Read turkana 2 Ngakiro a Ngirwa 9 Bible Online

2 Ngakiro a Ngirwa 9 - turkana bible

2 Ngakiro a Ngirwa 9

¹Ani iirari akapolon a Cheba ekipur a Solomon, abu ngesi tolot nia Solomon aroanar kingitana ngakiro nakaagongok. Tanangu ngesi Yerusalem erukito ka ngikasubak etich keng lukaalak ta ngikaala iwokito ngikito lukitukukunyet akimuj, ka egolit lotikaalan ta ngamoru nakaalak a ngaropiyae. Ani ebuni ngesi nia Solomon, kingitana ngesi ngakiro daang nacha apedori akitamun.

²Tatachu Solomon ngakiro nguna daang, emam ibore abu tokuruwo akisisaun.

³Kiira akapolon ngina ngakiro a Solomon na aosou. Kingolik akai a ekapolon na aduki Solomon.

⁴ Kingolik ngesi akimuj na emujio alomeesa a Solomon, ka ngakais a ngikaweikinak a arieng keng. Kingolik nabo eger lo arekinitere ngikasubak etich a akai a Solomon ka ngiworui lu ikwaan lu anapito kesi. Kingolik ngiworui lu anapito ngikasubak etich lu esumujeenete Solomon. Kingolik ngakipeyos na epeyeene Solomon alokai a Akuj. Ani ingolikini ngesi ngakiro nguna daang, tatalasi kililing chek.

⁵Tolimok akapolon ngina Solomon tama, “Ikwa ngaka iteni ngakiro nakolong eirari ayong anakwap kang, ngakiro na isubi iyong ka na aosou kon!

⁶Nyenupa sek ayong ngakiro nguna jik, mati been kabu engolik a ngakonyen kang. Ikwa keringa kolong ayong nyiirara tani epewae a aosou kon. Ios iyong noi akidwang tani eger lo kolong kalimokinitere ayong.

⁷Abe ngika ekeny ajokon ngikasubak etich kon lu irukito ka iyong jiik epupete ngakiro kon a aosou!

⁸Kipuroe Ekapolon Akuj na erai Akuj kon! Edodiu ngesi alakara keng kotere iyong ani kitiliworea iyong ekapolon, sodi topolok ngitunga a ekiro keng. Aloger eminar ngesi ngitunga keng Ngisirael, tasaki kesi toyakas jik, kitiliwo ngesi iyong ekapolon sodi kirichakinea ngakiro na eriyan ka na iteni.”

⁹Ani erumor nak akapolon ngina Solomon ngainakinet na ayaunit na araakasi egolit lo eporit ngakiloi ngabunge ngoomwon ka ngikito lu itukukunyete akimuj lukaalak ta ngamoru nakaalak a ngaropiyae. Ngikito lu itukukunyete akimuj lu ainakini ngesi Solomon, alalak noi, emam ngiche ekote ngulu nakanuan. (

¹⁰Ngitunga a Iram ka Solomon lusek ayaunete egolit alo Opir, apot yaut tani ngakito a ngimusandali nakaalak ta asir.

¹¹Todukio Solomon ngakito ngadoket a akai a Akuj ka na akai keng, tosubea tani ngagitae na eeotor ngikaeok. Emam ngakito na ikote nguna engolikin anakwap a Yuda nakanuan.)

¹²Abu ekapolon Solomon nak akapolon na Cheba ngina ibore daang nicha asaki, peimaritae ngainakinet nasek ainakinio ilokonyitoe ka na ainuni ngesi Solomon. Apot ngesi ka ngikasubak etich keng tobongosi nakwap a Cheba.

¹³Alokaru a epei, ariamununi Solomon egolit ngakiloi esibit ngabunge 23,000

¹⁴toyei echur lo etachete ngikagielanarak ngiboro ka ngimuchurus. Ainuniyete ngikaweikinak a Arabia ka ngikapolok a ngiwaitin alugelagelae a Isirael, ainuniyete Solomon ngakwangae ka egolit.

