Read turkana 2 Ngakiro a Ngirwa 34 Bible Online

2 Ngakiro a Ngirwa 34 - turkana bible

2 Ngakiro a Ngirwa 34

¹Araakasi ngikaru a Yosia nguuni na aliworor ekapolon a Yuda. Toliwor ngesi ekapolon alo Yerusalem a ngikaru a ngitomwon-uni ka epei.

² Tosub Yosia ngakiro na ajoikinito Ekapolon Akuj. Kiwap ngesi ekitetemes a apaakeng Daudi, kirichu ngitalio a Akuj daang lokojokon.

³Ekaru lo a ngikan-kauni lo araakar Yosia ekapolon, eringa ngesi edit noi, abu ngesi kisiak akilip Akuj a apaakeng Daudi. Adaunet a ngikaru a nguomwon, kisiak ngesi akinyasun ni ilipeenere ngakujo nagelayek, ka ngakisikwaanet a akuj anaberu anabe Achera ta ngakujo nache daang nasubuna.

⁴Abu ngesi kitobwangabwanga ngitunga keng ngikenoi lu elipitere Baal ka ngikenoi lu enomere emitina lu ayakasi diyete neni. Kiriata kesi ngakisikwaanet a Achera ka ngakujo nache nasubuna tanyapidido, ani erumor kiealakis apua nalielin a ngitunga alu kolong epeyonokinete ngakujo nguna.

⁵Abu ngesi kinom ngakoyo a ngimurok a ngakujo anagelayek alokenoi alu kolong epeyoeneto kesi. A eger kangolo, abu ngesi kitaleu nabo Yuda ka Yerusalem.

⁶Abu ngesi tosub ngakiro napei nguna alorerea ka ngiwaitin lu enyasuna a Manase, ka Epiraim ta Simeon, toten kwap tanang nakwap a Naputal.

⁷ Anakwap ana ngitela alu alokwap kadaang, abu ngesi tobwangabwanga ngikenoi a ngakipeyos a Achera, kirie ngakujo nasubuna tanyapidido, sodi kieala ngikenoi daang lu enomere emitina. Ani erumor tobong ngesi Yerusalem.

⁸Ekaru lo a ngitomon ka ngikan-kauni lo araakar Yosia ekapolon, arumoret ngesi akitaleun akwap ka akai a Akuj ani atuborea akilipit ngakujo nagelayek, abu ngesi tomea ngitunga nguuni abongonokin akiduk akai a Ekapolon Akuj. Anyaritae kesi Chapan lokookeng a Asalia, ka Maaseya lo arai ekapolon a Yerusalem ta Yoa lokookeng a Yowaas lo arai ekegiran.

⁹Apon nakinae emuron loapolon lo anyaritae Ilikia ngaropiyae na ediauniyete Ngilawi lu eyokiyete ngidorin alokai a Akuj. (Ediauniyo ngaropiyae nguna alotunga a Epiraim, ka Manase, ka ngitela luche lua lokwap, ka ngitunga a Yuda, ka Benjamen ta Yerusalem.)

¹⁰Ani erumor kipotoroe ngaropiyae nguna nakinae ngikiliok luuni lu aweikinito etich lo a abongonokin akiduk akai a Akuj. Nakis kesi ngaropiyae nguna

¹¹ngikadukok a ngakito, ka ngikadukok luche sodi togieleta ngamoru ka ngakito na ebongonokinere akiduk ngakais nakolong emiekinete ngikapolok a Yuda ebosiarete.

¹²Araakasi ngitunga lu asubete etich ngolo lu emunoi noi. Aweikinito Ngilawi nguomwon kesi, Yaas, ka Obadia lua emachar a Merari ta Sekaria ka Mechulam lua emachar a Koas. (Araakasi Ngilawi daang lukaeok noi.)

¹³Aweikinito Ngilawi ngiche ngitunga lu ewokuuniyete ngiboro luduket, ka aweikin ngitunga lu asubete ngitichisio lugelagelae, taraakas ngiche ngikegirak ekimar a ngiboro, taraakas ngiche ngikeyokok a ngidorin.

¹⁴Ani esaa lo epudunere ngaropiyae alokeru alo alotooma akai a Akuj, abu Ilikia taanyu akitab a etal a Ekapolon Akuj. Etal ngolo lokolong ainakini Akuj Musa.

¹⁵Tolimok Ilikia Chapan tama, “Aanyu ayong akitab a etal alokai a Akuj.” Nak Ilikia Chapan akitab

¹⁶sodi yaa Chapan nia ekapolon, tolimok tama, “Kisub sua etich daang lokolong kidungokini iyong sua.

