Read turkana Esira 6 Bible Online

Esira 6 - turkana bible

Esira 6

¹Sodi todung ekapolon Dario atamar tasakae ngakiro a akai kangina anakiro a ngikapolok ana eyakasi Babilon.

²Nakaneni apon taanyunae akitab alore a Ekibatana alo erai ere loapolon alowae a Media. Egiritae ngakiro nugu nakitab ngina:

³“Ekaru lo ekingaren lo araakar Korech ekapolon, abu ngesi todung atamar tobongokinoe akiduk akai a Akuj Yerusalem toliwor ni ipeyoore ka akinom ngakipeyos. Esakitae aoyau na alokidiama a akai kangina erai ngamitae ngatomwon-arei ka ngakan-kaarei. Toliwor abalanyany keng ngamitae ngatomwon-arei ka ngakan-kaarei.

⁴Todukoe ngikwaasea a akai a akidokiet a apei a ngakito kidiama ngakidokiet ngauni a ngamoru. Tatachae etich ngolo daang a ngaropiyae a ekapolon.

⁵Tani ngiboro lua egolit ka lukwangae lu kolong alemari ekapolon Nebukadinesa alokai a Akuj alo Yerusalem yaa Babilon, ejoikinit ebuario kiwaakinae ni kolong ayakasi alokai a Akuj alo Yerusalem.”

⁶Ngakiro na atachuni Dario nugu, “Nia Tatenai alo erai ekarikon alo too Eupurate, ka Chesar Bosenai ta ngikaweikinak a arieng lurukitos kus. “Tochoito inangete kai a Akuj.

⁷Kimiekisi etich lo a adukuoru ngolo torotok ngaren. Kimiekisi ekarikon a ewae a Yuda ka ngikasukou a Ngiyaudi todukokis akai a Akuj ni kolong sek adukokinitae.

⁸Kadungokinit tokona ayong esi atamar kingarakisi kesi alotich kangolo. Etachio ngaropiyae atipei anaropiyae a ekapolon, ana idiauniyo erai echur alo too Eupurate, sodi torotokinio etich ngaren.

⁹Akolongit daang esakitae esi inanakinete ngimurok a Akuj lu eyakasi Yerusalem ibore daang nicha iitanito. Warasi nyiipukosi. Kerai ngimongin lusorok esakete, ka ngimesekin, kori ngimesekin luuchik lu ipeyonokinio Akuj na adis erai ngakipeyos na inomio, kori kerai ngakanoi, ka amakat, ka emuna ta akimiet.

¹⁰Esubakinosi ngakiro nguna sodi kipeyooto kesi ngakipeyos na ejoikinete Akuj na adis, sodi kelipakis ayong ka ngide kang kitopia Akuj.

¹¹Adungunit nabo ayong atamar itwaan daang nicha nyiwapi ngakiro nugu, iriunio akitoe alokai keng, tokularae ewae epei toitaaner, sodi torubokinae nakwaan keng. Kitiliworoe akai keng na echakio asakatan.

¹²Kimiek Ekapolon Akuj na kolong aseuni Yerusalem toliwor ni ilipeenere ngesi, todema apolou, ekapolon cha daang kori akwap na itopegi ngakiro nugu kori na esaki akinyasun akai a Akuj alo Yerusalem. Ayong Dario ngesi adung ngakiro nguna. Ejoikinit iwapio eriyan.”

¹³Apot Tatenai lo arai ekarikon a ewae alo alo too Eupurate, ka Chesar Bosenai ta ngikaweikinak a arieng lurukitos kech, tosuba ngakiro na adunguni ekapolon, kitemokis.

¹⁴Torotokis ngikasukou a Ngiyaudi ngaren niajokon edukete akai a Akuj, italakarito ngikadwarak a Akuj lu anyaritae Agai ka Sekaria ainakinito kesi agogongu. Apot kesi torumosi akai a Akuj loger lo kolong adungokinitor Akuj a Isirael ka eger lo adungunitor Korech, ka Dario ta Artachasta, lu araakasi ngikapolok a Persia.

¹⁵Torumosi kesi akiduk akai a Akuj akolongit na ngauni a elap alo enyaritae Adar, ekaru lo a ngikan-kapei lo araakar Dario ekapolon.

¹⁶Ani erumor, apot Ngisirael, ka ngimurok, ka Ngilawi ta ngitunga luche daang lusek abongunete anakwapea anache, kitaleut akai a Akuj a alakara.

¹⁷Kotere akitaleun akai ngina, apot kesi kipeyoto ngimongin amiat apei, ka ngimesekin ngamiae ngaarei, ka ngimesekin luuchik ngamiae ngoomwon, toliworos ngakipeyos. Kipeyoto nabo ngikora ngitomon ka ngiarei toliworos ngakipeyos a akisech, eweikinit ekoroe epei ekitela epei a Isirael.

¹⁸ Apot kesi totiakanakis tani ngimurok ka Ngilawi ngitichisio alokai a Akuj alo Yerusalem loger lo igiritere nakitab a Musa.

¹⁹Apot ngitunga lusek abongunete anakwapea anache tanyama esukukuu a Adeparet akolongit na ngatomon ka ngoomwon a elap alo ekingaren, ekaru lo atupit ngolo.

²⁰Apot ngimurok daang ka Ngilawi kitosegas toliworos lu italeuno. Taara Ngilawi ngibaren lua ngakipeyos a Adeparet kotere ngitunga daang lu abongunete, ka ngimurok ta kesi ngikulepek.

²¹Tanyama Ngisirael daang lu abongunete anarikonot ngakipeyos nguna. Tanyama tani daang lu aisikinete ngakujo nagelayek elipito ngibukui luche lu alomito nakwap ngina, sodi kilipeta Ekapolon Akuj na erai Akuj a Isirael.

²² Apot kesi tanyama esukukuu a ngamugati anapadok a ngirwa a ngikan-kaarei, elakara. Alakara kesi noi kainyo abu Ekapolon Akuj kitojok etau a ekapolon a Asiria[7] anikech, sodi kingarak kesi alotich kech alo abongonokinioto akiduk akai a Akuj ana erai Akuj a Isirael.