Read turkana Esira 8 Bible Online

Esira 8 - turkana bible

Esira 8

¹Erai lugu ngirora a ngikarikok a ngimacharin alu kolong arikitoe Babilonia, lu abongunete ka Esira Yerusalem ngirwa lu araakar Artachasta ekapolon.

²Gerichom lo a emachar a Pineas. Daniel lo a emachar a Isamar. Atuch lo a emachar a Daudi.

³Arai Atuch lokookeng a Chekania. Sekaria lo a emachar a Paroch, erukito ka ngikiliok amiat apei ka ngitomwon-kan lua emachar keng (ayenio ni etorunete ngalesea kech).

⁴Eliewonai lokookeng a Seraya lo a emachar a Paas Moab, erukito ka ngikiliok ngamiae ngaarei.

⁵Chekania lokookeng a Yaasiel lo a emachar a Satu, erukito ka ngikiliok ngamiae ngauni.

⁶Ebed lokookeng a Yonasan lo a emachar a Adin, erukito ka ngikiliok ngitomwon-kan.

⁷Yechaya lokookeng a Asalia lo a emachar a Elam, erukito ka ngikiliok ngitomwon-kaarei.

⁸Sebadia lokookeng a Mikael lo a emachar a Chepatia, erukito ka ngikiliok ngitomwon-kauni.

⁹Obadia lokookeng a Yeyel lo a emachar a Yoab, erukito ka ngikiliok ngamiae ngaarei ka ngitomon ka ngikan-kauni.

¹⁰Chelomis lokookeng a Yosipia lo a emachar a Bani, erukito ka ngikiliok amiat apei ka ngitomwon-kapei.

¹¹Sekaria lokookeng a Bebai lo a emachar a Bebai, erukito ka ngikiliok ngitomwon-arei ka ngikan-kauni.

¹²Yoanan lokookeng a Akatan lo a emachar a Asigad, erukito ka ngikiliok amiat apei ka ngitomon.

¹³Elipelet, ka Yeuel ta Chemaya lua emachar a Adonikam, erukito ka ngikiliok ngitomwon-kapei (abongunete ngulu ekisidi).

¹⁴Usai ka Sakur lua emachar a Bigipai, erukito ka ngikiliok ngitomwon-kaarei.

¹⁵Atochunak ayong ajore daang lochilet a angolol ana eleleunit tanang lore a Aapa, sodi atoloma neni ngirwa nguuni. Ani engolenakini tooma ajore, abu atorukau atamar eyakasi ngimurok nakaneni amam Ngilawi alokiding kech.

¹⁶Atanyarau ngikarikok ngikan-koomwon lu araakasi Elieser, ka Ariel, ka Chemaya, ka Elinasan, ka Yarib, ka Elinasan, ka Nasan, ka Sekaria ta Mechulam aapei ka ngiketatamak ngiarei, Yoyarib ka Elinasan.

¹⁷Atomea ayong kesi nia Ido alo arai ekarikon a ngitunga alu ayakasi Kasipia, alimokin ngesi ka ngirukitos keng lu asubete etich alokai a Akuj, atamar tomeut ngitunga ngidi pot tosuba etich alokai a Akuj.

¹⁸Kotere ajakaanut a Akuj na kirukit ka sua, apot kesi tomeut Cherebia, itwaan ni epedori etich, lo arai Elawit a emachar a Mali. Abu ngesi kirukut ka ngitunga ngitomon ka ngikan-kauni[9] lu araakasi talokookeng ka talokaatokeng.

¹⁹Apot kesi tomeut tani Achabia ka Yechaya lua emachar a Merari erukito ka ngiyenet kech ngitomwon-arei.

²⁰Aapei ka ngulu, ayakasi ngikasubak etich a akai a Akuj 220, lu kolong aseunito Daudi ka ngikaweikinak a arieng akingarakin Ngilawi. Egiritae ngirora kech kadaang.

²¹Sodi atodung ayong kaneni alochilet a angolol a Aapa atamar atorono sua daang akimuj, etiditeunos alongaren Akuj kosi, elipa ngesi kitorik ka akiyok analotoru kosi ka ngide kosi ta ngibaren kosi daang.

