Read turkana Esira 1 Bible Online

Esira 1 - turkana bible

Esira 1

¹ Ekaru lo ekingaren lo aliworor Korech lo a akwap a Persia ekapolon, abu Ekapolon Akuj kiyook ngakiro nakolong alimuni kisitoru nia ekadwaran Yeremia. Kitonyou Ekapolon Akuj Korech sodi kisigir ngakiro na adunguni, tomea ngitunga yaasi wadaang a akwap keng, sodi kisomae iremae. Egiritae kona:

²“Ebala Korech lo erai ekapolon a akwap a Persia kona, ketiliwo Ekapolon Akuj na erai Akuj a adis ayong ekapolon a ngakwapea kadaang. Kainaki ayong etich lo a adukokin ngesi akai keng lore a Yerusalem, anakwap a Yuda.

³Kiruko Akuj ka esi daang lu iraakasi ngitunga keng. Ejoikinit esi iloose Yerusalem tobongonokis akiduk akai a Ekapolon Akuj ana erai Akuj a Isirael, na erai ngesi ilipitae alo Yerusalem.

⁴Ani keyakasi ngitunga keng lu eeniaritae nakwap nagela, lu esakete akingarakino tobongut, ejoikinit ngikidunyet kech ingarakinete kesi a eger kalo, nakis ngaropiyae ka egolit, ka akimuj ta amekin ngibaren, ka ainakin ngadekon na elemuununio alokai a Akuj alo Yerusalem.”

⁵Sodi tonyout ngikapolok a ngimacharin a ngitela a Yuda ka Benjamen, ka ngimurok, ka Ngilawi ta itwaan daang nicha abu Etau a Akuj kitonyou. Apot tonyout alosit abongonokin akiduk akai a Ekapolon Akuj alo Yerusalem.

⁶Apot ngikidunyet kech daang kingarakis kesi nakis ngiboro lukaalak lu araakasi ngiboro lukwangae lukimujet, ka egolit, ka ngamuja, ka ngibaren, ka ngiboro luche lukaalak a ngaropiyae ta ngadekon a akai a Akuj.

⁷Tobuak Korech kesi ngatubwae ka ngikopoi lukolong alemarit ekapolon Nebukadinesa alokai a Akuj alo Yerusalem, yaa nakais a ngakujo keng.

⁸Kipoto Korech ngiboro ngulu nak Misiredas lo aweikinit ngaropiyae a ekapolon, sodi kimaranak Chechibasar lo arai ekarikon a ewae a Yuda.

⁹Ekoni ekimar a ngiboro kangulu nege, ngatubwae na egolit eraakasi ngaka ngakipeyos 30 ngatubwae nakwangae eraakasi ngaka ngakipeyos 1,000 ngatubwae nache 29

¹⁰ngitubwae lua egolit 30 ngitubwae lukwangae 410 ngiboro luche 1,000

¹¹Araakasi ngiboro ngulu daang 5,400, lu araakasi ngika egolit ka lukwangae ta ngiboro luche lu ayaari Chechibasar, naarotokinioto ngesi ka ngitunga luche lu arikitoe nakwap nagela, na arotokinioto alo Babilon toloto Yerusalem.