Read turkana Esira 5 Bible Online

Esira 5 - turkana bible

Esira 5

¹Ngirwa ngulu, apot ngikadwarak ngiarei lu anyaritae Agai ka Sekaria lokookeng a Ido, kisiakis akisuruor ngitunga lu elomito Yuda ka Yerusalem, alokiro a Akuj a Isirael.

² Ani iirarete Serubabel lokookeng a Chalitiel ka Yochua lokookeng a Yeosadak ngakiro nguna, apot kisiakis abongokin akiduk akai a Akuj a Yerusalem, ingarakina ka ngikadwarak luarei ngulu.

³Ani anipei, apot Tetanai lo arai ekarikon a ewae alo alo too Eupurate, ka Chesar Bosenai ta ngirukitos kech toloto Yerusalem kingitas tamasi, “Ngae kidungokini esi atamar toduko akai naga torumosi kona?”

⁴Kingitas kesi[6] nabo tamasi, “Tangae ngirora a ngitunga alu adukete akai naga?”

⁵Nakaneni etee Ekapolon Akuj ngikasukou a Ngiyaudi, sodi apot ngikaweikinak lua arieng a Persia ngulu nyiitengero kesi akiduk, tanang igirarete kesi abarua nia Dario sodi kidarut ngakiro na etachuni.

⁶Apot Tatenai lo arai ekarikon a alo too Eupurate, ka Chesar Bosenai ta ngirukitos kech, kigirasi abarua nia ekapolon Dario.

⁷Ngakiro nugu egirakinitae ekapolon: “Nia ekapolon Dario, ipolokini iyong akwap a ekisil.

⁸“Ekapolon, kisaki alimokin iyong atamar kipotu sua atoloto lowae lo a Yuda atoriamutu akai a Akuj Anaapolon edukio. Edukio akai ngina a ngamoru anakoapolok nabo engichanakinio ngakito lokwaasea. Esubio etich kotere achwaanu lokojokon nabo elosi ngaren niajokon.

⁹“Kipotu sua engita ngikasukou atamasi, ‘Ngae kidungokini esi atamar toduko akai naga torumosi kona?’

¹⁰ Kipotu nabo engita kesi ngirora kech sodi atolimokineta iyong atamar tangae ngikarikok a etich kangolo.

¹¹“Apot kesi tatachut tamasi, ‘Kirai sua ngikasubak etich a Akuj a adis ka akwap, kibongokinit sua akiduk akai a Akuj na kolong aduki ekapolon epei loapolon a Isirael, toduk torumor kolong a angorot.

¹²Nakaneni ani aloger etongoeta taapaa kosi Akuj na adis, abu Akuj kimiek ekapolon a Babilonia lo enyaritae Nebukadinesa lo a akwap a Kalidayo, idwangi kesi. Abu ngesi kinyasu akai a Akuj sodi torik ngitunga nakwap a Babilonia.

¹³Ani ekaru lo ekingaren lo araakar Korech ekapolon a Babilonia, abu ngesi todung atamar tobongokinoe akiduk akai a Akuj.

¹⁴Abu ngesi tobuu egolit, ka ngakwangae ta ngiboro lukimujet lu kolong alemari Nebukadinesa alokai a Akuj alo Yerusalem, yaa kai na ayei Babilon. Abu Korech nak ngiboro ngulu itwaan ni anyaritae Chechibasar, lo aseuni ngesi toweik ewae a Yuda.

¹⁵Tolimok Korech ngesi atamar, Yaa ngiboro lugu kiwaak kai a Akuj na eyei Yerusalem, sodi tobongokinoe akiduk akai a Akuj ni kolong sek adukitoe.

¹⁶ Sodi tolot Chechibasar toboka ni edukokinio akai a Akuj alo Yerusalem. Napei ngina jik tanang tokona, edukio akai ngina, nakaneni eringa akai a Akuj nyerumoro akiduk.’

¹⁷“Tokona bocha, ani kisaki iyong, kimiek robo tasakae ni igiritae ngakiro a ngikapolok na eyakasi Babilon taanyunae kedungunit kolong Korech atamar tobongokinoe akiduk akai a Akuj alo Yerusalem, kori kemam. Ani erumor kitolimok iyong sua atamar ibala iyong ai anakiro kanu.”