Read turkana 2 Ngakiro a Ngirwa 36 Bible Online

2 Ngakiro a Ngirwa 36 - turkana bible

2 Ngakiro a Ngirwa 36

¹Apot ngitunga a Yuda toseut lokookeng a Yosia lo anyaritae Yoaas kiwasakis akimiet a etal kitiliwosi ekapolon alo Yerusalem.

²Araakasi ngikaru a Yoaas ngitomwon-arei ka nguuni na aliworor ekapolon a Yuda. Toliwor ngesi ekapolon alo Yerusalem a ngilapio a nguuni.

³Abu Neko lo arai ekapolon a Misiri toriko ngesi kitiliwo erikot. Kitubuk Neko ngitunga a Yuda echur lo arai ngakiloi 3,400 a akwangat, ka ngakiloi 34 a egolit.

⁴ Kitiliwo ekapolon Neko lokaatokeng a Yoaas lo anyaritae Eliakim ekapolon a Yuda. Kiloch Neko ekiro a Eliakim toliwor Yeoyakim. Toriko Neko Yoaas Misiri.

⁵Araakasi ngikaru a Yeoyakim ngitomwon-arei ka ngikan na aliworor ekapolon a Yuda. Abu ngesi toliwor ekapolon alo Yerusalem a ngikaru a ngitomon ka epei. Tosechak ngesi Ekapolon Akuj na erai Akuj keng.

⁶Abu Nebukadinesa lo arai ekapolon a Babilon torem Yuda. Kirum ngesi Yeoyakim, toen a ngiriko sodi toriko Babilon eenen.

⁷Tolema Nebukadinesa ebari eche a akai a Akuj dio ayaar kai keng na ayei Babilonia.

⁸ Ngakiro daang na asubi Yeoyakim, aapei ka ngakiro nakakadakinak asubi ngesi, ka ngakiro naaronok asubi ngesi, igiritae nakitab na enyaritae Ngakiro a ngikapolok a Yuda. Kilunyokin lokookeng lo anyaritae Yeoyakin nados keng toliwor ekapolon.

⁹Araakasi ngikaru a Yeoyakin ngitomon ka ngikan-kauni[25] na aliworor ngesi ekapolon a Yuda. Toliwor ngesi ekapolon alo Yerusalem a ngilapio a nguuni ka ngirwa ngitomon. Abu ngesi dang tosechak Ekapolon Akuj.

¹⁰ Ani enangi ngirwa lua ngirupei, abu ekapolon Nebukadinesa toriko Yeoyakin Babilonia kitiliwo eenat. Tolema Nebukadinesa ebari a akai a Akuj. Ani erumor kitiliwo Nebukadinesa amae[26] keng a Yeoyakin lo anyaritae Sedekia, kitiliwo ekapolon a Yuda ka Yerusalem.

¹¹Araakasi ngikaru a Sedekia ngitomwon-arei na aliworor ekapolon a Yuda. Toliwor ngesi ekapolon alo Yerusalem a ngikaru a ngitomon ka epei.

¹² Tosechak Sedekia Ekapolon Akuj. Nyitiditeuna ngesi kiira ngakiro a ekadwaran Yeremia, alo eruoro akiroit a Ekapolon Akuj.

¹³Tonger Sedekia ekapolon Nebukadinesa. Esikongi sek Nebukadinesa Sedekia alokiro a Akuj kitilim atamar aliwor lokamunoi. Kichananer ngesi towou akilung akisech keng ka abongokin Ekapolon Akuj na erai Akuj a Ngisirael.

¹⁴Ani eyakasi nguna, apot nabo ngikarikok a Yuda daang ka ngimurok ta ngitunga, kiwapa ekitetemes lokikadakini a ngibukui alu edunyatar kesi. Kilipa kesi ngakujo nasubuna sodi kinyasut akai a Akuj nakolong etaleuni Ekapolon Akuj alope.

¹⁵Abu Ekapolon Akuj na erai Akuj kata apaakech torubak ameununi ngikadwarak akichikichik ngitunga keng, kainyo esienito ngesi ngitunga keng ka akai keng asaki ayuun.

¹⁶ Nakaneni tokianatar kesi ngimeanara a Akuj, kimenya ngakiro a Akuj, nabo tokianatar ngikadwarak keng tanang ni angoikinea Ekapolon Akuj ngitunga keng noi tongop kona eyuun kesi.

¹⁷Sodi toriku Ekapolon Akuj ekapolon a Babilonia bu kitijik kesi. Taar ekapolon ngolo ngikiliok lusorok a Yuda, taar tani alokai a Akuj. Nyisieno ngesi itwaan, kesorokona kori kemojongit, kerai ekile kori aberu, kedeaka kori pekedeaka. Abu Akuj kipoto kesi daang nak ngesi.

¹⁸Abu ekapolon a Babilonia tangata ngiboro lu ayakasi kai a Akuj daang, luuchik ka luapolok lu araakasi ebari a akai a Akuj, ka ebari a ekapolon, ka ngikarikok. Yaa ngesi ngiboro daang Babilonia.

¹⁹Kinom ngesi akai a Akuj, ka ere, ka ngakais a ngikapolok na ayakasi lore daang, ka ebari a ere, sodi toukosi awas a ere.

²⁰Toriko ngesi ngitunga lu apuunosi daang Babilonia toliworos ngikedalak keng ka ngalesea keng, tanang ngirwa lu esiakinea apolou a akwap a Persia.

²¹ Sodi kiyookin ngakiro nakolong alimuni Ekapolon Akuj kisitoru nia ekadwaran Yeremia ebala, “Idongi akwap erai alaireng a ngikaru a ngitomwon-kaarei, sodi kiangarea akwap ngakiangaret a Sabato[27] nakolong aringa nyirichuna.”

²²Ekaru lo ekingaren lo araakar Korech ekapolon a Persia, abu Ekapolon Akuj kiyook ngakiro nakolong alimuni kisitoru nia ekadwaran Yeremia. Abu Ekapolon Akuj kitonyou Korech todung ngakiro nugu kigirae sodi kisomae anakwap keng kadaang. Egiritae kona,

²³ “Ngakiro nugu kesi edungunit Korech lo erai ekapolon a Persia. Ketiliwo Ekapolon Akuj na erai Akuj a adis ayong ekapolon a ngakwapea kadaang. Kainaki ayong etich loa akiduk akai keng lore a Yerusalem anakwap a Yuda. Esi daang lu iraakasi ngitunga a Akuj, kapesi tokona inaa. Irukete esi ka Ekapolon Akuj na erai Akuj kus.”