Read turkana 2 Ngakiro a Ngirwa 7 Bible Online

2 Ngakiro a Ngirwa 7 - turkana bible

2 Ngakiro a Ngirwa 7

¹Ani erumori Solomon akilip, totiyaun akim anadis tonomia ngakipeyos na alemunitae, sodi kilelebun akwangis naakwaan kea a Ekapolon Akuj kai.

²Peapedorete ngimurok alomar kai kainyo eleleba akwangis naakwaan kea.

³Ani ingolikinete Ngisirael daang akim etiyaun anadis ka akwangis ilelebun kai, apot tadakakinos kwap tojuko ngireetin ngalup kilipa ka abuakin Ekapolon Akuj alakara ebalasi, “Ejok Akuj. Erai amina keng aka jik.”

⁴Ani erumor kipeyoto Solomon ka ngitunga daang ngakipeyos alongaren Ekapolon Akuj.

⁵Kipeyo Solomon ngaatuk 22,000 ka ngamesekin 120,000 toliworos ngakipeyos a ekisil. Sodi kitaleut ngesi ka ngitunga daang akai a Akuj.

⁶ Towaa ngimurok anisek asakitere towaa. Towaa Ngilawi ekienyikina ka ngimurok ipurosi Ekapolon Akuj a ngiboro alu eeore alu kolong alemuni ekapolon Daudi. Aeosi kesi eeos lo ebala, “Erai amina keng aka jik,” loger losek adungokinitor Daudi kesi. Tokutakis ngimurok ngaburucho ewaasi ngitunga daang.

⁷Kitaleu Solomon kiding alaar alowae alo alongaren akai a Akuj, sodi kipeye kaneni ngakipeyos na enomio nginerin daang, ka ngakipeyos a ngalemet ta nikatoronon a ngibaren alu a ngakipeyos a ekisil. Asubi ngesi kongina kainyo adit ekeno lo a ngasua ananyangayek losek asubakinit ngesi peadikino itemokin ngakipeyos nguna daang.

⁸Apot Solomon ka ngitunga daang tanyama esukukuu a ngikalea a ngirwa a ngikan-kaarei. Alal asepich a ngitunga esiakini napei anapak a Amas alokwap tanang lokukuoru a Misiri alokuju.

⁹Etaleunete kesi ekeno a ngakipeyos a ngirwa a ngikan-kaarei, sodi tanyama esukukuu a ngirwa a ngiche a ngikan-kaarei. Ani akwaar na esal, min esukukuu lo a esal.

¹⁰Ani akolongit na ngatomwon-arei ka ngauni a elap alo a ngikan-kaarei, abu Solomon kieala ngitunga toloto nawiyei. Talakaros kesi kotere ngakiro daang na apiaritor Ekapolon Akuj ngitunga keng Ngisirael, ka Daudi ta Solomon.

¹¹Ani erumori ekapolon Solomon akiduk akai a Akuj ka akai keng, kitemok loger lokolong asakea ngesi,

¹²bu Ekapolon Akuj nia Solomon nakwaare tolimok tama, “Eira ayong akilip kon, nabo achamu ayong akai naga toliwor ngesi kepeyonokinere ayong ngakipeyos.

¹³Nacha agolorea ayong akiru nyeeram, kori nacha ameunea emaase kirika ngamanat, kori ayau edeke loaronon lotunga kang,

¹⁴ani kelipa kesi ayong tolunga ngasechesea ka aisikin naaronok daang na asubito kesi, eirari ayong ngakiro kech anadis atorimak ngasechesea kech sodi atopia akwap kech.

¹⁵Etee ayong akai naga eratak, sodi eira ngakilipasinei daang na ilipio kanege,

¹⁶kainyo aseu ayong ka akitaleun akai naga toliwor ngesi kelipeenere ayong jik. Etee ayong eratak ngirwa daang.

¹⁷Ani kisub iyong etich kang kitomunok ayong loger lo kolong asubea apakon Daudi, kiwap ngitalio kang ka ngakiro daang nakadungokini ayong iyong,

¹⁸asubakini ayong ngakiro nakolong echikakini apakon Daudi abala, ‘Ngirwa daang, nyengopi itwaan analesea kon ni epolokini Isirael.’

¹⁹Nakaneni ani kiwout iyong ka ngitunga kon akiwap ngitalio kang ka ngakiro nakadungok ayong iyong, sodi kilipa ngakujo ngache,

²⁰ kalemari ayong esi anakwap ana kainak ayong esi. Aisikini ayong akai na etaleu ayong naga toliwor kelipeenere ayong. Imenyarete ngitunga awadaang akai naga ianeta ngakamatak.

²¹“Erimae tokona akai naga lokojokon, nakaneni ngirwa ngulu, eriangakinosi ngitunga daang lu itorunete nege, kingitas etalarito ngakiro ebalasi, ‘Kotere nyo asubakinea Ekapolon Akuj ngakiro nugu anakwap kana ka akai naga?’

²²Sodi tatachut tamasi, ‘Kainyo aisikinete kesi Ekapolon Akuj na erai Akuj kata apaakech, nakolong epuduni kesi alo Misiri. Ewapete kesi ngakujo ngache, kilipa ka akisub etich kech. Kotere ngakiro nguna, ayau Ekapolon Akuj ngakiro naaronok nguna nikech.’ ”