¹⁵Tosubak Solomon ngaupwala naapolok ngamiae ngaarei alogolit. Egolit lo esibit ngakiloi ngakan-kaarei ngesi asubere aupwal apei.

¹⁶Tosubak ngaupwala naachik ngamiae ngauni alogolit. Egolit ngakiloi esibit ngauni ngesi asubere aupwal apei. Kiwaak ngesi ngaupwala nguna daang tooma kai naapolon na ayei Namoni a Lebanon.[7]

¹⁷Abu ekapolon tosubak tani ekicholong keng lotiapolon, ewae epewae eburuchiarit ekelae a etom, sodi toburuchia ewae loche a egolit bon.

¹⁸Ayakasi ekicholong ngolo ngadoket ngakan-kapei, tatapakinitetei ekicholong loochi lo idokonokinio ngakejen, lo aburuchiaritae a egolit. Ayakasi ni idokonokinio ngakan lokwaasea a ekicholong. Ayakasi ngakisikwaanet a ngingatunyo a ngiarei ni idokonokinio ngakan, epei lokwaas epei, loche lokwaas loche.

¹⁹Ayakasi ngakisikwaanet a ngingatunyo ngitomon ka ngiarei nadoket, ayei engatuny losal a adoket a apei. Emam ekicholong eche napei kanuan ikwaan ka ngolo anapolou a ache.

²⁰Ngikopoi lu amasea Solomon daang asubitae a egolit. Ngiboro lukimujet lu ayakasi kai naapolon na ayei Namoni a Lebanon daang, asubitae a egolit bon. Arai ngasua nakwangae pas ngirwa lua Solomon.

²¹Ayakasi ngesi ngatubwae nakaalak na ameatae ananam aapei ka ngatubwae a Iram. Arai nacha edaunotor ngikaru nguuni tobongut ngatubwae keng yaut egolit, ka ngasua nakwangae ka ngikel a etom, ka ngichomin ta ngikadokoi.

²²Edwangit Solomon ngikapolok luche a ngakwapea daang kotere ebari ka aosou.

²³Tasaka ngikapolok daang alosit aanyun ngesi sodi kiirasi aosou na ainakinit Akuj ngesi.

²⁴Inu itwaan daang Solomon ngainakinet a ngiboro alukwangae, ka egolit, ka ngiworui, ka ngiboro lujiet, ka ngikito lu itukukunyete akimuj, ka ngangolei ta ngisikiria. Asubasi ngakiro nguna loger ngolo ekaru daang.

²⁵Ayakasi Solomon nganokin ngabunge ngoomwon a ngangolei keng ka ngaurukukui. Ayakasi ngesi ngikameak ngangolei ngabunge ngatomon ka ngaarei. Ewaakinit ngiche kech Yerusalem, kiwaak luche lorerea lugelagelae.

²⁶Solomon apolot noi alokapolok kadaang napei anangolol a Eupurate tanang nakwap a Ngipilisti ta ekukuor a Misiri.

²⁷Ngirwa lu araakar Solomon ekapolon, asojunito ngasua nakwangae alo Yerusalem loger a ngalup. Alalak nabo ngakito a ngichekereng alo Yerusalem loger lo elalaketa ngikuno anaukon a akwap a Yuda.

²⁸ Agieleene Solomon ngangolei na ayauniyo alo Misiri ka ngakwapea nache daang.

²⁹Ngakiro nache daang a Solomon napei anakisiakinet tanang losal, igiritae nakitabea na enyaritae Ngakiro a ekadwaran Nasan, ka ngakiro na adwari Aija lo a ere a Chilo, ka ngakisingolikinet a ekadwaran Ido na eyakasi tani ngakiro a apolou a Yeroboam alo arai ekapolon a Isirael.

³⁰Apolokinit Solomon Isirael daang eyei Yerusalem a ngikaru a ngitomwon-omwon.

³¹Totoan ngesi sodi tonukakinae lore a Daudi. Kilunyokin lokookeng lo anyaritae Reoboam nados keng toliwor ekapolon.