Read turkana 2 Ngakiro a Ngirwa 35 Bible Online

2 Ngakiro a Ngirwa 35 - turkana bible

2 Ngakiro a Ngirwa 35

¹Tosubak ekapolon Yosia esukukuu a Adeparet alo Yerusalem erimar Ekapolon Akuj. Taara kesi ngibaren a esukukuu akolongit na ngatomon ka ngoomwon a elap alo ekingaren.

²Totiakanak ngesi ngimurok ngitichisio lu esubete alokai a Akuj, sodi kitiliwo lukaatinyok tosuba etich niajokon.

³Tolimok ngesi Ngilawi lu araakasi ngiketatamak a Ngisirael, taraakas nabo lu etaleuno ani Ekapolon Akuj, tolimok tama, “kiwaakisi asaduku a achamunet na italeuno tooma kai a Akuj nakolong aduki ekapolon Solomon lo arai lokookeng a Daudi. Nyejoikinit esi eringa idakeenete alosegeta kus, nakaneni tosuba tokona etich a Ekapolon Akuj ana erai Akuj kus, ka etich a Ngisirael alu eraakasi ngitunga keng.

⁴Kitebeikin itwaan daang nipalem keng alokai a Akuj, totiakas a ngimacharin itemem ka ngitichisio lukolong kitiakakini esi ekapolon Daudi ka lokookeng Solomon.

⁵Torekinos peneta ngiche lu ingarakinete ngitunga a ngawiyei-wiyei Alosirael.

⁶ Taara ngimesekin luuchik ka ngaanei a esukukuu a Adeparet. Kitaleunos sodi tosubakis ngakipeyos kiwapeta Ngisirael luche ngakiro nakolong adunguni Ekapolon Akuj kisitoru nia Musa.”

⁷Alosipaan keng, abu ekapolon Yosia kipakak ngitunga ngamesekin ka ngimesekin luuchik, ka ngikaalei lu anangito ngabunge ngatomwon-uni ta ngimongin ngabunge ngauni, nak tanyameta alosukukuu a Adeparet.

⁸Apot tani ngikapolok a arieng keng tolemut ngadekon kech nakis ngitunga ka ngimurok ta Ngilawi ngimesekin luuchik ka ngikaalei ngabunge ngaarei ka ngamiae ngakan-kapei, ka ngimongin ngamiae ngauni toliworos ngakipeyos a esukukuu a Adeparet.

⁹ Apot ngikapolok a Ngilawi lu anyaritae Konania, ka Chemaya, ka lokaatokeng lo anyaritae Nesanel, ka Achabia, ka Yeyel ta Yosabad, apot nakis Ngilawi ngimesekin luuchik ka ngikaalei ngabunge ngakan ka ngimongin ngamiae ngakan toliworos ngakipeyos.

¹⁰Ani erekinio ibore daang kotere esukukuu, apot ngimurok ka Ngilawi pena lotichisio kech loger losek adungunitor ekapolon.

¹¹Taarae ngimesekin luuchik ka ngaanei toyangasi Ngilawi, sodi towatakis ngimurok ngaakot lokeno.

¹²Ani erumor totiakakis kesi ngitunga a ngalooso ngibaren lu eliworosi ngakipeyos na inomio, sodi kipeyoto kesi loger lo igiritere lotal a Musa.

¹³Topeo Ngilawi ngakipeyos a esukukuu a Adeparet anakim itemem ka etal, sodi kitukulata ngakipeyos na etal anamoti ka ngagului ta ngapalaranga nabeleny, sodi yaasi akiring atipei tokorakis ngitunga.

¹⁴Arumoret kanguna, apot Ngilawi tolemut akiring nakech ka na ngimurok alu eraakasi ngalesea a Aron kainyo asubete ngimurok etich lokaalan tanang nakwaare, enomete kesi ngibaren lu enomio nginerin daang, kinomete tani nikatoronon a ngakipeyos kanguna.

¹⁵Ngilawi lukaeok lua emachar a Asap, ayakasi lowaitin lukolong alimokinit ekapolon Daudi kesi atamar pena. Anyaritae kesi Asap, ka Eman ta Yedusun lo arai ekadwaran a ekapolon. Ngasigerea na eteete ngidorin, nyerotokino kesi alotich kech kainyo apot Ngilawi luche tosubakis kesi esukukuu.

¹⁶Tosubakinae ibore daang akolongit ngina kotere akilip Ekapolon Akuj, irichunitae esukukuu a Adeparet ka akipeyore ngakipeyos na inomio alokeno, tosubae daang loger losek adungunitor ekapolon Yosia.

¹⁷Apot Ngisirael daang lu ayakasi neni tanyama esukukuu a Adeparet ka lo a ngamugati anapadok a ngirwa a ngikan-kaarei.

¹⁸Tadangaror ngirwa lukolong a ekadwaran Samuel, nyesubakina esukukuu a Adeparet loger logo. Emam alokapolok alu kolong engarenete lo asubaki nakanuan esukukuu a Adeparet lo ikoni logo, lo asubakinete Yosia, ka ngimurok, ka Ngilawi ta ngitunga a Yuda, ka Isirael ta lua Yerusalem.

¹⁹ Asubakinete kesi esukukuu ngolo ekaru lo a ngitomon ka ngikan-kauni lo araakar Yosia ekapolon.

²⁰Arumoret Yosia akisub ngakiro nguna daang kotere akai a Akuj, abu ekapolon a Misiri lo anyaritae Neko torik ngasigerea esaki akitijikin ere a Karikemich lo ayei lokwaas a angolol a Eupurate. Tasak Yosia akiratakin ngesi

²¹nakaneni abu Neko tomea ngitunga nia Yosia ebala, “Nyo kingoit ayong ka iyong, ekapolon a Yuda? Meere iyong abunit ayong akitijwore, pearai abunit akitijwore ngimoe kang. Kadungoki Akuj ayong atamar eburuburak. Ibakit Akuj alowae kang. Koto nyiitepeg Akuj, ani kemam kimunyari iyong.”

²²Nakaneni abu Yosia kimingak alosit lojie. Towou ngesi akiirar ngakiro na eruoro Akuj kisitoru nia Neko, sodi kiloch ngesi enape tolot ejie anaroatin a Megido.

²³Toguma ngimalea a Ngimisiri Yosia alojie. Todungok ngesi ngikasubak etich keng tama, “Yaarae ayong. Awanan ayong lokojokon!”

²⁴Tadakut kesi ngesi anaurukuk keng ana iritae, sodi kidokokis ngesi naurukuk keng na ngaarei. Kiwokoroe ngesi Yerusalem. Totoanik ngesi inaa sodi tonukakinae nalielin a ngikapolok. Apot ngitunga daang a Yuda ka Yerusalem kigoro tosutonokis kotere akitu keng.

²⁵Abu ekadwaran Yeremia toeok eeos lo egoror ekapolon Yosia. Aliwor etal alo Isirael, a ngikaeok alukiliok ka luberu aeokin eeos ngolo na igorotor Yosia. Igiritae eeos ngolo nakitab na ngieosio alu igorore.

²⁶Ngakiro na asubi Yosia daang, alemuna keng ani a Ekapolon Akuj, ka akiwapit keng Etal,

²⁷ka ngakiro keng napei anakisiakinet tanang losal, igiritae daang nakitab na enyaritae Ngakiro a ngikapolok a Isirael ka Yuda.