Read turkana 2 Ngakiro a Ngirwa 8 Bible Online

2 Ngakiro a Ngirwa 8 - turkana bible

2 Ngakiro a Ngirwa 8

¹Aduki Solomon akai a Akuj ka akai keng a ngikaru a ngitomwon-arei.

²Tobongonok Solomon nabo akiduk ngirerea lukolong ainakini ekapolon Iram ngesi, dio amear Ngisirael toloma lorerea ngulu.

³Tolema Solomon akwap nabe Amas ka Soba.

⁴Toduk awas kiriam ere a Palimira lo eyei nariet. Tobongonok ngesi akiduk ngirerea daang lu ayakasi nakwap a Amas lu araakasi kesi ekachio ngiboro.

⁵Toduk Solomon nabo ngirerea lugu, Bes-oron lo alokuju ka Bes-oron lo alokwap. (Ayakasi ngirerea ngulu ngawasea ka ngidorin lu eriwokina ngasua),

⁶ka ere a Baalas, ka ngirerea daang lu ekachio ngiboro, ka ngirerea lu ayakasi ngangolei keng ka ngaurukukui na iritae. Todukok ngesi ibore daang nikolong asaki ngesi akiduk alo Yerusalem, ka Lebanon ta akwap daang na apolokinit ngesi.

⁷Ngitunga lukolong edongete lu araakasi Ngiiti, ka Ngiamor ka Ngiperes, ka Ngiipi ta Ngiebus lu pearaakasi Ngisirael,

⁸ngalesea kech nakolong edongete nakwap, nakolong aringa Ngisirael nyemunyara, ngitunga ngulu kesi abu Solomon kidesik akisub etich. Eringa ngalesea kech eraakasi ngikedalak tani tokona.

⁹Nakaneni abu Solomon nyiitiliwo Ngisirael ngikedalak, pearai abu kitiliwo kesi ngasigerea, ka ngikaweikinak a arieng, ka ngikarikok a ngasigerea a ngaurukukui ana irito ngangolei ta ngikameak ngangolei.

¹⁰Ayakasi ngikaweikinak a arieng 250 lu aweikinito etich lo a akiduk lo edesikinitae ngitunga.

¹¹Abu Solomon kitaramak aberu keng na arai nakookeng a ekapolon a Misiri, kitaramak alore a Daudi tolot kai na adukokini Solomon ngesi. Tolim Solomon tama, “Nyiboikin aberu kang kai a Daudi alo erai ekapolon a Ngisirael, kainyo italeuno wadaang nicha emini asaduku a achamunet.”

¹²Kipeyonok Solomon Ekapolon Akuj ngakipeyos alokeno alosek adukit ngesi ngaren akai a Akuj.

¹³Kipeyo Solomon ngakipeyos na inomio itemem ka eger lo asakitae alotal a Musa, kotere ngirwa lu etaleuno daang lu araakasi ngasabatoi, ka esukukuu lo eanyungarere elap ta ngisukukui luuni lupalem a ekaru, lu eraakasi esukukuu a ngamugati anapadok, ka esukukuu a ngalemet ta esukukuu a ngikalea.

¹⁴Abu Solomon torek etich lo a ngirwa kadaang lo esubete ngimurok a Akuj, ka Ngilawi lu engarakinito ngimurok aeo ngieosio, ka akisub etich. Asubi Solomon nguna iwapit ngitalio lukolong adungunit apakeng Daudi. Torek Solomon nabo etich a ngitunga alu eteete ngidorin, kotere akisub etich a ngirwa kadaang alodorin alugelagelae, itemem ka eger lokolong adungunit Daudi lo erai itwaan a Akuj.

¹⁵ Apot kesi tosubakis ngakiro daang nakolong adungokinit Daudi ngimurok ka Ngilawi alowae a ngakais ana ekachio ngiboro ta ngakiro nache.

¹⁶Arumorit Solomon etich keng daang lo a adukuoru napei anakisiakinet tanang narumoret akai a Ekapolon Akuj. Arumoro etich daang niajokon.

¹⁷Ani erumor tolot Solomon lorerea a Esionigeber ka Elas lu ayakasi lodoket lo ekwaas a apas a Akaba, anakwap a Edom.

¹⁸Tomeu ekapolon Iram ngatubwae na aweikinito ngitunga a arieng keng, nabo ameto ngikameak lu ayenete amere ngatubwae. Tometa kesi ngatubwae na adokito ngikaweikinak a arieng nguna, tananga nakwap a Opir. Inut kesi Solomon egolit lo eporit ngakiloi 15,000.