Read turkana Esira 9 Bible Online

Esira 9 - turkana bible

Esira 9

¹Arumoret a ngakiro kanguna kadaang, pot ngikarikok a Ngisirael ngiche nikang katolimokis anyong tamasi, “Awout Ngisirael, ka ngimurok ta Ngilawi atiakar alotunga a ngakwapea ana idunyatar kesi ana enyaritae Amon, ka Moab ta Misiri. Awout tani atiakar ani a Ngikanaan, ka Ngiiti, ka Ngiperes, ka Ngiebus ta Ngiamor. Esubete kesi ngakiro nakikadakinete loger a ngitunga a akwap kangina.

²Kainyo euta Ngiyaudi ngaberu na ngibukui alugelayek kangulu. Enyasut ngakiro nguna ngitunga a Akuj lu italeuno. Ngikarikok a Ngisirael ka ngikaweikinak a arieng kesi eroko noi anakisech kangina.”

³Ani eirari ayong ngakiro nguna, abu atochilichilia ngiworui kang ariangakina, atorut ngitim kang lua akou ka lua abokony sodi eboikin kwap ealolongi.

⁴Eboikin ayong neni ealolongi tanang esaa lo epeyoore akipeyos naka ebong. Kisiakis ngitunga achunakin keriam ayong, ngitunga daang lu abulit kotere ngakiro na alimuni Akuj a Isirael kotere ngasechesea a ngitunga alusek abongunete anakwap anache.

⁵Ani esaa lo a akipeyos anaka ebong, atonyou ayong anisek ealolongio eringa anapit ngiworui kang luchilichila, atoriedik etorwaa ngakan kang nia Ekapolon Akuj ana erai Akuj kang,

⁶elip atama, “Ee Akuj kang, ketimit ayong tani akikeun ngakonyen kang alongaren kon katokienyik iyong. Edilakin ngasechesea kosi aoyaketa eporosi ngakies kosi, aoyaketa anang nadis.

⁷Napei alorwa alu kata apaakosi tanang tokona, kisechak sua ngitunga kon iyong lokojokon. Kotere ngasechesea kosi, ka na a ngikapolok kosi ta ngimurok kosi, kidwang ngikapolok a ngakwapea anagelayek sua. Kiar kesi sua, kitokokoeasi nabo kitoriko atoliworos ngirikon. Kiruma sua ngileech lokojokon tanang tokona.

⁸Ee Ekapolon Akuj na irai Akuj kosi, kiinak tokona iyong sua ajakaanut kon a ngirwa a ngidikidio, sodi kimiek iyong ngiche kosi kipiyanun ani kiraakar ngikedalak atoloma nakwap na italeuno naga akaalimon. Kilakak iyong sua ani kiraakar ngikedalak kiinak akiyar nakitetet.

⁹ Kirai kolong sua ngikedalak, nakaneni ibu iyong nyikiisik sua kirai ngikedalak. Ibu iyong kitojok ngitai a ngikapolok a Persia anikosi, sodi kitachamakis kesi sua kiyari ka akiduk akai kon na kolong abu kinyasun, nabo kiriwokis sua awas kanege alo Yuda ka Yerusalem.

¹⁰“Ani tokona, ee Akuj kosi, anukiro kilimuni arumoret kanguna kadaang? Kainyo nyiwapa sua ngakiro

¹¹na kolong kidungokini iyong sua kisitoru nia ngikadwarak alu eraakasi ngikasubak etich kon, ibala, ‘Akwap na iloose esi akilom, nyitaleuno kainyo ileleba ngitunga lu elomito neni, ngakiro naaronok nakikadakinete esiriama te!

¹²Aloger kangolo, nyiiutasi ka ngitunga ngulu nabo tochoito ingarakinete kesi kisikokinos kori toriamut ngakiro naajokak, sodi toriamuneta esi agogongu ka ngakiro naajokak a akwap kangina, ani erumor toisikineta ngalesea kus toliwor akech jik.’

¹³Tani kiriamunit sua eriras kotere ngasechesea kosi naaronok kisubi, kiyeni atamar eriras lo kiinak iyong sua, ee Akuj kosi, edit noi nyeriyan ka akisech kosi, nakaneni kimiek iyong sua tani lupiyayek kiyari.

¹⁴Kikokini tokona sua ai kingeri ngitalio kon sodi eutas ka ngitunga luaronok lugu? Ani kisubak sua kongina, ingoi iyong lokojokon kitomunya sua jik nyiidong tani ipei eyari.

¹⁵Ekapolon Akuj na irai Akuj a Isirael, irai iyong na itenoono, nakaneni kimiek iyong sua kiyari. Kilimorit sua akisech kosi anikon, kiyeni atamar nyitemokino sua kiponi ngaren kon.”