Read turkana Esira 4 Bible Online

Esira 4 - turkana bible

Esira 4

¹Ani iirarete ngimoe a ngitunga a Yuda ka lua Benjamen atamar edukete ngitunga lu abongunete akai a Akuj ana erai Akuj a Isirael,

² Apot kesi toloto nia Serubabel ka ngikapolok a ngimacharin tolimokis tamasi, “Kimiekinae sua emorikin ka esi atoduko akai a Akuj. Kilipit sua dang Akuj loger lo ilipitotor esi. Kipeyonokini sua ngesi ngakipeyos napei kolong kirikunio sua ekapolon a Asiria lo enyaritae Esaradon, kitolom nege.”

³Apot Serubabel, ka Yochua ta ngikapolok a ngimacharin tolimokis kesi tamasi, “Nyikisakit sua esi kingarakis sua akiduk akai a Ekapolon Akuj ana erai Akuj kosi. Kiduki sua ngikulepek, loger lo kidungokinea Korech lo erai ekapolon a Persia.”

⁴Sodi apot ngitunga lusek alomito neni tasaka akisileleny Ngiyaudi ka akitubul kesi tongerioto akiduk.

⁵Apot kesi tani nakis ngikaweikinak a arieng a Persia ibore todiaka kesi, sodi kitengerioto Ngiyaudi akiduk. Apot kesi tosuba kona ngirwa daang lu araakar Korech ekapolon, tanang ngirwa lu aliworor Dario[3] ekapolon.

⁶ Ngirwa lu esiakinea Kerkesi aliwor ekapolon, apot ngimoe a ngitunga a Yuda ka Yerusalem kigira ngakiro na etitakinitotor kesi.

⁷Nabo ngirwa lu araakar Artachasta lo a akwap a Persia ekapolon, apot Bichilam, ka Misiredas ka Tabeel, ta ngirukitos kech kigir abarua nia ekapolon Artachasta. Egiritae abarua ngina a Ngaramaik. Asakitae ilokonyio esaa lo isomaare.[4]

⁸Abu Reum dang lo arai ekarikon ka Chimchai lo arai ekegiran keng kigirakis Artachasta abarua naga, igirito ngakiro a Yerusalem.

⁹“Ebunit abarua naga ani a Reum alo erai ekarikon a ewae a akwap, ka Chimchai lo erai ekegiran keng, ka ngirukitos kech, ka ngikatubok ngakiro ta ngikaweikinak a arieng luche daang ka ngitunga lu kolong sek apote alo Erek, ka Babilon ta Susa na anakwap a Elam,

¹⁰aapei ka ngibukui luche lu kolong etaramakini ekapolon Achuribanipal ka kesi anawiyei kech, sodi toloma lore a Samaria ka ngiwaitin luche alo too Eupurate.”[5]

¹¹Ngakiro na ayakasi nabarua nugu: “Nia ekapolon Artachasta, sua ngikasubak etich kon lu kiya lowae lo alo too Eupurate, kimalae iyong.

¹²“Ee ekapolon, kisakit iyong toyen atamar Ngiyaudi lu ngoon apote alowaitin a akwap kon, aloma Yerusalem. Abongokis kesi akiduk Yerusalem, ere lo a ngakiro anaaronok, lokechanan. Esiakis kesi akiduk ngawasea, erumorete atipei.

¹³Ekapolon, ani kebongokin akiduk ere logo torumoroe ngawasea keng, epalikinete ngitunga akibuk echur, sodi tokidiekuut ngaropiyae kon.

¹⁴Tokona ekapolon, aloger eraakar etich kosi ibore en, nyikisaki sua arima kon inyasunio, ngesi kibalar sua iyong

¹⁵todung atamar tasakae ngakiro a ere kalo nakitabea kata apaakon. Ani kikok neni, ianyuni iyong atamar erai ere logo eka ekurikur napei kolong a angorot, ichanito kesi ngikapolok a akwap ka lua ngiwaitin a akwap. Ichanaka ngitunga keng etiono apolokin. Ngakiro nguna kesi kolong enyasunere ere logo.

¹⁶Kinupit sua atamar ani kebongokin akiduk ere logo torumoroe ngawasea keng, nyeringa iyong nabo ipolokini ewae lo alo too Eupurate.”

¹⁷Abu ekapolon tobua ngakiro na atachuni ebala: “Nia Reum alo erai ekarikon ka Chimchai lo erai ekegiran keng ta ngirukitos kech lu elomito Samaria ka ngiwaitin luche alo too Eupurate, kemalae.

¹⁸“Elokony ngakiro a abarua ana ngoon igirunete esi kesomakin ayong.

¹⁹Abu ayong atodung atamar tongichunae ngakiro nguna. Iteni angichun atamar napei kolong a angorot, engerito ngitunga a Yerusalem ngikapolok nabo ileleba ngitunga luaronok neni ka lukechanak.

²⁰Apolokis ngikapolok lu eyenikinitae ere ngolo ka ewae lo alo too Eupurate daang, itubukete ngitunga echur ka akidieunun ngaropiyae.

²¹Tokona bocha, todungutu atamar tojongoto ngitunga ngulu akiduk ere ngolo, tanang adunguni ayong ngakiro ngache.

²²Tosubakisi nguna atipei, nyiinyasun ngakiro kang.”

²³Napei eirareta Reum ka Chimchai ta ngirukitos kech abarua na Artachasta naga isomao, apot toloto Yerusalem atipei sodi kitengero Ngiyaudi akiduk ere ngolo.

²⁴Apon kimiekinae etich lo a akiduk akai a Akuj tanang ekaru lo a ngiarei araakar Dario lo a akwap a Persia ekapolon.