilip na elipit ngesi Akuj keng ta ngakiro na esuruorete ngikadwarak ngesi alokiro a Ekapolon Akuj ana erai Akuj a Ngisirael, igiritae nakitab na enyaritae Ngakiro a ngikapolok a Isirael.

¹⁹Akilip a ekapolon, ka eger lo atachunea Akuj, ka ekimar a ngasechesea ana kolong asubi ngesi eringa nyelunga akisech, ka ngakiro naaronok na asubi ngesi, ka ni elipeenere ngakujo nagelayek, ka ngakisikwaanet a akuj anaberu anabe Achera ana kolong asubi ngesi ta ngakujo nasubuna na elipit ngesi, igiritae daang nakitab na enyaritae Ngakiro a ngikadwarak.

²⁰Totoan Manase tonukakinae kai a ekapolon sodi kilunyokin lokookeng lo anyaritae Amon nados keng toliwor ekapolon.

²¹Araakasi ngikaru a Amon ngitomwon-arei ka ngiarei na aliworor ekapolon a Yuda. Toliwor ngesi ekapolon alo Yerusalem a ngikaru a ngiarei.

²²Loger a Manase alo arai apakeng, abu Amon tosechak Ekapolon Akuj, kilip ngakujo nasubuna nakolong elipit apakeng.

²³Towou ngesi akitiditeun toreeun nia Akuj loger lo kolong etiditeunor apakeng nakaneni abu ngesi tosub akisech noi akidwang apakeng.

²⁴Apot ngikapolok a arieng a Amon totuko, sodi taarakis ngesi kai keng.

²⁵Taara ngitunga a Yuda ngikaarak a Amon sodi kitiliwosi lokookeng lo anyaritae Yosia ekapolon.