Read turkana 2 Ngakiro a Ngirwa 6 Bible Online

2 Ngakiro a Ngirwa 6 - turkana bible

2 Ngakiro a Ngirwa 6

¹Sodi kilip ekapolon Solomon tama, “Ekapolon Akuj, ilimu iyong atamar iboikin naribu nakirion chuch.

²Kadukok ayong iyong akai a ekipur, na iboikin iyong jik.”

³Towaa ngitunga daang. Torei Solomon kingolia lowae kech sodi topia kesi.

⁴Tolim ngesi tama, “Kipuroe Ekapolon Akuj na erai Akuj a Ngisirael! Asubaki ngesi ngakiro nakolong echikakini ngesi apakang Daudi ebala,

⁵‘Napei kolong epudunio ayong ngitunga kang alo Misiri, emam ere aseu ayong anakwap a Isirael kadaang, lo edukokinio akai na kelipere ayong. Nabo emam itwaan aseu ayong toliwor ekarikon a ngitunga kang a Ngisirael.

⁶ Nakaneni aseu tokona ayong ere a Yerusalem toliwor ngesi kelipeenere ayong, nabo aseu Daudi topolok ngitunga kang.’ ”

⁷Torubak Solomon iruoro ebala, “Emuit kolong etau a apakang Daudi adukokin akai na ilipere Akuj na erai Akuj a Ngisirael.

⁸Nakaneni tolimok Ekapolon Akuj ngesi tama, ‘Itemokino eger lo imuitor etau kon akiduk akai kang,

⁹ani kaneni dang, nyiduki iyong pearai lokookon lo iuriuni iyong ngesi kadukokini ayong akai nakalimitere.’

¹⁰“Asubaki tokona Ekapolon Akuj ngakiro nakolong alimuni ngesi, kainyo elunyokin ayong napolou a apakang Daudi, aliwor ekapolon a Ngisirael loger lokolong alimunio Ekapolon Akuj, nabo adukok akai na elimitere Ekapolon Akuj na erai Akuj a Ngisirael.

¹¹Ewaak tooma akai a Akuj asaduku a achamunet na eyakasi ngamoru nadapal na achamunet ana kolong achamakinosi Ekapolon Akuj ka Ngisirael.”

¹²Sodi towo Solomon alongaren ekeno a ngakipeyos a Ekapolon Akuj ani achunakina Ngisirael daang kaneni. Kibaa ngesi ngakan keng kidiama ilipit. (

¹³Asubakinit sek Solomon ekicheeles a ngasua ananyangayek kiwaak nakidingos a alaar. Ariyan ngiwaitin daang arai ngamitae 2.2 tarai aoyau na alokidiama ngamitae 1.3. Todoka ngesi neni toriedik ani apedoreta ngitunga daang akingolikin ngesi, kibaa ngakan keng kidiama nadis.)

¹⁴Kilip ngesi tama, “Ee, Ekapolon Akuj na irai Akuj a Ngisirael, emam akuj na ikwaan ka iyong alokidiama nadis ka kwap nege. Irichakinit iyong achamunet kon, nabo ngitunga kon lu iwapito ngakiro kon a ngitai kech kadaang, idodikinit iyong amina kon na nyedaun.

¹⁵Irichak iyong ngakiro nakolong ichikakini apakang Daudi. Ee robo, ilimuni kolong a akituk kon, nakaneni isubak akolongit naga a akan itemok.

¹⁶Tokona Ekapolon Akuj na irai Akuj a Ngisirael, kelipit atamar kirichak tani akichikakinet nache nakolong ichikakini iyong apakang Daudi ibala, ‘Ngirwa daang, nyengopi itwaan analesea kon ni epolokini Ngisirael, erai cha kirichut talokookon elote kech, kiwapa ngakiro kang loger lokolong iwapitor iyong.’

¹⁷ Tokona bocha Ekapolon Akuj na irai Akuj a Ngisirael, kimiek ngakiro kon daang kiyookin, nakolong ichikakini iyong apakang Daudi, lo erai ekasuban etich kon.

¹⁸“Nakaneni, ipedori iyong dir Ekapolon Akuj akiboikin nakwap kiruko ka ngitunga a? Tani adis daang etia ni etia, ediding nyikitemokin iyong. Ekoe ani bo akai na aduk ayong naga, nyedit noi a?

¹⁹Ee Ekapolon Akuj na irai Akuj kang, kiira akilip kang a ekasuban etich kon, tosubak nguna kelipi.

²⁰Kiyok akai nakon naga akwaar ka apaaran, nege ni ilimu iyong ibala, ‘Ni kelipere ayong nege.’ Kiirarae ayong esaa lo akienyiarea kai naga kelip iyong.

²¹ Kiira akilip kang ka ngakilipasinei a ngitunga kon alu eraakasi Ngisirael esaa lo ekienyiareta kai naga kilipa iyong. Kiirarae sua anawi kon ana eyei nadis. Ani iirari, kitorimak.

