Read turkana Esira 3 Bible Online

Esira 3 - turkana bible

Esira 3

¹Ani enangi elap lo a ngikan-kaarei, tolomito Ngisirael daang lorerea kech, apot kesi daang tochunakinos Yerusalem.

²Apot Yochua lokookeng a Yeosadak, ka ngimurok luche, ka Serubabel lokookeng a Chealitiel aapei ka ngiyenet keng, apot toduko nabo ekeno a Akuj a Isirael, sodi kipeyoore ngakipeyos loger lo igiritere Lotal a Musa, alo erai itwaan a Akuj.

³Tani bo[1] na aemitotor ngitunga lu abongunete ngulu ngitunga lusek alomito nakwap ngina, apot kesi tobongokis akiduk ekeno a Akuj ni kolong sek awaar. Sodi kisiakis kesi nabo akinom ngakipeyos napalem a ataparach ka naka ebong.

⁴Tanyama kesi esukukuu a ngikalea itemem ka ngitalio keng. Kipeyoto kesi akolongit daang ngakipeyos na esakitae.

⁵Ani erumor kipeyoto ngakipeyos napalem inomio nginerin daang, ka na ipeyoo akolongit na eanyungarere elap, ka ngirwa a ngisukukui aluche alu ilipitere Ekapolon Akuj. Apot tolemut tani ngadekon na alemanakinio Ekapolon Akuj kotere achamit.

⁶ Napei anakolongit ana ekingaren a elap alo a ngikan-kaarei, kisiakis kesi akipeyonokin Ekapolon Akuj ngakipeyos na inomio. Nakaneni aringa kesi tani nyebokara ni edukokinio akai a Akuj.

⁷Tolemut ngitunga ngaropiyae na etachere ngikadukok a ngamoru, ka ngikadukok a ngakito. Tolemut nabo akimuj, ka ibore nimatat ta akimiet yaarae lorerea a Tiro ka Sidon, kilokonyuunere ngakito a ngichekereng alo Lebanon, kiwaakinae nanam tanangut Yopa. Asubio ngakiro nguna ani achamakinitor Korech lo arai ekapolon a Persia.

⁸Elap lo a ngiarei a ekaru alo a ngiarei, kenangut kesi kai a Akuj alo Yerusalem, apot Serubabel lokookeng a Chealitiel ka Yochua lokookeng a Yosadak, ka ngitunga kech luche ka ngimurok ta ngilawi ta daang cha lu kolong abongunete Yerusalem, apot kisiakis etich. Ngilawi daang lu anangito ngikaru ngitomwon-arei ka lu eporito, apon toseunae toweikis etich lo a abongonokin akiduk akai a Akuj.

⁹ Abu Elawit lo anyaritae Yechua ka talokookeng ka ngiyenet keng, ka Kadimiel ka talokookeng (lu araakasi emachar a Odapia,)[2] apot daang toweikis etich loa abongonokin akiduk akai a Akuj. (Apot Ngilawi lua emachar a Enadad kingarakis kesi.)

¹⁰Ani ebokarete ngitunga ni edukokinio akai a Akuj, apot ngimurok tanapa ngiworui kech lua ngimurok totinga ngaburucho pot ngaren. Towaa Ngilawi lua emachar a Asap kaneni etingito ngasua. Kipuruut kesi Ekapolon Akuj itemem ka eger lo kolong egiri ekapolon Daudi.

¹¹ Toeoto kesi ngieosio lu ipurore Ekapolon Akuj ikobanarete ebalasi, “Ejok Ekapolon Akuj, emina ngesi Isirael nakajik.” Kirema itwaan daang a ngikilinga keng kadaang ipuro Ekapolon Akuj, kainyo apon tobokarae ni edukokinio a akai a Akuj.

¹²Nakaneni ngitunga lumojong lukaalak lu araakasi ngimurok, ka Ngilawi ta ngikapolok a ngimacharin, engolikinito kolong akai a Akuj na ekingaren. Ani ingolikinete kesi eger lo abokarere ni edukokinio akai na, kigoro kesi kiuteto. Ani ngitunga luche, eremasi kotere alakara.

¹³Peapedorete ngitunga akitiak akirema a ngitunga alu alakara ka akirema alu egorosi, kainyo achalasi kesi noi tanang echale nikalonan.