Read turkana Esira 7 Bible Online

Esira 7 - turkana bible

Esira 7

¹Adaunet a ngikaru alukaalak, na araakar Artachasta ekapolon a Persia, ayei itwaan ni anyaritae Esira. Abu kimara taapaakeng tanang nia Aron alo arai emuron loapolon. Arai Esira lokookeng a Seraya, alo arai lokookeng a Asaria, alo arai lokookeng a Ilikia,

²alo arai lokookeng a Chalum, alo arai lokookeng a Sadok, alo arai lokookeng a Aitub,

³alo arai lokookeng a Amaria, alo arai lokookeng a Asaria, alo arai lokookeng a Merayos,

⁴alo arai lokookeng a Seraya, alo arai lokookeng a Usi, alo arai lokookeng a Buki,

⁵alo arai lokookeng a Abichua, alo arai lokookeng a Pineas, alo arai lokookeng a Eleasar, alo arai lokookeng a Aron, alo kolong arai emuron loapolon a Akuj.

⁶Arotokini itwaan nibe Esira ngini alo Babilonia. Arai ngesi eketataman lo arai ekunonoit a Etal alo kolong alemuni Ekapolon Akuj na erai Akuj a Isirael nak Musa. Ainakinit ekapolon Artachasta Esira ibore daang nicha asaki, kainyo apiarit Ekapolon Akuj na erai Akuj keng ngesi.

⁷Abu ngesi ka Ngiyaudi ngiche pot Yerusalem ekaru loa ngikan-kaarei lo araakar Artachasta ekapolon. Araakasi Ngiyaudi ngulu ngimurok ka Ngilawi, ka ngikaeok, ka ngiketeok a akai a Akuj ta ngikasubak etich a akai a Akuj.

⁸Ananguni Esira Yerusalem elap lo a ngikan a ekaru alo a ngikan-kaarei alo araakar Artachasta ekapolon.

⁹Esiakini Esira alotoru keng alo Babilonia akolongit na ekingaren a elap alo ekingaren, sodi tanang Yerusalem akolongit na ekingaren a elap alo a ngikan, kainyo eyoki Akuj ngesi.

¹⁰Alemuna Esira akisomare Etal a Ekapolon Akuj, ka akisub eger lo esakea Etal, ta akitatam Ngisirael ngakiro a Etal daang.

¹¹Abarua naga ngesi egirakini Artachasta Esira, lo arai emuron a Akuj, tarai eketataman a Etal. Ayeni ngesi noi ngitalio ka ngakiro na adungokinit Ekapolon Akuj Ngisirael. Egiritae abarua kona:

¹²“Ebunit abarua naga ani a Artachasta alo erai ekapolon. Igirakinit Esira alo erai emuron ka eketataman a Etal a Akuj a Adis.[8]

¹³“Adungunit ayong atamar anakwap kang kadaang, ani keyei Esiraelit daang kori emuron kech, kori Elawit lo esaki alosit Yerusalem, epedori ngesi akirukor ka iyong.

¹⁴Ayong ka ngikasukou kang lukan-kaarei, kimearit iyong Yerusalem ka Yuda angichun kiwapitae Etal a Akuj kon, lo kiinakin iyong.

¹⁵Yaa ngadekon a egolit ka akwangat na kisaki ayong ka ngikasukou kang alemikin Akuj a Isirael, na eyei akai keng Yerusalem.

¹⁶Yaa tani akwangat daang ka egolit lo ichunakini iyong anakwap a Babilon kadaang, ka ngadekon na elemunete Ngisirael ka ngimurok kech kotere akai a Akuj kech na eyei Yerusalem.

¹⁷“Ejoikinit iyong ichoikini ngaropiyae nguna, togielea ngimongin, ka ngimesekin, ka ngimesekin luuchik, ka ngadekon a ngalemet ta emuna, sodi kipeye alokeno a ngakipeyos alo eyei kai a Akuj kon alo Yerusalem.

¹⁸Akwangat ka egolit lo idongi, ipedorete iyong ka ngitunga a akwap kon luche asubea ibore nicha isakete, itemem ka eger lo esakea Akuj.

¹⁹Tolemik Akuj alo Yerusalem ngiboro daang lu kiinakin iyong asubea etich alokai a Akuj.

²⁰Ani keyei ibore iche isaki iyong kotere akai a Akuj, ipedori iyong aanyun anaropiyae a ekapolon.

²¹“Adungok ayong ngikaweikinak a arieng daang lu eweikinito ngaropiyae alowae alo alo too Eupurate ainakin Esira, lo erai emuron ka eketataman a Etal a Akuj a adis, ibore daang ni esaki,

²²tanang ngaropiyae ngakiloi 3,400, ka ngakanoi ngakiloi 10,000, ka emuna ngalitae 2,000, ka akimiet ngalitae 2,000 ta amakat etiae locha esakitae.

²³Ejoikinit echoikinio alemun ibore daang ni esaki Akuj a adis kotere akai keng, nyakangoikinea ngesi ayong kori talokookang.

²⁴Kilimokinitae esi atamar ngimurok, ka Ngilawi, ka ngikaeok, ka ngiketeok a akai Akuj ta ngikasubak etich alokai a Akuj, kori itwaan cha daang ni eiyosi ka akai a Akuj, italeo akitubuk echur.

²⁵“Iyong Esira, kotere aosou nakiinak iyong Akuj kon, toseu ngikaweikinak a arieng ka ngikatubok ngakiro topolokis ngitunga daang lu alo too Eupurate lu iwapito Etal a Akuj kon. Ejoikinit iyong itatami Etal ngolo itwaan daang ni nyeyeni.

²⁶Ani kichwangak itwaan cha daang ngitalio a Akuj kon, kori lua akwap, ejoikinit irirao atipei. Toliwor eriras keng akitu, kori toeniarae nakwap nagela, kori todemarae ngibaren keng, kori toenae alojela.”

²⁷Tolim Esira tama, “Kipuroe Ekapolon Akuj na erai Akuj kata apaayok! Kainyo etachamu ngesi ekapolon akitisir akai a Akuj na eyei Yerusalem.

²⁸Kotere amina a Akuj na nyedaun, aanyu ayong akingarakino ani a ekapolon, ka ngikasukou keng ta ngikaweikinak a arieng keng daang lu eyenikinitae. Kainaki Ekapolon Akuj na erai Akuj kang ayong atitinyu na apedorea akimaima ngikapolok a ngimacharin a Ngisirael daang sodi atobongutu ka ayong aapei.”