Read turkana 2 Ngakiro a Ngirwa 5 Bible Online

2 Ngakiro a Ngirwa 5 - turkana bible

2 Ngakiro a Ngirwa 5

¹ Ani erumori ekapolon Solomon etich daang a akai a Akuj, abu tolem ngiboro daang lukolong etalekinit apakeng Daudi Ekapolon Akuj, tolem kiwaak lokerui lu ikachio ngiboro a Ekapolon Akuj. Araakasi ngiboro ngulu ngakwangae, ka egolit, ta ngiboro luche.

²Ani erumor tochunak ekapolon Solomon ngikarikok daang a ngitela ka ngimacharin a Ngisirael pot Yerusalem, tolemareta asaduku a achamunet a Ekapolon Akuj alo Sion alo erai ere a Daudi,*g** yaarae kai a Akuj.

³Tochunakinos kesi daang ngaren ekapolon ngirwa lua esukukuu a ngikalea.

⁴Ani echununosi ngikarikok daang, tadakut Ngilawi asaduku a achamunet,

⁵yaasi kai a Akuj. Apot ngimurok ka Ngilawi yaasi tani eam a Akuj ka ngiboro keng daang, yaasi kai a Akuj.

⁶Abu ekapolon Solomon ka Ngisirael lu achunakina ngaren asaduku a achamunet kipeyoto ngamesekin ka ngaatuk nakaalak noi na nyimarun.

⁷Ani erumor tadakasi ngimurok asaduku a achamunet tooma akai, kiwaakis lowae lo italeunitoe noi, kwap ngiborei lua ngabeben.

⁸Tarapa ngabeben kech na apetara asaduku ka ngakito na adakitere.

⁹Aoyak ngakito noi atakanete, erai kewo itwaan alongaren ni italeunitoe noi kingolik. Peapedorio akingolikin anikalapatan. (Eringa ngakito nguna eyakasi neni tani tokona.)

¹⁰ Amam ibore ayei tooma asaduku a achamunet pearai ngamoru nadapal naarei nakolong ewaakini Musa alomoru a Sinai, nakolong achamakinotor Ekapolon Akuj ka Ngisirael naapudunioto alo Misiri.

¹¹Ani elomunete ngimurok a Akuj ani italeunitoe (kainyo etaleuno ngimurok lu ayakasi neni daang, peekachitae atamar erai eka atiakaru kaani.

¹²Ngikaeok lua ekitela a Lawi daang lube ta Asap, ka Eman, ka Yedutun ta ngitunga a ngimacharin kech, awaasi alo kide ekeno a ngakipeyos enapito ngiworui lukaanikak ajokak. Awaasi kesi aapei ka ngimurok amiat apei ka ngitomwon-arei lu araakasi ngikakutak ngaburucho.

¹³Asakitae ngikakutak ngaburucho ka ngikaeok iirario eeosi aapei ipurosi ka abuakin Ekapolon Akuj alakara). Ani ikeunio eeos tokutakinitetei ngaburucho, kideese ngasua ta ngiboro luche ipurosi Ekapolon Akuj, eeosi ebalasi, “Kipuro Ekapolon Akuj, kainyo ejok ngesi. Nabo erai amina keng nakajik.” Ani enangi ni elomuneta ngimurok alokai, atipei kilelebun edou kai a Akuj.

¹⁴ Tokuruwo kesi atinenikin ilipito kotere edou ngolo kainyo eleleba akwangis a Ekapolon Akuj kai a Akuj.