²²“Ani itwaan ni esechakini itwaan niche, sodi torikunoe lokeno kon a ngakipeyos alokai kon, kikong atamar nyasechit ngesi,

²³kiira iyong anadis sodi totiaku ngakiro a ngikasubak etich kon na iyookino. Kirira ngini esechit loger lo ejoikinit iriraare, sodi talakak ngini nyesechit itemem ka ateneanut keng.

²⁴“Ani idwangete ngimoe ngitunga kon Ngisirael ani kisechakinitotor iyong, nakaneni ani kereeunosi kesi nikon pot kai naga,

²⁵kiira iyong ngakiro kech anadis. Torimak ngasechesea a ngitunga kon, sodi tobuu kesi nakwap nakolong iinakini iyong taapaakech.

²⁶“Ani kigolo iyong akiru ani kisechakinitotor ngitunga kon iyong, nakaneni ani kelunga kesi ngasechesea kech tokienyiut kai naga, kilipa iyong itiditeuna,

²⁷ee Ekapolon Akuj, kiira iyong anadis. Torimak ngasechesea a ngikasubak etich kon Ngisirael. Kitatam kesi akisub nguna iyookino. Ani kikokis neni Ekapolon Akuj, talakak akiru taram akwap nakon naga, nakolong iinakini iyong ngitunga kon toliwor akech jik.

²⁸“Ani kemin eron a akoro nakwap, kori edeke loaronon, kori kinyasu ekuwam lokariran ngamanat, kori ngasepicho a emaase, kori kitijikis ngimoe ngitunga kon, kori keting kesi edeke kori elekes,

²⁹kiira ngakilipasinei kech. Alotunga kon alu eraakasi Ngisirael, ani keyei itwaan cha daang ni kilipi iyong, kori kimaimai, kori keraakasi ngitunga kon Ngisirael, eriangakina ipei kech daang, kori ialolongi, ibakinit akai naga ngakan ilipit,

³⁰kiira akilip keng. Kiira kesi anawi kon ana eyei nadis sodi torimak kesi. Iyong bon ngesi iyeni ngakiro na eya lotau a itwaan. Tosubea itwaan daang nguna itemokino esubere,

³¹sodi kitokereta ngitunga kon iyong ka akiwap ngakiro kon ngirwa daang lu ibooyoto kesi anakwap ana kolong iinakini iyong taapaakosi.

³²“Loger lopei ngolo, ani kebu itwaan anakwap anache ni nyerai ipei a ngitunga kon, bu anakwap anakalonan ani eirarea ekipur kon, ka ngakiro naationok isubi iyong, ka eger lo nyimamakinea iyong asubakin ngakiro, ani kebu ngesi akilip alokai kana,

³³kiira akilip keng. Kiira ngesi anadis ani ibooyo iyong, tosubak nguna ilipa ngesi, sodi kitoyeneta iyong ngitunga a ngakwapea daang, kitokera loger a ngitunga kon alu eraakasi Ngisirael. Toyena kesi atamar akai na aduk ayong naga ngesi elimitere ekiro kon.

³⁴“Ani kidungok iyong ngitunga kon atamar toloto akitijwore ngimoe kech, nakaneni ani kilipa kesi iyong awadaang anicha eyakasi kesi, ekienyiunito lore lo iseu iyong logo ka akai nakadukok ayong iyong naga,

³⁵kiira ngakilipasinei kech. Kiira kesi anadis sodi kisidwang ngimoe kech.

³⁶“Ani kisechakis ngitunga kon iyong, aloger emamakar itwaan nyesecheene, sodi ani ingoi iyong kimiek ngimoe idwangete kesi torikosi nakwapea nache toliworos ngirikon, tani keloka ngakwapea nguna,

³⁷kiira ngakilipasinei a ngitunga kon. Ani kilipa kesi tolunga ngasechesea kech anakwap kangina, elimorito akisech kech ka aronis kech, kiira ngakilipasinei kech, Ekapolon Akuj.

³⁸Ani kelunga kesi ngasechesea kech anakwap kangina, tolunga a ngitamen kech kadaang ka ngitai kech daang, kilipa iyong ekienyiunito nakwap naga, nakolong iinakini iyong taapaa kosi ka ere lo iseu iyong logo ta akai nakolong kadukokini ayong iyong naga,

³⁹kiira ngakilipasinei kech. Kiira kesi kisieneto anawi kon ana eyei nadis, sodi torimak ngasechesea a ngitunga kon daang alu kisechakis iyong.

⁴⁰“Ee Akuj kang, tokona bocha, kingolikinae sua sodi kiira ngakilipasinei kosi na kilipit sua kanege.

⁴¹ “Ee Ekapolon Akuj na irai Akuj, tonyou tokona ka asaduku a achamunet kon, na erai emachar a apolou kon, toloma kai kon kiboikin neni jik. Topia ngimurok kon alotichisio kech kadaang, nabo talakaros ngitunga kon daang, kotere ajokis kon anikech.

⁴²Ekapolon Akuj na irai Akuj, nyiibongok ekapolon lo iseu iyong akau. Kitamu amina kon na nyedaun ani a ekasuban etich kon Daudi.”[6]