Read turkana 2 Ngakiro a Ngirwa 4 Bible Online

2 Ngakiro a Ngirwa 4 - turkana bible

2 Ngakiro a Ngirwa 4

¹Tosubak Solomon ekeno a ngakipeyos a ngasua ananyangayek. Ariyan ngiwaitin daang arai ngamitae ngakan-koomwon, tarai aoyau na alokidiama ngamitae ngoomwon ka anus.

²Tosubak ngesi atanki a ngakipi a ngasua ananyangayek kisiriam. Arai aoyau keng ewei ngamitae 2.2, tarai aoyau napei alokwaas a epei tanang loche ngamitae 4.4. Arai aoyau a akirimokinet a apei ngamitae 13.2.

³Akiriam ekeli lo anikalapatan a atorosit a atanki, ayakasi ngangedakinet ngaarei a asir, edokokino apei kidiama nache. Esikwaanitae asir ngina ka ngimongin. Atapakina nasua nache a atanki.

⁴Edokokinitoe atanki ngina nakawa a ngakisikwaanet a ngimongin a ngitomon ka ngiarei alu a ngasua ananyangayek. Akienyiarito ngimongin lowae lo anikalapatan, akienyiarito nguuni too, tokienyiasi nguuni kuju, sodi tokienyiasi nguuni kide, tokienyiasi nguuni kwap.

⁵Arai alangirir a ngikwaasea a atanki ngamilimitae 75. Ekote ngipon a atanki kangina lua ekopo, tokuduno ngikwaasea nikalapatan loger a ngaki a aturot. Elelebuunun atanki ngina ngakipi na eraakasi ngalitae ngabunge ngatomwon-kapei.

⁶ Tosubakis nabo ngategerin ngatomon, toliworos ngakan ngakiwaakina lowae lo alokuju akai, ani ngakan lowae lo alokwap. Elotanarere kesi nginerin a ngibaren lu epeyeo. Arai ngakipi na ayakasi natanki naapolon ngakilotanaret a ngimurok a Akuj.

⁷Tosubakis kesi ngasipet ngatomon a ngataae loger losek esubere, sodi kiwaakis kai a Akuj, kiwaakis ngataae ngakan lowae lo alokuju, kiwaakis ngakan lowae lo alokwap.

⁸ Tosubakis nabo ngimeesae ngitomon, sodi kiwaakis kai, ngimeesae ngikan lowae lo alokuju, ngikan lowae lo alokwap. Tosubakis tani ngategerin amiat apei a egolit.

⁹Tosubakis kesi alaar na alotooma toliwor aka ngimurok, ka alaar na anikalapatan dang. Toburuchiarae ngidorin a ngalaarin kanguna a ngasua ananyangayek.

¹⁰Kiwaakinae atanki nagule na alokuju kide akai.

¹¹Tosubak Uram tani ngamoti ka ngakalobochio nawadet ngalup ta ngategerin. Torumo ngesi akisub ngiboro daang lusek echikakinit ngesi ekapolon Solomon atamar asubakini kotere akai a Akuj.

¹²Ngiboro lu asubi ngesi ngulu, kesi ngapirio ka ngakies naarei ikwaan ka ngatubwae nachukul na eyakasi kidiama ngapirio, ka ngiriko lu irumeikina eyakasi kidiama akou apei.

¹³Tosubak ngakisikwaanet a ngalam ngamiae ngoomwon kotere ngiriko luarei ngulu, ngangedakinet ngaarei a ngalam lorikot epei sodi kitisiro ngakies naarei a ngangedakinet.

¹⁴Tosubak tani ngaurukukui natomon[3] na iritae ka ngategerin ngatomon ta atanki.

¹⁵Tosubak atanki ka ngakisikwaanet a ngimongin na asipokinitae atanki.

¹⁶Tosubak ngamoti ka ngakalobochio nawadet ngalup ta ngakichiera na ngikel a nguuni. Asubakini Uram lo erai ekunonoit loapolon ngiboro[4] ngulu daang a ngasua ananyangayek ana epusitae, loger losek adungokinitor ekapolon Solomon ngesi, sodi tosubere etich alokai a Akuj.

¹⁷Loger lo alimunitor ekapolon, apon ngiboro ngulu daang tosubae ani esubeenere ngasua anadipo a Yorudan, nakidingos a Sukos ka Sereda.[5]

¹⁸Tosubak Solomon ngiboro lugu daang elalak tongop tani kona itemio apotis a ngasua ananyangayek ana asubere ngiboro ngulu.

¹⁹Tosubak Solomon tani ngiboro lu iwaakinio kai a Akuj, tosubak a egolit, ekeno a ngakipeyos ka ngimeesae a ngamugati ana elemanakinio Akuj,

²⁰ka ngasipet a ngataae, ka ngataae na asubunitae alogolit bon, na ajoikinit itonokio alongaren ni italeunitoe noi, loger losek asakitere.

²¹Tosubak asir a ngatur, ka ngataae, ka ngasua naridet ngatotol,

²²ka ngasua nakitudunget ngataae, ka ngatubwae nachukul, ka ngitubwae lu inomere emitina ta ngataritarea natinget ngatotol a akim. Asubunitae ngiboro ngulu daang a egolit bon. Ngidorin lua nikalapatan akai ka lua ni italeunitoe noi, elalatae a egolit.