²²Ketimit ayong alosit nia ekapolon atamar kiinak sua ajore a ngasigerea ka ngikameak ngangolei sodi kiyoko sua alomoe analotoru kosi, kainyo alimokinit sek ayong ngesi atamar epianari Akuj itwaan daang ni igieno ngesi, nakaneni irirae daang nicha engeri ngesi.

²³Sodi atorono sua akimuj elipa Akuj kiyok sua, abu ngesi kiira ngakilipasinei kosi.

²⁴Abu atoseu ngimurok a Akuj lu ayenikinitae ngitomon ka ngiarei lu anyaritae Cherebia, ka Achabia ta ngirukitos kech ngitomon.

²⁵Ani erumor etem ngakwangae ka egolit ta ngadekon na kolong alemunete ekapolon, ka ngikasukou keng ta ngikaweikinak a arieng keng, nakis Ngisirael tosubeta etich alokai a Akuj, sodi ainak ayong ngimurok.

²⁶Ngiboro lu ainakini ayong kesi lugu: Ngakwangae ngataanea 22. Ngiboro lukwangae 100, lu arai apotis kech ngakiloi 20. Egolit ngakiloi 3,400.

²⁷Ngatubwae na esubunitae a egolit 20, arai apotis kech ngakiloi 8.4. Ngatubwae naajokak ngaarei na asubunitae anasua ananyangayek ana eriyan ngaropiyae kech ka na ngatubwae ana asubunitae alogolit.

²⁸Atolimok ayong ngimurok atama, “Kitaleun esi toliworos ngika Ekapolon Akuj ana erai Akuj kata apaakus. Italeunitoe tani ngiboro lukwangae lugu daang ka lua egolit lu elemikinitae ngesi erai ngadekon na echamit itwaan alemun.

²⁹Tochoikisi ngiboro ngulu lokojokon tanang inangete kai a Akuj alo Yerusalem. Ani inangete neni, ilomarete namaniyat na a ngimurok, kitemo ngiboro ngulu, sodi kipotosi nakis ngikarikok a ngimurok, ka lua Ngilawi ta ngikarikok a Ngisirael.”

³⁰Sodi kidiaut ngimurok ka Ngilawi ngakwangae, ka egolit ta ngiboro lukimujet, yaasi kai a Akuj yok alo Yerusalem.

³¹Ani enangi akolongit na ngatomon ka ngaarei a elap alo ekingaren, atorotokisi sua alochilet a angolol a Aapa atoloto Yerusalem. Eruko sua ka Akuj kosi, kiyok alomoe kadaang alu adikino kituumwokinete alorot.

³²Ani kinanguni Yerusalem, eangasi a ngirwa a nguuni.

³³Ani akolongit na ngoomwon, atoloto kai a Akuj etemo ngakwangae, ka egolit ta ngiboro lukimujet, ani erumor ainakisi Meromos lokookeng a Uria lo arai emuron. Arukito ngesi ka Eleasar lokookeng a Pineas ta Ngilawi ngiarei lu anyaritae Yosabad lokookeng a Yechua, ka Noadia lokookeng a Binui.

³⁴Apon kimarunae ngiboro daang kitemoi, sodi kigirae ekimar kech esaa lopei ngolo.

³⁵Ani erumor apot ngitunga daang lu kolong abongunete anarikonot tolemut ngakipeyos na inomio, kipeyokis Akuj a Ngisirael. Kipeyoto kesi ngimongin ngitomon ka ngiarei kotere Ngisirael daang, ka ngimesekin ngitomwon-koomwon ka ngikan-kapei ta ngimesekin luuchik ngitomwon-kaarei ka ngikan-kaarei. Kipeyoto tani ngikora ngitomon ka ngiarei lu italeunotor kesi anakisech. Apon ngibaren ngulu daang kinomae toliworos ngakipeyos a Ekapolon Akuj.

³⁶Apot kesi tolemut tani abarua na kolong ainakini ekapolon sodi nakis ngikaweikinak a arieng ka ngikarikok a ewae alo alo too Eupurate. Apot ngulu kingarakis kesi ka akilip alokai a Akuj.