¹⁷Kilemu sua ngaropiyae na ayakasi kai a Akuj kiinak ngikasubak etich ka ngikaweikinak kech.”

¹⁸Ani erumor kiatak Chapan tama, “Akitab ache naga kainakini ayong Ilikia.” Abu Chapan kisomak akitab ngina epupokinit ekapolon.

¹⁹Ani iirari ekapolon ngakiro na esomao anakitab, tochilichilia ngiworui keng eriangakina.

²⁰Abu ekapolon tanyara ngitunga lugu, Ilikia ka Aikam lokookeng a Chapan, ka Abidon[24] lokookeng a Mikaya, ka Chapan lo arai ekegiran a ngikesio ta Asaya lo arai emeanara a ekapolon, todungok tama,

²¹“Kapesi tanyarata Ekapolon Akuj kotere ayong ka ngitunga a Yuda daang, toyena eger a ngakiro a akitab kana. Kingoikinit Ekapolon Akuj ngoni kainyo nyesuba taapaayok ngakiro na igiritae nakitab naga, loger lo esakitere.”

²²Loger lo adungunio ekapolon, apot Ilikia ka ngitunga luche ngulu toloto aanyun aberu na anyaritae Ulida. Arai ngesi akadwaran na alomit lowae lo a Yerusalem lo aringa edukio. (Lokile keng lo anyaritae Chalum lo arai lokookeng a Tikipa, tarai etatait a Araas, ngesi aweikinit asaduku na ngiworui a akai a Akuj.) Kisisakinae Ulida ngakiro na asubakinosi,

²³sodi tolimok ngesi kesi tama, “Ebala Ekapolon Akuj na erai Akuj a Ngisirael kona, ‘Tolimokisi itwaan ni kimeuni esi ni ayei ayong

²⁴atamar ebala Ekapolon Akuj kona, kingolik a, ayauni ayong ngakiro naaronok Yerusalem aapei ka ngitunga daang lu eyakasi neni, ayauni ngilam lu igiritae nakitab na esomakinio ekapolon a Yuda.

²⁵Kangero kesi ayong epeyonokis ngakujo ngache ngakipeyos. Ketongoa kesi ayong ketilil a ngakiro ana esubete. Angoik ayong Yerusalem anyunyurikin, emam kona etubor angoit ngina.

²⁶Ani eliwor lo erai ekapolon elope, ngakiro nugu kesi alimuni ayong anikeng, ayong Ekapolon Akuj na arai Akuj a Ngisirael. Iirari iyong ngakiro na igiritae nakitab,

²⁷sodi tolung akisech kon ka akitiditeun alongaren kang. Ibu tochilichilaa ngiworui kon kigor, na iirarea atamar ayauni ayong ngakiro naaronok Yerusalem ka ngitunga lu eyakasi neni. Eira ayong akilip kon.

²⁸Kotere ngakiro nguna, nyianyungari iyong ngakiro naaronok na ayauni ayong Yerusalem. Epote kitoana iyong kerumor. Kemiekini ayong iyong totoan akaalimon.’ ” Tobongosi ngitunga ngulu nia ekapolon Yosia tolimokis ngakiro nguna.

²⁹Tanyarau ekapolon Yosia ngikarikok daang a Yuda ka Yerusalem ni ayei ngesi.

³⁰Kirukosi kesi daang kai a Akuj aapei ka ngimurok, ka Ngilawi ta ngitunga luche daang, lu eyeninikinitae ka lu nyeyenikinitae. Towo ekapolon alongaren kech kadaang kisomak akitab a achamunet na aanyunio alokai a Akuj.

³¹Towo ekapolon alodiyete apir napalem keng sodi tachamakin ka Ekapolon Akuj atamar ewapi ngakiro keng. Tacham ngesi a etau keng ka akiyar keng daang atamar erichakini ngitalio ka ngakiro daang na edungunit Ekapolon Akuj. Tacham ngesi atamar asubi ngakiro daang na achamunet loger lo igiritere nakitab.

³²Abu ngesi kitilim ngitunga a Benjamen ka ngitunga daang lu ayakasi Yerusalem atamar kirichakini achamunet. Sodi kiwapa ngitunga a Yerusalem ngakiro na asakitae anachamunet ana achamakinosi kesi ka Akuj kata apaakech.

³³Kinyasu ekapolon Yosia ngakujo nakakadakinak daang na ayakasi nakwap a Ngisirael. Ngirwa lu aringaakar ngesi eyari daang, abu ngesi todungok ngitunga akisub etich a Ekapolon Akuj ana erai Akuj kata apaakech.